Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27792 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
giovedì 13 settembre 2007 - ore 08:55
LE DIMANDE INTELIGENTI....
(categoria: " Vita Quotidiana ")
Quando un prete "cojona San Piero" overo buta via la veste se dise ch’el ze "spretà"... Se un frate buta via la tonegona se poe dire ch’el ze "sfratà"???
Come mai "separato" se scrive tacà e invesse "tutto insieme" se scrive separato?
Cala de continuo el nùmaro dei teleaspetatori televisivi.. I cinema e i teatri ze sconsolatamente vodi.... No leze più nessun.... E come se no bastasse no nasse più putei. Ma se poe savere come casso se diverte i italiani???
Visto che le suore ze "le spose de Dio", quando una se lassa el convento Dio ghe pagheo i alimenti?
LEGGI I COMMENTI (3)
-
PERMALINK
mercoledì 12 settembre 2007 - ore 09:16
E DAGHELA!!!
(categoria: " Vita Quotidiana ")
Continua l’espluà de cressente inbecilità nele varie television locali (su quele nassionali stendemo un velo pietoso sora!)... Su una che ze losco figuro co la facia da quajo che svende numari del loto studià co gran sforso cerebrale da un serto dotor CIRO ESPOSITO!!!!.. Desso, digo mi, za vendare numari del loto ze na assion da ladroni (comunque cronparli ze assion da mone!), vendare numari studià da uno co co sto nome ze da inbessili... Chi sarà quei quajoti che se fida de uno che se ciama cussì e che serto no abita a Bolsano??? (ma che sicuramente come medego no’l esiste gnanca!) Sarìa come se mi ani indrio gavesse consilià a me mojere de farse fare la visita ginecologica dal sior Pietro Paciani!!!... Dopo ghe ze na pubricità, senpre dei numari del loto, co raquanti mone intervistai drio la strada drento machinasse o coi schei in man ai quai vien fata l’acuta dimanda: "Mai come gai fatto???" (a fare cussì tanti schei?- sotinteso).. ti te te aspetaressi la risposta tipica: "Dando via el culo!" invesse sti mone risponde tuti co un soriso ebete cussì grando che se la suca no gavesse ai lati le rece la boca farìa el giro dela testa: "Coi numari di Daniela Solgi!!!) ( no me ricordo ben sto nome del casso!)... Al che apare sul schermo el facion da sema dela vegente che ride contenta e ala dimanda inteligentissima "Ma come fa?" rispoonde al’incirca: "Me li insogno de note!!!"... A sto punto sorge spontanea na dimanda (come dise senpre l’aloco de Lubrano) ai dirigenti televisivi: mi capisso che par i schei ormai, come dito sora, se vende anca el culo, ma no ve pare el caso che serti deficenti più che mandarli in onda sarìa mejo MANDARLI IN MONA de so mare mussa????
LEGGI I COMMENTI (7)
-
PERMALINK
martedì 11 settembre 2007 - ore 09:26
GO SBALLIA: ECO DOVE SE LEZE LA SGANASSADA!!!
(categoria: " Vita Quotidiana ")
Grassie a na bea colaborassion co l’amigo Angelo da desso in vanti "LA SGANASSADA" rivista de satira fata da mi e altri amissi come Moreno Morello, Fred, Stefanato e tanti altri podì lezarla agratis (roba questa de estremo valore) on line sul sito www.ciaopadova.com
Andè vedare e se voi vedare publicà ( a nostro insindacxale giudissio) qualche vostro articoleto mandè pure rispetando ste picole regole:
1) Articoli divertente possibilmente de satira
2) Italian o veneto va senpre ben
3) Articoli curti
4) Gnente porchi e resie
5) Va ben anca batute, vignete, barzelete, basta no le fassa cagare...
6) No ghe ze schei da ciapare... questo sia ciaro!!!!
