Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27789 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
martedì 28 aprile 2009 - ore 16:30
SE TORNA A "STRISCIA LA NOTIZIA"
(categoria: " Lavoro ")
Eh sì stasera, se no i canbia al’ultmo el palinsesto, va in onda el 27° servissio che go girà co Moreno Morello el gran capo bianco... Na picola parte come spala ruspante par la solita trufa come tante... Girà a Verona poco tenpo fa... e desso ecove na barzeletina nova:
La barzeleta: “L’uomo che sussurava ai mussi...”
Un contadin ga un musso vagamente depresso, che ga poca voja de lavorare e ze senpre co l’ocio basoto, che fa pecà védarlo. Sto omo ghe conta el bàgolo a so amigo Toni che ghe dise:
- Se te voli el musso più alegro ghe penso mi! - e dito fato el ghe dise do paroline su na recia e el musso taca rìdare de gusto. Passa un mese ma Bepi, el paron del musso, va da Toni:
- No ghe ne posso più... Desso el musso ride de continuo e el me fa afano... Ti te ghè conbinà el dano e ti te lo sistemi!!!
- No stà preocuparte - risponde Toni - desso vago in stala e te vedarè che lo calmo subito. Ti però spètame qua... - Difati Toni va in stala stà drento pochi minuti e vien fora col musso che pianze a tonfon.
- Ma... ma... spiegame un poco come che te ghe fato, prima a farlo rìdare e desso a farlo piànzare.
- Fàssile caro, fàssile: par farlo rìdare ghe go dito che gò el cicio più longo dela suo ....
- E par farlo criare? - interonpe Bepi
- Ghe lo go fato vèdare...
LEGGI I COMMENTI (1)
-
PERMALINK
lunedì 27 aprile 2009 - ore 11:18
RAJONAMENTI DA MANICOMIO
(categoria: " Pensieri ")
Diretamente da Radio Maria (la radio più soporifica che ghe sia!)
PADRE LIVIO (dito Pare Livido) diretore de cotanta aradio ga dito chel:
TEREMOTO IN ABRUSSO LO GA MANDA’ DIO PAR COINVOLGERE PIU’ PERSONE NELA SETIMANA DELA SO PASSION...
Berluscono ga subito risposto cussì:
NO E’ GNENTE VERO, CRIBIO, MI NO GO’ MANDA’ GNENTE A NISSUN... CASO MAI SARA’ STA SATANA (legi: FRANCESCHINI)!!
RIFLESSION RELIGIOSA:
Nel Vangelo ze scrito che Dio da da magnare ai passeri... Se invesse el dasesse da magnare più passera ai osei sicuramente in ciesa ghe andarìa tanta più zente!!!!
LEGGI I COMMENTI (3)
-
PERMALINK
domenica 26 aprile 2009 - ore 18:56
EL MESE DE MAJO INTEL ME CALENDARIO!!!
(categoria: " Vita Quotidiana ")
OROSCAPO POLITICO
A cura del futuro deputato Teofico Mario del Partito Democratico a 360° (destra, sinistra, centro tuto conpreso)
Nel caso de me giusta elession prevedo: (par i pensionati) alsamento a rasso dele pension, abassamento dela pression, invesse de nove elession nove eression, cateteri, papagali e padele a pressi mai visti. Casse da morto in mogano in omagio par chi defunge el primo mese de pension… Par i lavoratori: poco lavoro ma tanto stipendio, ferie a nastro, certificati falsi de malatia e invalidità permanente (ma anca messa in piega) agratis par tuti… Inoltre vegnarà considerà malatia invalidante anca la “poca voja de far ben”. A Napoli, unica cità europea sensa un quartiere italian, vegnarà davà un sussidio mensile a tuti come anticipo su future calamità naturali… In caso invesse che mi no vegnesse eleto ve consilio a tuti de cronpare un tubo gigante de vaselina, parché prevedo invesse della “messa in piega” na “messa in altro e più delicato posto!”
