Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
domenica 5 novembre 2006 - ore 13:13
PUNTI DE VISTA!
(categoria: " Riflessioni ")
L’altro dì un me amigo ma ga contà sto episodio: - Ti te se che go na fiola de sedese ani... Bon, tre giorni fa la ma dimanda de portarla dai paruchieri (gavìo mai osservà che i paruchieri i ze senpre in do come Olio e Stalio, Gregio e Jacheti, Gaspare e Zuzuro?) a postarse i caveji. Visto che la ga apuntamento ale quatro mi ale quatro manca sinque la molo davanti la botega dei infami artigiani. Torno casa quando dopo sirca venti minuti sona el telefono: la ze me fiola che me dise de ‘ndarla tore che la ze pronta. La roba me spussa visto che i paruchieri senpre più infami e porchi artigiani, de solito i ze longhi come l’ano dela fame... Comunque vago tore la tosata e la trovo spenotà e co i caveji driti che la me faseva inpression vardarla: la me pareva un papagalo che gaveva pena barufà co un lion... Ma questo ze gnente: ghe dimando la spesa: -40 euri popà - me risponde serafica la tosata.... Torno casa e agredisso la femena (me mojere) visto che la gera stà ela a consiliare ala fiola sti coifeur del casso... e seto la risposta: - Cossa vuto che sia 40 euroschei? ... Prima i ze del artisti (si, a tosare cani e piegore!)... secondo i ga fato na messa in piega!!!...- Ti caro amigo svisserato cossa disito? - Cossa vuto che te diga caro Bepi, - go risposto mi - secondo mi ghe ze un erore de fondo sula valutassion de to mojere, sta sema de guera: secondo mi più de na messa in piega sul to caso se poe parlare de na messa in culo....
LEGGI I COMMENTI (4)
-
PERMALINK
sabato 4 novembre 2006 - ore 16:27
GESU’ IN COA ALA CLASSIFICA!
(categoria: " Vita Quotidiana ")
I preti ga fato un sondagio par fare la it pareid dei santi e Gesù, poro cristo, ze rivà squasi ultimo... Come i Blu Vertigo co i ze andai a Sanremo... Anca la Madona ze messa mae... solo al’otavo posto... Mahhh... el primo risulta Pare Pio quelo co la barbona e l’ocio cativo!!!... Boh... fose però Gesù che ze anca Dio (praticamente el ze pare fiolo e anca el picione Spirito Santo.. roba questa che no gò masi capio!)... secondo mi nele pregherie roverse ( overo le biasteme) el ze in testa! Ecove comunque na barzeleta che dimostra sto conceto:
San Gisepo ze drio lavorare in falegnameria e Gesù ze in saloto drio lezare le boze dela Bibia... A un serto punto Gisepo se mola na potente smartelà sui dei... Dopo do secondi riva Gesù de corsa: - Ciò popà, par caso me gheto ciamà????
LEGGI I COMMENTI (2)
-
PERMALINK
venerdì 3 novembre 2006 - ore 19:07
VUTO RIDARE????
(categoria: " Vita Quotidiana ")
Se voì farve na bea sganassada andè intel sito wwwyoutube.com a vardare el video dal titolo "ufficiale gentiluomo" sototitolo: "A te insegno mi come che se dise pissio!"... Ridade assicurà!!!
LEGGI I COMMENTI (2)
-
PERMALINK
giovedì 2 novembre 2006 - ore 19:00
DASEMOGHE UN TAJO!
(categoria: " Riflessioni ")
Chi volesse darghe un tajo a sta television da sbochi poe andare sul sito www.claudiolippiunminuto.com e da qua mandare un messajo de protesta a chi de dovere.. Mi lo gò za fato!!!
LEGGI I COMMENTI (4)
-
PERMALINK
giovedì 2 novembre 2006 - ore 18:40
ALMANCO UNO DE SVEJO!!!
