Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
domenica 20 agosto 2006 - ore 19:49
LA FAGOLETA ISTRUTIVA
(categoria: " Riflessioni ")
LIBERO ADATAMENTO DELA FAGOLETA PAR BOCIE MONE : I MUSICANTI DE BREMA trasformà par l’ocasion: I MUSICANTI DE SANREMO
Ghe gera na volta on musso vecio e rincojonio che, ritegnendose on cantante, invesse de produre tirava la boca tuto el di ronpendoghe le bale al paron, rude agricolo, che cussì gaveva pensà de sbararghe in coste par far finire el tormento...il musso però si gano inacorto e gano deciso de ‘ndare a Sanremo a tentare la cariera de cantante ( a Sanremo ghe ze el mandolon de Pipo B. meneger astutissimo quanto facia da mona che fa la cernita dei cantanti pì ebeti da far ragliare in mondovisione quindi il somaro ci stava come il calcio sui culatoni*
Cussì el musso si gano inviato par la strada e chi galo incontrà? On can che, essendo sconsideratamente mona e turpe ( el magnava le galine e beveva sù i ovi) ciapava de norma tremende bastonà sul filo dela schina. - Vieni meco che a Sanremo ci sono pì cani che omani. Faremo sucesso...che se a fato sucesso Toto Mugugno, sto slandron, pensa cossa che faremo nialtri!
Camina camina, pì vanti i vede on gatasso randaggio ranpegatto sora on salgaro muso duro e bareta fracatta. - Cossa gai che ti rumega nobile felino del porcacio cane?
disse il musso somaro. - Go le bale s-gionfe e na fame cagna - disse il felino - il parone di casa gano chiamato l’usl che gano disinfettatto la casa e fato morire rabiosi i sorzi. Minchia signor tenente, che cachio mangio io desso ?
- Vieni co noi che faremo on conpresso.
E cussì si inviarono. E camina camina (sta storia, co tuto sto caminare, cumissia ronparme le bale!) catarono on galo-ruspamerda-travestito che era in grave pericolo di vita parché era due mesi che no faseva ovo (?) nonostante gavesse fato l’intervento de canbio de sesso a Casablanca on ano prima....
* Altro errore marchiano del Basso che tenta con insucesso citazioni più o meno famose. In questo caso voleva dire : - Il cacio sui maccheroni–
Con l’involontaria modifica l’autore dimostra di essare un grandissimo razzista in quanto la legge non contempla la possibilità di prendere a calcioni i cosidetti culatoni o pederasti...anche se un buon 70% del popolo lo farebbe con estrema gioia e senza nessun scrupolo morale. Il restante trenta par sento é formato dai rechioni in sorte.
.
- Orsù dunque - disse il musso, che ormai se sentiva un meneger - costui per il quale, sarà il cantante: faremo i Teic Tet italiani...questo par via dela vosse da cula é parfeto!
Ma intanto passavan le ore e sicome che la tera gira intorno al sole il quale....dassemo perdare! Insoma vegneva note e i quatro de l’ Apocalisse no savevano indove casso ‘ndare dormire. Il galo vide na luce in lontanansa e tacò sigare: - Tera tera... - Sta sito semo - ga interoto el can - dove credito de essare in te la nave de Cristofaro Colonbo? Cossa vedito toco de mona?
- On ciareto, Maesta canina, na luce che brila qua davanti...
- Andiam a vedare - disse il musso e si inviarono... Dopo on poco si catarono davanti a Montecitorio e vardarono drento: orca bestia ghe gera on mejaro de persone quasi umane che magnava a arco, praticamente dei briganti sassini, fetenti porchi, infami lazaroni schifosi onti e fioli de na bruta vaca...in poche ma sentite parole I NOSTRI MINISTRI ! - Sarìa belissimo mandarli tuti fora dale bale e magnare nialtri asl posto de lori!-
I ga pensà e se ga messo a studiare on piano. El musso se ga messo vissin la finestra, desora ze montà el can, sora el can el gato, e sora el gato el galo che nela confusion ga tentà de farghe la fatura al gato che però ga tacà sigare: - Stia fermo maleducato de on putaniero porco, senò le sgrafo il pipiolo e liello ridugo a cordèle!!!