EL CONSILIO MATRIMONIALE
A cura del pluriseparà Nane Brutocao dito El Strassamudande
Dormire in càmare separà, magnare ognun par conto suo, andare in ferie in posti tra de loro essi ale antilopi, avere na casa granda in modo de incontrarse el manco possibile.. Tuto questo juta tantissimo a tenere in piè el matrimonio!
LA NOTISSIA CLAMOROSA DA NAPOLI!
A cura del giornalista Vasco Resando
La compagnia aerea “Svolandopararia” comunica che a causa de na inprovisa giornata de lavoro proclamà dai piloti Anpac el svolo dele 20,45 Napoli-Parigi partirà davero ale 20,45 e aterarà proprio a Parigi!
LA BARZELETINA IRISPETOSA
A cura de N.N. (questo oltre che mona el ze anca viliaco)
Esame de matematica par diventare Carbonieri efetivi overo Apuntati de primo livelo super… El Maressialo co aria de chi che sa passa tra i banchi osservando a uno a uno i potensiali eroi e se sofferma da uno co la facia da quajo che sua cofà na carogna e che ciucia triste el capeloto dela pena biro:
- Ghe ze calcossa che no, caro esaminando???
- A so in crisi: no so bon de catare el minimo comune multiplo….
- Come??? No posso credarghe!!!... i lo sercava ancora quando andavo a scola mi… Me pare inpossibile che no i lo gabia gnancora catà, sto càncaro!!!
CORSO DE SOPRAVIVENSA PAR L’ULTIMA SETIMANA DEL MESE
Rancurà dal Maestron emerito slandron de Rotanova ( ma zea Rota o zea Nova?)
SARDELE FRITE
Le ze un piato bon da in majo fin a otobre, economiche, fàssile da curare e più fàssile ancora da pareciare. Se ciapa on chilo de sardele, le se cura tirando via la testa verso la parte de la pansa, cussì vien via anche le buele, le se infarina le solite do volte, le se sgorla e le se frise in ojo abondante e de bojo. Na volta frite le se posta su na carta sugante le se sala ben e dopo le se serve co na fetela de limon e na feta de polenta calda o brustolà.
Se podi farve un mutuo podì conpagnarle co na onbra de pinot.
COMMENTA (0 commenti presenti)
-
PERMALINK
sabato 4 aprile 2009 - ore 10:40
ECOME QUA!!!!
(categoria: " Vita Quotidiana ")
Casso, come che passa el tenpo!!!! Tra na roba e st’altra gò squasi sbandonà sto sinparico blog... beh, serchemo de rimediare, va!!!! Come steo??? Tuto ben??? Spero de sì.... Va ben, novità... sò drio lavorare come un musso albanese parché go la fameja ingorda, la zente cria par i cantoni, i politici come al solito ne incula ala grande, e dal Regno dei Cieli el Sig. Dio se fa anpiamente i cassi sui (divini,. ma senpre de cassi sui se trata!)... E mi, mona tra i mone, me toca tirare el careto... Ma tornemo in tema come ga dito el senpio de Tonin Sepa aluna de tersa dopo aver scito meso tema sul banco....
PRESTO TACARO’ UN PROGRAMA RADIO SU RADIO GENIUS co mi ghe sarà Roberto Bellino, colona del programa che portarà tante tante vose divertenti e idee.. El programa se ciamarà ATTENTI ALL’OCO... (satira, umorismo, cultura)... Ze in arivo anca na version novisima del libro MONA.. oltre 120 pagine dedicà a sta parola inportanissima... Novo numaro dela Sganassada in arivo , Calendari 2010 (do modeli in lavorassion... Me pare de aver prodoto bastansa!!! Intanto ve regalo na barzeletona.
A proposito de culo....