(categoria: " Riflessioni ")
Domenega passà Claudio Lippi ga mandà idealmente in mona Costanso e st’altre figure porche e se ga licensià da Bona Domenega ( o come casso la se ciama!)... - Basta, insulti, sigamenti, sparolasse onte e spuaci inte muso! - el ga dito - me sò stufà!!! - Benfato, orco zio!!!!... No se ghe ne poe più de inbessili che siga tuti insieme che no se capisse un casso, subret che no sa gnanca dove che le ze, ospiti da sbochi de sangue... Domenega in studio ghe gera anca do oche (palmipedi)... Beh le ze quele che ze stà le più serie... Solo infine ghe ze vegnù el scagoto (par forsa) e le ga schità co noncuransa in studio... Chissà che domenega prossima in studio i portà do vache (quadrupedi) e un paro de mussi (senpre quadrupedi)... Se inalsarìa un poco el livelo inteletuale dela trasnission... Intanto le subret ogni tanto dovarìa controlarse el dadrio: prima o dopo ghe spuntarà le pene, pardio!!!
Questi ze par Lippi
LEGGI I COMMENTI (6)
-
PERMALINK
giovedì 2 novembre 2006 - ore 18:23
UN FIA’ DE RELIGION NO GUASTA!
(categoria: " Pensieri ")
Priorità
In ciesa inzenocià davanti al’altare magiore, poco distante l’uno dal’altro, ghe ze do siorati che parla col signor Dio:
- Te prego, - se lagna el primo - dame na man... fa che cata fora i schei par farme na casa nova!
Quelo darente speta che st’altro gabia finìo po’ taca:
- Jutame anca mi - el fifota - gò urgente bisogno: fa che cata fora i schei par pagare l’afito... Me racomando, sò sule to man! -
A sto punto el primo sior salta in piè intavanà, furega in scarsela, tira fora dozento euroschei e ghe li sgnaca in man.
- El ciapa qua e el vaga fora dai piè che Dio desso ga da darse da fare par mi e no ga tenpo da perdare drio ale so vacade!!!
.jpg)
Comunista sfegatà e sensa el signor Dio... e che pardessora ogni tanto biastema!
COMMENTA (0 commenti presenti)
-
PERMALINK
mercoledì 1 novembre 2006 - ore 12:32
RICORDI DELA SANITA’ DE NA VOLTA
(categoria: " Vita Quotidiana ")
El ricovaro venti ani fa...
Ve ricordeo?: l’entrata in ospedale gera un drama: no i te molava più. Co i guantava un passiente, i lo tegneva drento anca un mese, i lo controlava dala testa ai piè... Ma rajonemo parben in ordine alfabetico e partimo da longo....
Fasemo un esenpio pratico. Na bea matina montando dentro la sinquessento, essendo distrato dala vision celestiale dela Maria Tetona che dala finestra davanti casa tua sbateva i tapei mostrandote do suche da tre chili l’una te te guantavi la portiera in mèso ai oci e oltre a na solene paca te vegneva sù na ruspante gnoca da un eto e mèso in fronte co un picolo tajeto in ponta che butava qualche stitica giosetta de sangue.... Gnoca che co raquanti inpachi de giasso co la zonta de un sentenaro de porchi e resie, in poco tenpo sarìa sparìa par senpre... Ma ti, acorzendote dopo rapida ociada in giro che almanco tre persone te gaveva osservà e se pareciava a ridarte drio, te tacavi fare palco, ramemandoti come te fussi in preda a dolori atroci, sguarandotro el fassoleto onto de sangue.... Pecà che su quela te rivasse in coste el mona de un bigoto semo de Tilio Capeton che ale nove de matina se sentiva in colpa par via ch’el gaveva ancora da fare la so bona assion e quindi te se avvissinava co intenssion altruistiche gravi:
- Mariavergola, carissimo, coss te sito fato??? Te fa tanto mae?... No ze mèjo che...
- Ze mèjo caro Tilio, ahi... ahi... che male... Giuda can sassin,... che te te alontani... parché se dà el caso che me sbrissa qualche porcasso da farte i colpi de sole in testa... Orco qua orco là – te tacavi ti.
- Fratelo, - eco saltare fora de bota l’istinto missionario - parché biastemi cussita??? Ma lo sai tu giovine ateo porco e miscredente, che Dio è morto in crose per noi?.. E tu lo ofendi???
- Ah, sì???... El ze morto?... Toh, varda ti!!! Nissun me gaveva avertìo de sto gravissimo luto... Semo sicuri che no le ze ciàcole??? Comunque poe éssare ch’el ze morto in crose, ma credo ch’el no gavesse assolutamente ciapà na sportelà in mezo ai oci... Quindi ne deduco che le no se poe paragonare assolutamente le sofferense e mi pa cui me sento autorisà a porchesare a mio piacimento... Comunque me fa un male can....