LEGGI I COMMENTI (8)
-
PERMALINK
lunedì 10 settembre 2007 - ore 14:05
RUBRICA: "SCRIVEMO UN MONA ALA VOLTA"
(categoria: " Vita Quotidiana ")
Eco qua l’enesima vacada de alberto11...
Perche quando se se imbriaga,se dise:"a go fato na simia?"(scimmia in italiano me ricorda Celentano)
Rispondono i nostri 2 esperti:l’animalista de tencarola Rino Ceronte e l’esperto de bale e imbriagamenti Walter Basso.
Caro lettore te rispondemo subito ala to domanda.Nane Fregola deto brumbrum(attitudine al cheno)quando che l’è cargo de vin el taca fare i tiri del simioto,overo el taca a sberegare,cantare,rampegarse su par i pali,el camina incucià parchà no l’è bon de stare in piè,el se pissa dosso cofà le simie,insome el pare na simia.Eco parchè se dise fare na simia.
LEGGI I COMMENTI (11)
-
PERMALINK
sabato 8 settembre 2007 - ore 12:25
ECOME QUA...
(categoria: " Vita Quotidiana ")
Dopo la tirada de rece del sior Moreno che se lagna (par torme par el sesto) del fato che ze tre di che no scrivo qua, sensa pensare che lu sarà oltre sie mesi che no scrive un’ostrega, torno al’ovile (come fa i cavaroni ala sera!) e pubrico un interessante articoleto dedicà ai amissi pensionati (che dio li fulmina tuti!!!!)... Fra qualche giorno ve agiorno sui tre di al mare!!!
EL CALDO E I ANSIANI
El mese de agosto ze un mese anomalo parché unisse le gioie dele ferie (che ben che se stà lontan dai paroni sustosi e fastidiosi!) al ronpimento de togne dovuo al caldo bestia, al’umidità che te se peta dosso cofà la pégola e ale càncare schifose de zanzare che beca maledetamente… Queli che dovarìa sofrire de più in assoluto ze i cosideti “anziani” mèjo conossui come “pensionati”… Infati za da giugno par television i taca sigare: “ Atensione par dio: i ansiani no ga da andare fora parché fa caldo… i pensionati ga da bere tanta aqua parché senò i more sbochesando cofà tenche!... e atension ale corenti de aria!”… Anca sui giornali i taca scrìvare le stesse robe e i cronisti speta ansiosamente che qualche vecioto mora de un colpo (roba fassilissima visto che un vecio prima o dopo ga da morire!) par finalmente titolare a tuta pagina: “ ANSIANO VITIMA DEL CALDO BOJA!”… Nela realtà dei fati, però, i pensionati mediamente stà benissimo, sconti in casa, comodamente stravacà sui caregoti in dotassion… No avendo però gnente da fare i scassa i ovi ai familiari che cussì sofre tremendamente parché oltre “al caldo bestia, al’umidità che te se peta dosso cofà la pégola e ale càncare schifose de zanzare che beca maledetamente” i ga anca da métare in conto i sproloqui insulsi del vecio nono che causa anca del caldo che bate in testa ga un aumento a rasso del rincojonimento acuto… Eco alora che i familiari mete in ato tuta na serie de tentativi par far sì che el nono possa andare al più presto a rónpare le balote nel’aldilà tra i angioli che svola e altri che canta le lodi celesti, fasendo oltretuto un grosso piassere anca al governo Prodi che de pagare corpose pension a zente che no ga gnente da fare da matina a sera no ghe ne poe proprio più.
Alora el nono vien mandà in corte ale ore più calde co la scusa de far zugare a balon el nevodeto che no voe stare drento co la segreta speransa chel ciapa na solana in testa e de conseguensa ariva anca l’agognato colpo popletico. Risultato: al rientro el bocia ga la freve a quarantado e vomega come un porseo e el nono invesse sfogia na abronsatura che gnanca co diese lampade a setimana ti te riessi a otegnere… Opure, se ghe mete in coste al caregoto un sventolatore a massima velocità co la scusa de rinfrescarlo quando invesse la speransa segreta ze che ghe vegna su na broncopalmolive bicilindrica co anessa pleure e morte par conplicanse estreme.
