Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27794 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
martedì 9 maggio 2006 - ore 17:51
CORSO PRATICO DI SEDUSSIONE PER MASCHIETI
(categoria: " Università / Scuola ")
Bongiorno. Sicome che ormai gò na solidissima esperiensa come cucadores gò deciso de metare a servissio dela gioventù maschile tuto el me sapere onde inparare la nobile arte dita anca volgarmente "ars amandi"... El corso se svolgiarà in più puntate... Oncò publico la prima... Bon pro vi facia!
Lessione numaro 1
Quando un tosatoto decide de ‘ndare a tose ga da pareciarse in modo parfeto, preciso e seguire raquante norme inportanti. La prima ze quela de lavarse, overo farse el bagno. Questo par via che sono da mone nonché da loamari presentarse da na tosa co l’intension de na pomiciada estrema in odor da stala o da moltrin (spussa tipica veneta: tanfo o spussa da vaca, da loame co na pontina de suore vecio e da freschinasso). El bagno ga da èssare scrupoloso: se no gavì la vasca usè pure el masteo da lissia. Se taca rassando co cura la rufa, formà da ani de intenperie drio le rece e sule rughe del colo, pò se passa a cavarse le croste sula schina e sula pansa. Atension al bunigolo: cavare le balete de lana che se forma de continuo, inpirare un deo drento e po’ sminciare parben. Subito dopo l’inportante operassion toca al’aparato idraulico nonché riprodutivo. Dopo na energica lavada evitare de metarghe sora aqua de colonia penale o Aqua Belva Niu Uiliams: le brusa ala maledeta e ve farìa incagnire el pistolino cussì tanto che in caso de urgente pissada ve tocaria tirarlo fora dale braghesse usando un piron... Eco. Lavarse co cura anca le pupole e i sgaritoli, (deti anche “schinchi”) brocolarse le ongiasse dei piè, controlare e eliminare eventuale rufa o onto tra i deati... Ala fine, rapida sugada, spargimento par el corpo umano de sborotalco parfumato e l’operassione lavagio ze finìa. Sfatemo subito na cradensa popolare: in canpagna se costuma lavarse na volta al setimana: al sabo de sera, prima del raid in ostarìa. Dal me punto de vista sarìa poco, ansi pochissimo: credo che na persona che vol savere da bon dovarìa lavarse più spesso... Quanto?: disemo na volta ala setimana più n’altre quatro sinque volte al’ano, quando se nota che datorno no gira né mussati, né sansare, ne parenti e amissi....
LEGGI I COMMENTI (4)
-
PERMALINK
lunedì 8 maggio 2006 - ore 09:06
DELA MORTE E I SUOI DERIVATI ( roba alegra!)
(categoria: " Riflessioni ")
EL FUNERALE
Una dele secature più grande, osarìa dire na rotura de balote mondiale, ze ‘ndare al funerale de qualche pesseudoconossente o de qualche ignoto parente ala longa. E questo par dei validissimi motivi: uno, parché le cerimonie funebri ze de norma longhe, barbose da sbregarse la boca a son de sbadili; do, parché del morto no ne frega na tega essendo quasi un ilustre foresto; tre, parchè nela miliore dele ipotesi se perde mèsa giornada de lavoro o, nela pegiore, mèsa giornada de cacia o de pesca. Oribile sacrilegio questo! Normalmente la ferale notissia dela dipartita del desgrassià individuo vien dà dala fedele (?) mojere fin che ze drio tacarse desperatamente al piato incalcà de pastassuta:
- Ieri ze morto dopo gran soferense Tilio, poro can! - buta là la fèmena continuando a frugnare acanitamente co la testona drento el forno (che par desgrassia ze stuà).
- Ah, sì? ... el se gavarà desmentegà de tirare el fià sto àseno... comunque bon pro ghe fassa!!!