- E te credo che te fa male... minimo ua se ga formà un crepo de chissà quanti sentimetri... Ze m,èjo che te mena al pronto socorso..... – balbeta Tilio spasemà, che ormai ze andà fora cole oche – poe sucedare de tuto: traumma cranico, comossione cerebrale, ictus, aneurisma galopante acuto, meningite, cefalea, coma, coma profonda, morte cerebrale, morte totale, rigor mortis, putrefassion...
- Senti maledeto portasfiga dela madona, se no te te cavi datorno... ahi...ahi... che tega sul sono... al pronto socorso te ghe vè ti. Parché tra trenta secondi te sgiavento na cricada in testa che te sparpano i sarveli nel ragio de metri 500... ciaro???....
Ma gnente da fare. Tilio te la mena cussì tanto torno co i ris-ci de na paca in testa che dopo diese minuti te te catavi drento la so Prinz mile co el fasoleto bianco liga sul speceto in corsa ala spaventosa velocità de setantado chilometri orari verso l’ospedale de Camposampiero (essendo mi de sto paese farò ben la publiità al me ospoedale)
Intermezo storico
E qua ze utile fare na premessa inportante. Sirca venti ani fa dei siensiatti altamente spcialisà ga inventa la TAC machina tipo lavatrice par vardarte drento el corpo umano (la sigla vol dire “tomografia assiale computerizzata”... digo mi gera proprio el caso de mètarghe un nome del genare?.. No se podeva miga ciamarla che ne sò “Machina par fare i raji”?...
- Ciao Toni indove vai cussì inbachiato?
- Caro Bepi vago in ospedale: me fasso na tomografia assiale conputerizzata...
- Ostia???... e zela na malatia grave???
- MONA!!! I ze i novi raji... ignorante che no te sì altro!!!
- Ah sì, bon pro te fassa!.. comunque visto che te vè in ospedale va anca dal’urologo e FMIC...
- E cossa vol dire???
- Fartelo métare in culo!!! Te saludo sapienton...
Eco. Bon. Tornando in tema co ze stà inventòà sta màchina i dirigenti del’ospedale del me paese ga taca pestare i piè par tera, piansare par i cantoni parché i voleva a tuti i costi sta novità, ma la Rejon no voleva darghela parché i ritegneva che no ghe ne fusse el bisogno... Ma i Dirigenti, che no gera mone, cossa gai tacà fare?... I ga creà el bisogno: ogni uno che vegneva ricoverà gaveva urgente bisogno de farse na TAC... Gavevito el scagoto?: urgente TAC al buso del culo... Bota in testa da matarelata muliebre ale tre de note?... sospeta fratura del’ocipite: urgente TAC sui sentimenti..... Tosse, gataro, e frebre a 37,1? TAC ai palmoni, bronchi e ditorni... Pissavito par storto? TAC al’ucelo.... e via de longo... E sicome che la TAC a Camposampiero “nun ce stava” l’ospedale organisava dele belissime gite a Isola Vicentina nel’ospedale dela quale Isola che invesse ze in teraferma ma no gavarìa parso bon ciamarla “Teraferma Vicentina” ghe gera na belissima màchina nova de balin co petà el so tennico pronto al’uso... Tuti i soba na coriera carica de malai festosi se inviava verso Vicensa co fermate obligatorie in ristorante e al Saltuario ala Madona de Monte Iberico... Tuto a spese dela Rejon....Infati visto che el viajo gera gratis ghe gera i pensionati che se inboscava in coriera tuti travestìi da malai, col pijama a righe e el so bel catetere inpirà sul cicio, par na sana giornada de festa. Co TAC in omagio.... Dopo un paro de ani de sta tiritera la Rejon se ga roto sinbolicamente i cojoni e ha cronpà la TAC par Camposampiero... Cussì visto che bisognava continuare a dimostrare che la màchina misteriosa serviva via co esami a nastro: infarmieri, inservienti dele pulissie, morti tirai fora dal frigo de scondon, parfin pantegane e gati ramengoni. Tuti in fila par farse un gireto drento el maledeto oblò... Passà n’altri do ani se ga roto i cojoni tuti: medeghi, dirigenti, passienti e desso par fare na TAC bisogna prenotare sie mesi prima....