Oto de sera il te na qualsivollia ostaria dela profonda (e scura) canpgna veneta. El sior bon da onbre dimanda al barista:
- Osto cane del porcacio passami un quarto de nero! e se lo ciava de bruto... Dopo diese minuti eco la nova richiesta:
- Osto cane dal sacramiento, porco qua e porco là, buttami subito un quarto di nero che gavarebbi sen! e se lo riciava de bruto. Ala mezanote el sior ze pien come un ovo, blatera semense a marteleto fin che el paron del’ostaria, roto le bale, lo guanta par el copin, lo sgiaventa in strada, ghe sbassa braghe e mudande e se lo inchiapeta ala grande.... Sera drio stessa storia:
- Osto viliaco sassino buttami un quarto de nero!- ale oto e zo de seguito, ogni mesaora, co la stessa richiesta fin mezanote... A mesanote e sinque, el sior ze ripien come un ovo, blatera semense a marteleto fin che el paron del’ostaria, straroto le bale, lo guanta par el copin, lo sgiaventa in strada, ghe sbassa braghe e mudande e se lo inchiapeta ala grande.... come la sera prima....
A mesanote e mèsa el sior se avia a ganbe larghe verso la magione.... e pian pianeto riva anca la sera drio: el sior ale oto se presenta in ostaria va al banco e co un filo de vosse dimanda:
- Osto fillio di un cane randaggio, par cortesia pagando mi daresti un quarto di bianco?
Al che l’osto resta di feci (“merda” in dialeto.. e anca in italian se ze par questo!) e dimanda stupìo:
- Bianco???... ma lu, no se beve senpre e solo el nero???? -
- Si caro, mi amo svisseratamente el nero, ma da oncò canbio gusti: passo, co la morte intel còre al bianco: da do giorni el nero me fa un brusore de culo che no te digo!!!!
LEGGI I COMMENTI (3)
-
PERMALINK
sabato 14 marzo 2009 - ore 19:07
FORSE STASERA IN ONDA SU STRISCIA LA NOTIZIA!
(categoria: " Vita Quotidiana ")
Molto probalbimente altro intervento da mona insieme a me cugnà stasera col mitico Moreno.... Speremo ben!!!
LEGGI I COMMENTI (3)
-
PERMALINK
giovedì 12 marzo 2009 - ore 09:53
OH ECO QUA!!!!
(categoria: " Vita Quotidiana ")
Dopo longa e soferta malatia sessuale (cojoni sgionfi al limite de rotura!) torno in vita co tuta l’intension de mandare in mona de so mare vaca tuti i grandissimi ronpicojoni e fioi de na bruta troiassa che ne circonda. Politici come senpre in testa... Dedco a sti ultimi sto articoleto trato fora dala Sganassada ussia in sti giorni. Che il signore sia con voi , dominum vobiscum fiat, renault, opel, aleluja sacramento dio!
SCOPERTO UN NUOVO PREVILEGIO DELLA CASTA!!!
No bastava le màchine blu, i buoni par il ristorante del Parlamento quasi agratis, el tajo dele peociare agratis, i biglieti senpre agratis par i treni, lioprani, metrolepolitane, i buoni par fare i fanghi, i sconti sui mutui, le pension da miliardari, el funerale pagà co cassa da morto de lusso estremo, pare che desso i solerti ministri nonché i laboriosi deputati, al’ato del’insediamento (mai parola ze stà più intivà), gabiano anca un buonus de sirca 3000,00 al’ano (nel vero senso dela parola) par curare le piaghe da decubito che podarìa vegnerghe fora sui lardosi culoni stando massa posai sule presidensiali poltrone. Inoltre senpre dal momento del’insediamento vegnarà fornìa anualmente na svagonà de confession de pomata Luan (quea che fa ben al culo e anca ale man) onde lenire l’ eventuale fuoriuscita de maruele (legi “maroidi”), sempre dai nobili culoni. Inoltre la stessa malatia vien considerà malatia professionale e darà dirito a na pension aggiuntiva de € 2500,00 al mese. Ala protesta del’Arci Gay che pretendeva la stesso trattamento anca par i so iscriti il ministro Antonio Di Dietro precisava: - Ciò non è possibile in quanto i danni subiti dai miei colleghi sono dovuti all’abnegazione e al costante ed imperituro impegno nel lavoro a favore del popolo, mentre quelli subiti dai cul… signori ghei è dovuto all’uso improprio del sedere. Quindi andate a farvi ciavare! – Vi risparmiamo la risposta del’Arcy gay par no incorare nei fulmini dela lege nel caso di pornografia a mezo stanpa!