L’unica roba che rivarà invesse sarà un legerissimo snaro (rafredore tipico dei polastri) co stranui a tonfon e spuaciamento de dentiera nova fora dala finestra la quale, dentiera, vegnarà sopressà e ridota in mie tocheti da un bilico de passajo prima che se possa recuperarla.
Cussì bisogna ricronparghela dopo aver pagà na mostruosa boleta del’enel par tuta la corente chel sventolatore ga consumà… In più bisognarà barufare co l’ansian che, abituà al fresco, vorà anca un sventolatore a tenpo pieno in càmara e uno, in caso de bisogno, in cesso.
Me fermo qua anca parché vojo precisare che in fondo mi, da maleducato umorista, sò solo drio schersare parché in realtà ghe ze anca fameje che al nono ghe voe un gran ben, ghe tien da conto e fa de tuto parché el staga in salute e el viva a longo, ala facia de Prodi e del’Inps: parlo naturalmente dei familiari dei vecioti che ga na pension mensile de oltre mile e dozento euro e magari un paro de nevodeti picoli ma estremamente ronpicojoni da tegnere soto continuo controlo… Ze questi i casi che dimostra che aldilà de tuto ze vero che “l’amore ze orbo… ma la conveniensa ghe vede benissimo!”
LEGGI I COMMENTI (7)
-
PERMALINK
lunedì 3 settembre 2007 - ore 23:12
TRE DI DE RIPOSO!!!!
(categoria: " Vita Quotidiana ")
Saludo tuti e vago fora dai coj... scusè vago fora sità, overo al mare, par tre longhi giorni co mojere e prole.... Lasso casa television, conpiuter e sacramenti vari... Mando molto gentilmente a farselo metare de bruto el deficente de Biscardi, sassin dea lengua italiana, serial chiler dei congiuntivi, co la so paruca zala stile "polentina" de Pinochio, da na vita inpegnà solo a parlare de balon come fusse question de vita e de morte... Se ricatemo venare.....
LEGGI I COMMENTI (8)
-
PERMALINK
domenica 2 settembre 2007 - ore 16:45
GIUDA CAN, CHE BAE!!!!
(categoria: " Vita Quotidiana ")
Oncò gò dei otimi motivi par avere le bale in giostra... ma no ve li dito parché i ze cassi mii e el me moto ze: "Chi se fa i cassi sui vive sento ani!"... Ma ve regalo na barzeletina... toh ciapa!:
In ostaria ghe ze tre cassadori de cacia grossa che infati conta bale grossissime… Sentà su un tavolin darente un veceto co la facia da stitico che scolta atentamente…
Uno dei tre partre a contare:
- Dunque gavì da savere che mi al polo nord go incontrà un orso bianco nero… Gero in mezo ala neve quando el bestion ga tacà corame incontro co l’intento poco cristian de magnarme le brasole… Beh, mi, interepterito gò spetà chel fusse a sirca diese metri po’ gò trato na s-ciopetà e lo gò fato seco…
- Fato puito, - siga el secondo tuto gasà – mi invesse gò corso un ris-cìo ancora più grando: duranti un safari de colpo me so catà a sirca venti metri drio el bero un lipopotamo inferocito che ga tentà de caricarme… Mi so stà fermo po’ quando lo gò sentio a sirca oto metri me so girà de boto ghe gò sbarà do colpi de s-ciopa “Ta – Ta” proprio intrameso ai oci… Dio che tega col ze cascà!