Dopo de boto i se ga messo tuti insieme a sigare: - Ocio, ocio, porsea canaja, ze qua Di Pietro!!! Avisi de garansia par tuti!!!
Frase magica che ga fato levare on spolvaron dela Madona coi ministri che scanpava de qua e de la cofà le seleghe dopo na s-ciopetà. Par farla curta i quatro ze entrà ie i ga magnà a arco, rutà e scorezà, “e ciò é segno di buona salute!”. Dopo i ze ‘ndai dormire: el musso darente el loamaro, el can darente la porta, el gato tacà le bronze del camin, e el galo sora na trave (el gaveva paura de rapresallie da parte del gato). De note on brigante, on serto On. Sgarbi pelandrone e maleducato, ga tentà de riconquistare el palasso ma come che el ze entrà brontolando in on linguagio forbito come che ze nel so stile: - Vi sistemo io bruti froci e stronzi, andate a fanculo tuti, fassisti dei miei collioni, la bruta vaca di vostra sorella ecc. ecc.!
El se ga guantà na morsicatta sui totani e na becada so on ocio che lo ga fato scanpare de corsa pantesando e finindo drento al loamaro indove el se ga inpienà le rechie di merda e smerdà anca la boca (ben ghe sta, go proprio caro!). Cussì i quatro musicologi ze restà paroni spotici del palasso e i lo ga trasformà in casa de ricovaro par artisti indigenti e scassa balote. ( Dio volesse che entrasse anca Maicc Bongiorno, la Zanichi, Davide Mengaci, Pupo, Mino Reitano, Gino Paoli, e tuti i conpressi del lissio, sti maledeti, che no li posso tolerare co tuti queli zun pa pa zun che i fa, co i sorisi da setanta denti carolà, e le cantanti femane de otanta chili de peso e le ganbe cofà pratani. Che Dio li folgora tuti indistintamente co le so chitarone epiletriche. E che dopo, pena entrà tuta sta bruta zente, el secondin li inciavasse drento e po butasse le ciave sula fossa dele Mariane*...bruti infami delinquenti e porchi!!!)
Considerassion finale
Caro letore la storia ze finia, e sinceramente mi el significato no lo go capìo. L’unica roba certa ze che i ministri ze dei lazaroni e dele figure porche! Se ti te ghe capio de pì vol dire che te si pì inteligente de mi...se ciò ze vero come mai te ghe cronpà on libro ebete cofà questo ?
* Con questa considerazione il Basso da un’eclattante dimostrazione di un’inponente cultura geografica: infatti la Fossa delle Marianne é il punto marino più profondo e l’autore lo cita a proposito.
LEGGI I COMMENTI (2)
-
PERMALINK
venerdì 18 agosto 2006 - ore 18:07
ECO I NOVI TERORISTI!!!
(categoria: " Vita Quotidiana ")
Pochi giorni fa, par vie traverse, ne jera stà dito che nel padovano gera nato un novo grupo de no se sa cossa sopranominà N.A.B. La prima reassion gera stà de terore in quanto la sigla gera foriera de tristi ricordi ligai ai famigerati ani 60 e 70 nei quali sóto senplici siglete se nascondeva dele esimie figure porche che traeva s-ciopetà e bonbe ai politici in sorte. Parlemo del terorismo. Alora gavemo vossuo andare a fondo e gavemo scoverto che sto novo grupo no ze altro che un insieme de pensionati che se ga struturà par assaltare i bufè che vien dà in molteplici ocasion... in bona sostansa la sigla vol dire gnentepopòdemanco che Nuclei Assalto Buffet... Par capirghene de più semo andai a intervistare el Presidente, tale Gustin Moeca, pensionato co la minima.
- Come tuti sa, - el ne ga dito - par el pensionato tipico magnare ormai ze deventà un lusso, vuoi par mancansa cronica de pecunia, vuoi par altretanta mancansa cronica di aposita dentaura (se no gavemo schei come fasemo dotarse de dentiera?)... E sicome che la necessità e la fame agussa l’ingegno cossa gavemo fato???
- Cosa gavìo fato??? - gavemo dimandà.