Dimando scusa; al posto del politico me ze vegnù fora la foto de un lujo-porsello. No fasighe caso. Ze lo stesso.
LEGGI I COMMENTI (1)
-
PERMALINK
mercoledì 18 febbraio 2009 - ore 14:36
PARLEMO DE MONA E DE MONE!!!
(categoria: " Vita Quotidiana ")
Fiducia ben riposta
El Re Artù ga da partire par la guera e prima de pareciarse armi e bagali pensa ben de métarghe na potente sintura de castità ala mojere...
Catà fora l’ultimo modelo a prova de ogni tipo de oseo, anca rapace, Re Artù provede personalmente a mètare soto ciave el pressioso zugatolo personale: fa métare intorno el zavajo ala dona, inciava co tre potenti giri de ciave la seranda trancia-osei e po’, dopo alontanà la femena, pensa ben de ciamare el fido Lanciloto par consegnare femena e ciave:
- Mio fedelissimo cavaliero - dise Re Artù - mi purtropo gò da andare a pugnare, no a ciapare a pugnassi ma intel senso de ciapare a spadà drio ale rece, l’infedele... Parto, mio fido... ma vaggo pugnare co la morte nel core parché lassio quive la mia adorata sposa... Io te la consegno, prode Lanciloto, e a te consegno anca le ciave del lucheto che custodisse la regale bernardina di mia mollie... La lassio a te, parché ti stimo e parché solo di te mi fido... fasso ben??
- Ostia, no ben, mio sire, - barbota comosso Lanciloto - benissimo... io sarò strenuo custode dela puressa dela regina finché morte non mi colga...-
- Benon, cussì se parla. - gongola contento Re Artù - savevo che de ti podevo fidarme; ma desso scolta puito: ti te tegnarè la ciave in scarsela par al massimo diese ani. Se tra diese ani esati no sarò quive ti te des-ciavarè la fritela regale e me mojere, ahimè, sarà lìbara de concederse ale tupi vollie di chichessia... Ciaro?... fra diese ani se no torno, no un dì de pì né un dì de manco! -
- No ciaro, sire - cria Lanciloto – lanpro. Tra diese ani mi sarò qua co la ciave in man... se lu no torna!
El Re inbrassa Lanciloto, ghe consegna la ciave, se sara nela corassa, raduna i omeni e parte par la pugna...
El fa pena ora fare na desina de chilometri quando in distansa el vede na nuvola de pólvare e sente un "Cloppete… cloppete" che se avissina... Dopo un poco el vede rivare Lanciloto su un cavalo tuto spasemà:
- El me scusa, Sire, - el pantesa - ma el varda ch’el me ga dà la ciave sbalià... co questa no se verze un’òstrega!!!
COMMENTA (0 commenti presenti)
-
PERMALINK
lunedì 16 febbraio 2009 - ore 22:53
VIDEO "FILO’ 2009" GIRA’ DA MI SU YOUTUBE!!! DOMA PARTO IN MISSION PAR STRISCIA
(categoria: " Vita Quotidiana ")
Eco qua podì vedare el promo del dvd che gò prodoto su youtube..... Basta dititare la parola "filò".... se sentimo venare... Bona setimana a tuti conpreso el sior Mastron!!!