- El s cari, la vita del cassadore ze pericolosa – tarocca el terso – penseve che mi un dì un cucodrilo ze balsà fora dal’aqua fin che me riposavo soto un’albaro… El ga fato un salto in alto de circa sete metri e quando chel gera a un metro sora de mi co la bocassa verta mi go ciapà un masso cogolo da ottanta chili e ghe lo gò sgiventà sul babio… El ze aterà scainando (?) e el se ga solontanà co la coa tra le ganbe dadrio… Dio che inpression…
A sto punto el veceto no ze più bon de tegnerse e salta fora:
- Bravi… bravi… veramente corajosi ma vuoi metare le vostre aventure co quela che me ze tocà l’altro ieri a mi?... pensè che a un serto punto me vedo davanti a sirca tre metri un lion co la scavejara drita che me varda co le bave ala boca… E mi, spressante del pericolo, me sò avissinà e co so stà a sirca trenta centimetri… savìo cossa che gò fato?
- Cossa galo fato, sior?... – dise in coro i tre balisti.
- Gò tirà fora el pipiolo e ghe gò pissà dosso a sto schifoso d’un can massa cressuo!!!
- E… E… dopo cossa ze successo???
- Gnente: ze rivà el guardian del zoo e me ga sgnacà in coste na multa da tresento euri, sto infame sassin!!!
LEGGI I COMMENTI (1)
-
PERMALINK
venerdì 31 agosto 2007 - ore 08:31
ECO LA SAGESSA POPOLARE de alberto11
(categoria: " Riflessioni ")
Pubrico ( e cussì taca na colaborassion verta a tuti) le perle de sagessa popolare mandae dal’amigo alberto11, uno fora coe oche forte!:
E femane xe come e scorese: o te’e moi o te’e sofeghi
Xe sempre l’ultimo giosso queo che imbriaga
Magnà go Magnà bevuo go bevuo ’desso vago casa , pincio a femena e bato el bocia
(Magnà -magnà, biuu -biuu, vao casa, pincio ea femena, bato ea picoea e vao in leto)
Mejo berghene ’na possa che spanderghene ’na giossa
Oselo in culo non fa fanciulo
Fradelo e sorela su la capela rota la parentela
.Chi xe al coverto quanto piove, l’è ben mato se el se move; se el se move e se el se bagna, l’è ben mato se el se lagna
Forsa e coraio... che la figa g’ha el taio! Coraio e forsa che la figa g’ha scorsa!
Un romano el se vanta con un veneto: - Noantri a Roma ciavemo l’Arco de Tito ciavemo er Coloseo ciavemo el Foro romano e voi in Veneto che ciavete? El veneto risponde: Noialtri in Veneto ciavemo e tasemo!!!
Se laora e se fadiga par la panza e par la figa
Guanto, figa e bareta no ze mai streta
Toni inbicicleta.....dio fren se ga roto el can.
A chi no ghe piase el vin, Dio el ghe toga anca l’aqua.
Quando el caveo deventa bianchin, lassa star la dona e date al vin!
LEGGI I COMMENTI (6)
-
PERMALINK
giovedì 30 agosto 2007 - ore 19:49
CONSIDERASSION SU DON SSANTE!!!
(categoria: " Vita Quotidiana ")
Mejo un prete che se tronba na parochiana che un ministro che ne incula tuti!
LEGGI I COMMENTI (2)
-
PERMALINK
mercoledì 29 agosto 2007 - ore 22:11
AHHH... AHHHH....AHHHHH
(categoria: " Vita Quotidiana ")
Par television i ga dito che doman de sera i CESARONI vien fare un salto casa mia!!!! E mi doman de sera vago via cussì i Cesaroni poe andare a farselo metare de bruto visto che no i cata casa nissun!!!! A ramengo lori e anca Maria De Filipi (che no centrea un casso però la me stà sui cojoni!)...
PS
Scuseme ma oncò me sento particolarmente cativo e fastidioso!!!!
LEGGI I COMMENTI (3)
-
PERMALINK
> > > MESSAGGI PRECEDENTI
[ SONO OFFLINE ] 