- Gavemo, ansi gò avù, un lanpo de genio... sicome che romai in quasivolia paese o sità ogni dì qualchedun fa un bufè, vuoi par inaugurare na botega, vuoi par presentare un libro, vuoi par convìnsarne a votare uno al posto de n’altro, se gavemo organisà e gavemo messo su sto nucleo de diese sbafadori parfetamente funsionale e reditissio...
- E come funsionaresselo, se ze lecito dimandare? - gavemo dimandà.
- Caro, dimandare ze lecito e rispóndare ze cortesia... e mi so afamà sì ma cortese de animo e de fato... Desso te spiego: drento al grupo ghe ze el Servissio Segreto formà dal’agente Otorino Peuco che ga l’inportate conpito de lèzare i giornali par catare i più mèjo bufè... Ogni matina lu passa tre quatro bar, beve sì e no un cafetin e se leze tuti i giornali locali. Toe nota dele nove aperture, dele presentassion e de quant’altro posto indove se possa sgramolare agratis... Po’ de sotignon torna casa e ala sera se riunisse el Comitato Esecutivo formà da mi, da Nane Recia, Toni Limega e Rino Caoduro de Mierda che ze nobile... Qua se valuta le informassion e se selie dove colpire... Se avisa la base e se programa l’intervento...
- E co che criterio seglìo el posto??? - gavemo dimandà.
- E criterio ze senplice: se valuta l’ora, el locale e el tipo de festegiamento: par i bufè de mesogiorno va mèjo le nove aperture de boteghe tipo pasticerie, pisserie o le promossion intei supermercati... segnalo che nei supermercati l’organisassion ze pessima: on di i fa l’assagio de prassiuti, martondele o formagi e n’altro dì l’assagio del vin... mai na volta che i fassa tute do le robe insieme...
Par la sera ze òtime le promossion dei candidati politici o le presentassion dei libri tipo "Osterie Leterarie"... Pena individuà el posto se mete in ato el programa de assalto: se fa su na desina de pensionati, se se veste da messa cantà e tramite el mèso più economico se se presenta inte posto par tenpo... Oto se piassa in giro par el locale fasendo finta de èssare interessà a l’avenimento. Se scolta, ogni tanto se fa de sì co la testa fin che ghe ze l’inevitabile conferensa stanpa, che secondo nialtri se dovarìa abolire parché fa pèrdare solo che tenpo, e in contenporanea se tien de ocio el posto dove vien parecià el bufè... vissin al quale posto stassiona co sguardo indiferente le avanguardie overo i restanti do conponenti del grupo. Queli par inténdarse che darà el via al’assalto.
Pena che i camarieri taca portare in tola i vari momoni partirà el segnale da parte dele avanguardie e senpre co fare indifarente i oto sparpagnà par la sala pian pianeto, ciacolando del più e del manco se portarà vissin ale tole inbandite e formarà na bariera tipo calcio ocupando tuta la prima fila... Questo parché pena finìa la conferensa stanpa tuti i convenuti perdarà ogni ritegno e se precipitarà come siacali sule tole... Comunque nialtri rivemo armai de piron e corteo... in caso de tentativo de scavalcarne partimo a spironà sule man o cortelà sule coste... Bisogna mantegnere le posission conquistà parché se se ciapemo indrìo dopo diese minuti no ne resta gnanca le frégole... Na roba vergognosa...
- E invesse vialtri, magnè co calma.. - gavemo dimandà.
- Serto sior, co calma... se inpienemo i piati e magnemo co estrema educassion, parfin sensa rutare o scorezare come mussi, abinando a ogni porsion el so vin... Infati intel grupo gavemo anca Nane Grìpola noto alcolista e enologo, che ne juta a abinare i vini ale pietanse... Naturalmente el primo giro ze de assajo... pena capìo quale ze le specialità rifasemo el giro e finalmente taca el pasto vero e proprio... Normalmente fasemo sete oto giri, po’ spetemo che rivà i cafè e le coression, fasemo i conplimenti ai camarieri e tornemo casa... El dì drio se riunimo e fasemo na relassion co tanto de puntegio sia par el servissio, el magnare e el bere...