- Ciò, salvàdego che no te si altro!?! Quante volte go da dìrtelo de no schersare co i morti? Te lo sè che me fa fastidio!... e ti te fè aposta!
- Smétila di dire monate: l’unico Tilio che mi conosso ze un serto Tilio Regolo che ze sta sgiaventà, par via de un scherso da prete, zo da un monte de rodolone drento un caretelo da tre etolitri fodrà de ciodassi da murari: col ze rivà da cao el pissava sangue a butaroto e el gera sconsolatamente cadaverizà. E io sofro imensamente al pensiero che i Romani (o i Cartaginesi?... boh!) ga orendamente sassinà un onesto caretelo... ma no credo che il signor Regolo vegnà tarà sti giorni...
- Te sè indove me péto el to Tilio Regolo: mi parlo de Tilio Sepolina el fradelo de un cugnà dela mojere de to cugin de quinto grado Toni Asma...
- La cosa, mia cara, me fa un bafo grando senpre: tu sai quanto mi stano sui peri umani i parenti streti par no parlare de queli larghi... In più smétila subito: sono dietro mangiare e tu mi cianci di morti, defunti e cadàvari putrefati... la roba mi fa afano...
- Infati ghe la molo subito. Prima però te averto che ti doman ale quatro te sarè in ciesa a Tranbache, in prima fila, co la barba fata de fresco, co el vestito da festa e la gravata!
Putana bestia, questa no po’!!! Proprio par doman gavevi prenotà na mèsa giornata de ferie par ‘ndare pescare co Bepin Tega e desso par colpa del’incossiente e iresponsabile semo de Tilio, che ze ‘ndà morire proprio nel periodo mèjo de pesca ala trota, el programa ris-cia de ‘ndare a putane. Alora serchè desperatamente na scusa a casacio. La prima che vien inamente:
- Cara mi sovviene or ora che doman sò inpegnà: go promesso a Bepin Tega de conpagnarlo al Saltuario dela Madona de Monte Iberico. El ga da portare un candeloto da quintale par via che la Madona si sono ocupata disinteressatamente del suo figà che desso no ghe fa più male. Un gireto in saltuario me farà ben anca a mi. Ansi pensavo de tornarghe anca la setimana che vien... Me dispiase tantissimo par el poro Tilio che Dio lo acolga a sè tra li angeli e arcangioli gabrieli...
- Ah, go capìo... te ghe da ‘ndare a Monte Berico: par quelo uncò te ghe messo in màchina la cana da pesse, i stivali e el bussoloto dele larve... Vergogneve, porsei de blasfemi che no si altro!!! Anca la Madona i tira in mèso par covèrsare le so busìe!!! Desso telefono mi ala mojere de Bepin e ghe conto tuto... te vedarè che lavada de testa dela madona che el se ciapà anca lu.... Altro che Santuario!!!
A sto punto se afacia ala mente do solussion: la prima più istintiva ze quela de guantare un corteo da becari, fare un salto cofà un lievore da copi (leggi “gatto”) e eseguire na desina de busete sula pansa dela dona, la seconda ze que de trovare na strategia bona de rispóndare al teribile quesito: come sfugire co onore ala cerimonia scassacojoni?