COMMENTA (0 commenti presenti)
-
PERMALINK
lunedì 30 ottobre 2006 - ore 17:03
ONCO’ CULTURA A SBREGABALONE!
(categoria: " Vita Quotidiana ")
Berlusconi: tanti dise che el ze basso: no ze vero. Come nano el ze sula media!
Bigamia: tentativo de risolvare un problema creandoghene n’altro
Biscardi: più me spiego, manco me capisso!
Guinzaglio: toco de corda che parmete ai cani de menare in giro de baucon le vecete
Lapidare: rinproverare co le piere
Logica: casa mia ze piena de formighe parché nissun ze sta bon de inventare preservativi picolossimi!
Lupara: calcolatrice del mafioso
Matrimonio: duelo a cornade
Mèdego specialista: uno che ga fortemente ristreto el canpo dele so incapacità!
Ossio: el più economico e riposante dei vissi
Pedone: omo che ga na màchina ma anca un fiolo de disdoto ani!
Peocioso: quelo che denuncia la "miseria stabile", finisse i schei e vansa un poco de mese
Sior: quelo che denuncia la "richessa mobile", finisse el mese e vansa un pochi de schei
Riflession: ze vero che la paura fa novanta, ma me nono ga tacà strénzare le ciape a sessanta!
Ronchesamento: l’ùnica vera musica da càmara
Ronchesare: dormire a alta vosse
Suicida: un depresso che ga pressa
Urologo: mèdego che pensa senpre ai cassi dei altri
20 anni: el vien duro par gnente
80 ani: no’l vien par gnente duro!
.jpg)
Ve ricordeo el mitico Stefano Chiodaroli che a Colorado cafè faseva un mona de fornaro che sigava PIERAAAA?... dopo aver fato calcossa insieme a Borgorico un ano fa, se gavemo catà in un spetacolo dove lavoravimo tuti e do e gavemo fato di ciacole... Proprio un toso sinpatico e forte!
LEGGI I COMMENTI (1)
-
PERMALINK
domenica 29 ottobre 2006 - ore 20:21
COMPLIMENTI VALENTINO!!!
(categoria: " Sport ")
Valentino Rossi ze cascà... e col tonfo ze sfumà el sogno mondiale... Però me ga piasso el comportamento de sto canpion che col soriso ga amesso de avere sbalià e che ala fine dea gara ga streto la man al vincitore. Un bel esempio de spirito sportivo e de tanta tanta inteligensa... St’ano no’l sarà Canpion del Mondo ma sicuramente el ze un Canpion de Coretessa .... Bravo!!!!
LEGGI I COMMENTI (3)
-
PERMALINK
sabato 28 ottobre 2006 - ore 17:47
TOH CIAPA, NA BARZELETA IN OMAGIO!
(categoria: " Pensieri ")
In spiaja
Caorle diese de matina in mèzo a na spiaja incalcà, fodrà de zente. A un serto punto sonà un telefonin. Un sior lo guanta e risponde:
- Pronto chi parla?
- Amore sono me... ho apena visto un anelo belissimo co diamante... costa diesemie euroni.. posso cronparmelo, amore?
- Serto cara, cronpa pure, che problemi ghe ze!!!
- Grassie tesoro.. te sì un amore... e podarìa anca cronparme la màchina nova?.. go visto na Alfa scapelotabile che ze un bigiù... la costa solo ventisinque mila euroni... Me la regalito???
- Ma serto tesoro... par ti no conosso limiti... cronpala pure e meti in conto!!!
- Te vojo ben, caro... e visto che ghe sò, posso rivestire i sedili dela màchina nova co un paro de peli de liopardo?... le costa solo sinquemila euroni!!!... Posso, micio belo?
- Cara, cronpa tuto quelo che te piase... no stà gnanca dimandarme!
- Grassie amore... te amo folemente... grassie... ciao tesoro!!!
- Ciao cara, se vedemo!!!
El sior stua el telefonin, se varda torno e taca sigare:
- Scusè... scusè.... di chi zelo sto casso de telefonin?
LEGGI I COMMENTI (3)
-
PERMALINK
> > > MESSAGGI PRECEDENTI
[ SONO OFFLINE ] 