- Tuto puito insoma... nissun problema...
- E invesse ghe ze anca i so problemi: nialtri voressimo che invesse de fare i "bufè in piè" i fasesse i "bufè sentà"... Sarìa più beo magnare de gusto co le ganbe soto ala tola... Dopo voressimo che i fasesse manco magnareti strani o cagadine che no se sa gnanca cossa che le sia: semo drio pareciare un comunicato co la piataforma rivendicativa dove spiegaremo le nostre richieste che in sostansa ze queste: dimandemo bone pastassutone, piatoni de bacalà e polenta, tripe e fasoi e anca dele bele fortajone rognose... el comunicato finirà co el nostro moto che "Manco ciàcole, più magnare e milior servissio!"
E par sarare sta intervista mi in qualità de Presidente del NAB vorìa dire na roba a queli che va in sti posti solo par cronpare i libri, vèdare la nova botega o par scoltare el candidato da votare...
El libro cronpevelo in libreria, can bestia... el candidato scolteo in television... el novo negossio andè vedarlo dopo... Serte volte ghe ze na confusion bestia e a nialtri ne toca magnare in pressa e de scanon... A semo ansiani e gavemo bisogno de calma e tranquilità... Un poco de rispeto, par dio!!!... o gavemo da far intervegnere i sindacati???
LEGGI I COMMENTI (2)
-
PERMALINK
giovedì 17 agosto 2006 - ore 10:20
ANUNCI INPORTANTISSIMI!!!
(categoria: " Vita Quotidiana ")
Su richieste pressanti de raquanti amissi (mone) concedo un poco de spassio par dei anunci che poe interessare i amissi de spritz... Corajo..
Causa morte par aidiesse vendo dentiera soto e sora seminova a presso de assoluto realiso. Unico proprietario me nono de novantasete barete. Telefonare par prove orario pasti. In omagio catetere de gran marca co sacheto par pissin disegnà da Cavali. 049.9366501 Chiedere di Toma.
Nolegio, a presso interessante, can doberman rabioso che in do giorni ga sbranà me mojere e me suocera. Causa gran nùmaro de richieste necessaria prenotassion urgente. Tenpi de atesa sirca oto mesi. Telefonare co se voe al 0422.678990
Amante dei animali gò in casa un tricheco triste parché senpre solo. Ghe serco na conpagna anca parché el poro can stà ore e ore davanti al fornaro aspetando na focacia... Par aviare un bel alevamento de fratini serco anca un frate disponibile par coprire na foca monaca. Telefonare 041.6900876,9999
Comunicassion urgente a Catia Segato: cara sperussola bela el me amore par ti ze come el debito publico italian: ogni dì el aumenta spaventosamente. Tuo Toni Secareo dito Ponta da venti.
Geometra preciso, ansi precisissimo alto un metro e otantadò, serca dona alta un metro e disdoto par fare su na copia de tre metri esati.Citofonare (?) al 22 de agosto... Mah
Gò trentasete ani e sò proprietario de sete canpi de tera. Serco desperatamente dona de massimo quarantani, porsea in leto e economa in cusina proprietaria de tratore e spandiloame par matrimonio d’amore (par i canpi!). Richiedo foto del tratore e del spandiloame. Telefonare 049.5794367
LEGGI I COMMENTI (2)
-
PERMALINK
lunedì 14 agosto 2006 - ore 18:33
L’OROSCAPO del mago mona Tilio Sepa
(categoria: " Accadde Domani ")
LE STELE MI DICONO...