LEGGI I COMMENTI (1)
-
PERMALINK
lunedì 16 febbraio 2009 - ore 22:50
NOVA RISSETA PAR LE DONE!!!
(categoria: " Vita Quotidiana ")
SEPIE CON PISELI
Ultimo ritrovato dela siensa genetica par agevolare le cosidete casalinghe che no ano né volia né tenpo di stare darente ai forneli; tratasi de piato unico tipico veneto overo “sepe co piseli”.
Il piato se parecia in pressia in quanto basta cronpare solo dele speciali sepe che sono esse le quali onde otenute da una portentoso incrocio genetico. Par farla curta alcuni esenplari del noto e onto pesso invr… ivre.. invrr… orco giuda, sensa ossi, sono stati incalmati col dna di Roco Sifredi.
Da qua è nata un nuovo ibrido: la sepa mas-cio co piselone de sirca diese sentimetri. La genialità sta nel fato che basta andare in pescheria e cronpare almanco venti sepe mas-cio piselate (rassion par quatro persone, calcolando che ognun ghe ne magna quatro… Le altre quatro la casalinga se le inboscarà per altro uso). Co se torna casa basta lavarle ben e métarle in tecia. Finora pare che el prodoto sia drio otegnere grandi consensi de publico soratuto nele fameje de sole fémene e in quele dele copie ghei. Co sto prodoto ze stà osservà anca un sparagnamento sul consumo del gas in quanto i consumatori ama cusinarle poco in modo che le resta bele dure… Soratuto i piseli!!!
COMMENTA (0 commenti presenti)
-
PERMALINK
venerdì 6 febbraio 2009 - ore 11:22
TORNO CO NA NOTISSIA FRESCA FRESCA!!!
(categoria: " Vita Quotidiana ")
Ieri ale ore 19,00 poco sù poco zo, il noto prelato Don Sante in forse al Nasocomio di Camposampiero come primario in medesina del’ànema catolica, è stato ricoverato d’urgensa urgente in quanto colpito da teribili cognati di vomito di stampo gravidico.
Tali cognati erano cussì intensi e fruto di incredibili sforsi che il poro prete è parfino andato in afano.
Quando è ravegnuto ci ha racontato l’incressioso e dramatico episodio che li a procurato il malessere.
Don Sante, come da consuetudine, ale ore 18,40 stava efetuando una visita romano-apostolica presso i decenti del reparto Medicina Acuta al 3° piano del sudeto Nasocomio.
Par la precisione si era apena sentato da cao del leto di tale Contessa Marina Lipa di Moana, nobildonna blasonata di otantasete barete che lo informava del suo ricovero par curare le zenzive che erano purtropo sul marso e forsanco sul putrefato. Chiachierando del più e del manco il noto eclesiastico, tanto par fare calcossa, ogni tanto chiappava da una scodeleta che era posta sora il comodino una nosella tostata che si sgramolava di gusto…
Come tuti sanno una nosella tostata tira n’altra nosella tostata e cussì il santo uomo in poco tenpo aveva svodato la famigerata scodela.
Vegnesta l’ora di acomiatarsi (per andare a catare la morosa) Don Sante saludava la vegliarda, la omagiava della apostolica benedissione e prima di alontanarsi le diseva:
- Scusi sa siora Contessa, se io chiachierando con lei mi sono aprofitato dele sue noselle. Domani, co torno quive, liene porto un sachetino. D’acordo???
- No si preocupi ecelensa, - gaveva risposto la contessa - lassi stare: come le ho già deto io sono quive ricoverata per curarmi le zenzive che sono fodrate di assessi marsi… No posso magnare quasi gnente. Si figuri le noselle!: riesso solo a malapena ciucciare la cicolata che ganno da torno e poi le meto là su quela scodela che sono sul comodino!!!!
LEGGI I COMMENTI (2)
-
PERMALINK
> > > MESSAGGI PRECEDENTI
[ SONO OFFLINE ] 