El tormento
Dopo tanto pensare, scapatoie ghe ne ze saltà fora poche. Escludendo a priori l’omicidio dela mojere, l’unica solussion ze quela che almanco na volta nela vita gavemo sperimentà tuti. Overo quela de ‘ndare al obitorio, segnare el nome sula lista dei partecipanti, caminare de lilon co le man drio la schina e l’ocio aflito de qua e de là e pena che se presenta l’ocasion favorevole tórsela de scanpon e ‘ndare casa sua de Bepin Tega (nel caso in question). Opure, par avere un alibi ancora mèjo, conpagnare el cadàvaro fin davanti a la ciesa, riscrìvare el nome da novo (sensa mai métare schei nela scatola dele oferte però!) entrare in ciesa vissin ala porta e pena cumissià el pistoloto eclesiastico, tacare sbolsegare come un cavalo marso i palmoni par un boni sinque minuti po’ vardarse torno e slargare i brassi come par dire: - Ma varda che qualità de lavoro! Proprio sul più belo che tacavo divertirme me toca ‘ndare fora... poro Tilio che desgrassia! - e fetonare a l’aperto alsando i oci al cielo come par porchesare somessamente. Eco, questa ze l’unica solussion bona. Purtropo dele volte sucede un inconveniente. Fin che si drio scrìvare el nome ve sentì bàtare sula spala. Ve girè e chi gavìo davanti? El mona de un pacioloso acuto, senpio patoco, più petente dela pégola de Marieto Penola dito Culatina dala parte più fineta del popolo e Rotoinculo da quela più boara ma più sincera...
- Varda chi che se vede? Sito qua anca ti par conpagnare Tilio poareto de Dio?
E a ti te vegnarìa voja de rispóndare:
- No, gero de passajo e avendo voja de farme quatro sganassade, me sò fermà qua. El me pare el posto più giusto de tuti, porseo Giuda can!
Invesse te toca farghe segno de sì co la speransa che el mona, vedendo che no te ghe nissuna voja de dialogare, se la toga in pressa... Invesse Marieto te guanta sotobrasso e te conpagna in mèso ala zente che ve varda soghignando. Ve toca sorbirve la storia de l’agonia de Tilio za mèso marso do dì prima de defungere, la descrission del figà putrefato dopo l’autopissia., la desperassion dela fameja. In più vegnì informà che Maria Bissa ze na grandissima putana e che la presta la frìtola come che la fusse un vangheto e che Toni Bugansa dito Broca Mola, par via del’età, ga perso la dentiera drento el buso del cesso. Dopo un quarto d’ora co le bale rasotera e la consapevolessa che il dì drio sarì par tre quarti del popolo “un gran culaton” ve trovarì drento la camareta mortuaria a amirare Tilio che za gera orendo da vivo figuremose da cadàvaro!. (Secondo i comenti dei intimi “pare che el sia contento” ansi “pare che el rida” “el ze belo che no sò’”, “no’l pare gnanca morto” “pare che el dorma de gusto” “ el ga un bel colorito però” e altre vacade mostruose in sorte). Dopo el classico ma vergognoso “corajo” e “bisogna ‘ndare vanti” ala vedova sperè in na indecorosa fuga e serchè de mandare Marieto da qualchedun altro disendo :
- Varda che ghe ze anca Tulio e Jani.... quanto ze che no le te li vedi?
Invesse gnente: Marieto ve tien fisso sotobrasso e continuerà a blaterare semense durante tuta la messa solene (un’ora e meza de tortura pissicologica), nel percorso fin al simitero e relativo sgnacamento dela cassa inte la busa. El ve molarà, el fetente schifoso, ale sete e mèsa davanti casa sua visto che el gera a piè e ve ga tocà conpagnarlo casa in màchina co la solene promessa:
- Ghe ze anca Gigeto Scartosso in ospedale co un càncaro sui palmoni drio tirare el segon: se vedemo al so funerale!!!
Na roba che ve consola ze la regola religiosa che dise che so sti casi speciali el càmio e rimorchio de porchi e resie mute che gavì tirà vegnerà divise equamente e scrupolosamente par metà... e alora... porco qua e porcasso là... bècate anca questa in omagio!
LEGGI I COMMENTI (4)
-
PERMALINK
sabato 6 maggio 2006 - ore 12:56
RIVELASSION SUL MONA DE LUCA GIURATO
(categoria: " Riflessioni ")
Come tuti sa (e chi no sa ze ignorante e ga da informarse!) el giornalista (?) Luca Giurato deto l’Ingiuriato o anca el serial kiler dela lengua italiana, ze uno dei ospiti fissi de Striscia la Notizia dove i autori gode come mas-ci portando in video le cagade linguisto-leterarie de sto senpio... Adesso ze drio studiarlo na equipe de siensiatti de chiara fama: par el 50% el ze dis-grafico, par st’altri 50% el ze dis-lessico... Erate entranbi signori erate: Luca Giurato ze molto più senplicemente DIS-GRASSIA’!!! Che Dio lo spolpa!