Il cantone dela prevegensa a medio e longo termine
Finalmente vegnarà catà l’aqua su Marte: la ze dentro i seci de tre marochini che ze là par lavare i veri dele sonde che riva da tera. Catà anca un napoletan che vende telefonini de carton. El Goerno italia se riunisse de scondon par catare fora schei poar stropare el buso dele finanse. El popolo tratien el respiro. Dopo tre dì un milion de morti asfissiai... Dopo el virus dela muca mata, quelo del polastro cinese, rivarà verso fine mese quelo del conicio onesto. Dopo un atimo de terore subito vacinai tuti i deputati italiani
COMMENTA (0 commenti presenti)
-
PERMALINK
domenica 13 agosto 2006 - ore 20:50
El primato veneto de agosto 2005
(categoria: " Vita Quotidiana ")
Gioni Ludro, rude alevatore del’alta padovana, ga otegnù el record par la produssion de insacati vari nel corente ano. Esatamente dala so asienda se vegnù fora ben oto quintali tra saladi (co l’ajo e non), sopresse, coesini, cope, sissole, onto e brasole. El quantitativo ze stà otegnù grassie al’inponente alevamento sito nela stala del Ludro: infati dopo un atento inventario prima dela strage anuale risultava in carico ste bestie: un porseo anoressico, un musso asmatico, un pito col snaro, oto pantegane, na colonia de moreje, un nùmaro inprecisà de papatasi e do ragni (el ragno porta guadagno, questo lo sa tuti)... Durante el confessionamento dei prodoti ze misteriosamente sparìe la suocera de sentoventisete chili, na àmia madegota de novantanove chili, tre pari de scarpe vece e un calseto sbuso.
.jpg)
LEGGI I COMMENTI (2)
-
PERMALINK
sabato 12 agosto 2006 - ore 12:34
POESIA & SESSO: "EL CIUCIETO"
(categoria: " Poesia ")
EL CIUCIETO
Triste e sardelonica istoria di depravassione
Questo ze un fato sucesso davero
e che Dio me folgora se no digo el vero:
protagonista dela storia cussì originae
ze Toni Culata dito Secabae.
Alto, biondo dal’ocio celeston,
la zente diseva: "Toni ze culaton!".
E ciàcola oncò e ciàcola doman,
la roba ze rivà in recia anca al porocan.
Toni ciapà da dispression nera
gavarìa preferìo finir sototera,
pitosto de aver in coste sta eticheta
e farse vardare da femeneta.
Dopo ani a ani passà a rosegarse
eco la solussion: "Bisogna sposarse".
E dopo poco tenpo parte l’informassion:
"Toni se sposa co un toco de bandon!"
El toso se inpegna e invia el casso
robe ch’el no’l sbusa anca el stramasso,
par dopo un ano poder anunciare:
"Mi Toni Culata presto sarò pare!"
Nasse un putin, beo, biondo e paciocon
ma che siga de continuo, sto bruto slandron!
Toni sodisfato soporta anca sto tormento
sentirse pare lo rende contento!
Po’ riva la suocera in casa de bruto
parché la mama ga bisogno de aiuto...
Un dì Toni riva casa e no sentindo sigare
se fa la dimanda: "Come che sia sto afare?
Ma come faea, suocera cara, a tegnerlo bon,
visto che de norma el siga a tonfon?"
"Ze presto dito, genero beo -
risponde la suocera mostrando el puteo -
sto toso, caro ti, el ze tuto so pare...
vuto savere come farlo chietare?:
... basta un ciucieto infià intel dadrio
e varda che angioleto, caro de Dio!!!
Dal libro "Versi & Ro-versi" de Walter Basso
(questa fa pare dei roversi)
COMMENTA (0 commenti presenti)
-
PERMALINK
venerdì 11 agosto 2006 - ore 12:27
ECO I ME NOVI CARTELI!!!
(categoria: " Lavoro ")
In uficio, in taverna, in stala, in ostaria... indove casso che te voi fate riconossare e rispetare!!! Dopara i me cartleli, lanpri, neti e che anca un musso poe capire!!!
COMMENTA (0 commenti presenti)
-
PERMALINK
martedì 8 agosto 2006 - ore 20:51
LA BARZELETA PAR I MONE!!!
(categoria: " Vita Quotidiana ")
Na copieta de sposeti piosto sul inbranà va dal ginecologo par via che dopo un ano de matrimonio no i riesse a avere fioli. Alora el siensiatto fritologico ghe dimanda:
- Miei esimi, nonché mone, passienti, contattemi cossa fate la matina..
- Se alsemo, femo colassion, se dasemo un baseto e mi vago lavorare - dise el sposeto.
- E a mezodì? - insiste el tennico dela fritela
- Magnemo, se demo un baseto po’ andemo a riposarse... - dise el sposeto
- E ala sera, cari de Dio, cossa fasette?
- A vardemo la television e se demo qualche baseto sior médego - risponde timido el sposeto...
- Va ben... go capìo... - ribate el médego - ma dopo?!?
- Dopo andemo in leto, se demo ancora un baseto e po’ dormimo...
- Signora, par Dio - perde la passiensa el monologo (ginecologo de Padova) - la se despoja nuda, la se buta sul letin e slarga le ganbe... - Dito fato el medego se sbotona el patelon trà fora l’atresso e tronba la sposeta. Po’ el varda el sposeto e siga:
- Gavìo capìo , par Dio, come che se fa par avere toseti? - Al che l’omo tuto contento dise:
- Serto sior medego, desso ze tuto ciaro...- e tuti contenti i do paga e ciapa la porta. Passa tre secondi e se sente bàtare. Se verze la porta e el sposeto timido mete drento la testa:
- El me scusa sior, me so’ desmentegà de dimandarghe na roba: vegnelo lu casa nostra o go da portare me mojere in anbulatorio???
LEGGI I COMMENTI (4)
-
PERMALINK
sabato 5 agosto 2006 - ore 22:26
FINIE LE FERIE, PORSEA CANAJA!!!!
(categoria: " Pensieri ")
Indove gerimo restà co l’istrussion al popolo bestia e bue???.. Mah... eco qua un poche de senpiade fresche fresche...
Becanotario di tagliano overo come parla el popolasso loamaro
secondo W. Basso e Paolo Sanchetti grandi lanpadari (luminari) dela siensa oratoria
Pori istruiti.............................................pori ostruiti
Porseidi...................................................... ..perseidi
Praca teutonica................................placca tettonica
Prostatato (segno) .....................assegno postdatato
Prutonio richeto..........................plutonio arricchito
Prutonio.......................................................plutonio
Retroscoc...............................................elettroschok
Sùcaro sfigato.................................. zucchero filato
Suina (posizione)........................... posizione supina
Termofissone..........................................termosifone
Test gravitazionale......................test di gravidanza
Timore sul pissauro .................tumore alla prostata
PAROLE ANBIVALENTI (Veneto-Taliano)
A cura del dialetologo prof. Mario Manarasso
Parlamento = parolassa conposta derivada da altre do: "parlare" e "mentire" overo contare bale... Quindi posto indove la zente parla e conta balote
Piumone = "insieme di cretini" o anche "gruppo di bandoni" ovvero di donne dalle curve e curvoni imperiali
Sara = "chiudi" tersa persona ind. presente del verbo "sarare": mi saro, ti te sari, lu sara... Notissima la frase usata per mettere in dificoltà una Sara un fiatenin sema: "Sara, verzi le ganbe, Sara!"
Scimunito = omo sportivo paron spotico de un paro de sci; Toni ze sior: el ze sci munito!"
Sciovia = "sio, via"... modo sinpatico par mandare un ronpitogne "fora dale bale!"
LEGGI I COMMENTI (4)
-
PERMALINK
venerdì 28 luglio 2006 - ore 12:59
VAGO VIA!!!!
(categoria: " Pensieri ")
E BASTA... ME SO ANPIAMENTE ROTO I MARONI CO TUTO EL MONDO CIVILE E ANCA QUELO INCIVILE (CHEL ZE TANTO DE PIU’
... BASTA COI MINISTRI CHE NE CONTA BALE E NE CIAVA PAR DRITO E ROVERSO!!!! BASTA CO LE MOJERE CHE NE ASSILA!!!.. BASTA COL PAROCO CHE VOE CHE PREGA EL SDO DIO!!!... SARO BARACA E BURATINI E VAGO IN FERIE!!!
SE SENTIMO FRA NA SETIMANA E PASSA!!!
Questo ze el più gran ronpicojoni del mondo... el ghe scassa i ovi a tuti... e in più el ciapa na valanga de schei... pensa ti che beo: essare pagà par ronpare i cojoni!!!.. mew mojere podarìa èssare miliardaria!!!!
LEGGI I COMMENTI (2)
-
PERMALINK
> > > MESSAGGI PRECEDENTI
[ SONO OFFLINE ] 