COMMENTA (0 commenti presenti)
-
PERMALINK
venerdì 5 maggio 2006 - ore 16:12
ORORE: I ME GA DENUNCIA’!!!
(categoria: " Lavoro ")
Giuda can che tronbada!.. durante la canpagna eletorale me ze sbrissià de dire che Butilione ze un testa da minchia... oncò me ze rivà do denunce. Una par diffamassion e una par divulgassion de segreto de stato!!!
LEGGI I COMMENTI (4)
-
PERMALINK
venerdì 5 maggio 2006 - ore 13:42
EL KIT DEL OTOMOBILISTA VENETO!!!
(categoria: " Scienza e Tecnica ")
Che rassa de testa goi, porsea canaja: varda qua... go inventà e stanpà el primo kit veneto par l’otomobilista dela storia. 8 cartelini da tegnere in màchina par ofendare i mone e i i teste da casso che no sa corare par la strada. Considerassion teribili, insulti da sbochi de sangue da petare sul tergicristalo del nemico che te ga pena roto le bale... Ghe ne ze par tuti i gusti: par chi no sa parchejare, par chi core pian, par chi te strissa la màchina, par chi pare pagà par scassarte i ovi... Va ben... ve ne mostro un paro!!!!
COMMENTA (0 commenti presenti)
-
PERMALINK
giovedì 4 maggio 2006 - ore 14:27
E DESSO COSSA FASSO?
(categoria: " Riflessioni ")
Ieri sera gò visto el me capo spirituale nonchè amigo carissimo Moreno Morello, inviato de Strissia la notissia, farse belo in mézo ad un s-ciapo de gajardi giovinoti totalmente smudandai... Me ze sorto un dubio atroce: vuto védare che la nostra storia d’amore ze drio finire?.. e questo par quatro slandroni co la bataria esposta al dolce venticelo primaverile???.. mai sia deto.. anca parché senè mi me buto a pesse tra el noto duo de stilisti Dolce & Gabana, nativi de Sodoma e Gomora... (me buto sì, ma armà de potente guantiera de peltro a difesa del nobile deretano)... se voì controlare de persona andè nel sito www.striscialanotizia.mediaset.ii alla vosse video Moreno Morello
.jpg)
Publico, co la morte nel core, na fotosomeja esclusiva de mi e Moreno quando el nostro amore pareva eterno... Come podì védare dala foto gero anca in dolce atesa... al quinto mese de gravidansa par la precision!!!
COMMENTA (0 commenti presenti)
-
PERMALINK
giovedì 4 maggio 2006 - ore 12:28
LARGO AL NOVO POETA!
(categoria: " Poesia ")
Me dimanda un picolo spassieto el poeta ruspante ed agricolo Jacomo Leopardo il quale sarìa contento de védare su sto bel spassio na so recente conposission... El Leopardo me domanda anca na opinion... Rispondo co mna potente metafora: "Serti poeti ze cofà la Euchessina... anca in picole dosi i fa cagare!!!" Ciao???
Dona malvagia e rufaldona
se stai sita e soratuto bona
io mi snanaro sula tua tetarìa
e chiapo sono cofà na socata de gazìa...
Mi insogno, mi rameno, e russo
pì in pressa de on musso...
Ti anelo, ti desidero, ti bramo,
e forsanco ti amo...
Ma se tu salgara, vilana, zoticona,
ciaciari e tarochi ala bojona,
ti sgiavento na gran pelà sui dentoni
parchè mi scassi i pistoni...
Dona villiaca e insemenia
con ciò la poesia ze bela e finìa!
Par la cronica sto mona qua ze Jacopo Leopardo
LEGGI I COMMENTI (4)
-
PERMALINK
martedì 2 maggio 2006 - ore 13:50
LA GENETICA A SERVISSIO DEL POPOLO (BESTIA)
(categoria: " Riflessioni ")
El conte Nane Fraca nato Spenzi De Pressa Marchese de Vilarasso, me ga invià sta foto indove posa co smisurato orgolio darente el fruto de potenti incalmi agricoli: el “Panocion”, overo na panocia de saturco de 87 chili de peso e 1,68 cm dal culo ala ponta e 1,68 dala ponta al culo. Quindi de 3,32 metri lineari de altitudine.
Lo gò ragiunto via cavo e ala me domanda:
- Sior Conte, cossa penselo de farghene de raquanti subioti del gènare? – el nobile blasonato me ga cussì risposto: - Penso de ficàrgheli sù par el dadrìo ai giornalisti che fa dimande èbeti come sta qua... Ghe li darò da magnare al polame, o in alternativa democratica farò dele polentone da quintale!... Cossa vuto che ghe ne fassa, mona che no te sì altro!!! -
Ehmm... Intanto el primo esenplare ze stà magnanimamente regalà a Busiago Vecio e co na cerimonia comovente (tuti i agricoli in in tenuta di gala - qualchedun anca di “gallo”) ganno fatto il “present-sappa" (alsando tuti insieme l’umile atresso al cielo) ze stà subito piassà in centro ala piassa del popoloso vilagio al posto dela misera pianta de saturco de fero, storico vanto del paese. Purtropo però el novo monumento ga fato la so prima vitima inocente: el macaco de un mona de Tilio Savaton che ale tre de note tornava casa inbriago come na cioca, se ga smaltà dosso in motorela, fasendo svolare pararìa grani de saturco, denti, rondele e vide dela moto... Portà al Pronto Socorso de Padova al bon omo ghe ze stà cavà na manopola del manubrio dela moto dal’intestino finale (legi “culo”)... Par la nota lege dela “par conicio” anca Tilio ga cavà calcossa: tremilasetessentootantado porchi e biasteme misti in sorte...Ecco cosa vuol dire essere maleducati e porselli di fondo!!!
Eco la foto storica del Panocion (a sanca dela someja)
LEGGI I COMMENTI (2)
-
PERMALINK
lunedì 1 maggio 2006 - ore 10:44
INTIVA CHE LAVORO FA LA SIGNORA!!!
(categoria: " Pensieri ")
LEGGI I COMMENTI (2)
-
PERMALINK
lunedì 1 maggio 2006 - ore 10:37
EL ME NOVO AMIGO
(categoria: " Vita Quotidiana ")
Ze co estremo piassere, goduria monumentale, che ve presento el me novo amigo de colore (scuro), tale Bongo Burundi dito "Ula balula Uh Uh Uh" par dimostrarve la me finessa de animo... Infati mi, stupendo esenplare dela rassa piave (come ga dito na volta un mona) sò altamente demoniocratico, aplico "privaci" e "par conicio" e no ze gnente vero che stando al Nord (quindi sò un nordico) odio el sud (quindi i sudici)... a mi infati la Sicilia piase tuta un pasto ("pranzo" in italian) paesagio, clima, naranse, mari e monti... l’unica roba che me stà pesanntemente sui cogioni ze i siciliani... Anca parchè sti qua forsa de sbarare i ga provocà inquinamento da pionbo ovunque... almanco i sbarasse co le lupare catalitiche sti aseni!!!
El sogeto in question in Africa ze notissimo cofà cantante... el se ciama El Smolegiato 2
COMMENTA (0 commenti presenti)
-
PERMALINK
> > > MESSAGGI PRECEDENTI
[ SONO OFFLINE ] 