Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
sabato 1 luglio 2006 - ore 09:00
SUCEDARA’ DOMAN...
(categoria: " Vita Quotidiana ")
Finalmente verte le “case chiuse” (cussì finalmente le ciapa un poca de aria pura!)... Basta co la vergognosa esposission de done meze nude drio ale strade, basta coi carezoni intasà de màchine trasformà in torare, basta col sesso in vendita sensa scontrin fiscale o regolare fatura. Da oncò le mojere poe stare tranquile: le gavarà in testa corni scrupolosamente regolamentari, le podarà controlare le fature dei marìi e consiliarli parché i spenda mèjo i so schei. Le più econome podarà parfin mandare i consorti dale amighe che ze più disponibili al volontariato puro. Inoltre chi se guantarà l’AIDS, el scolo, le creste de galo, nele case chiuse podarà scaricare le spese mèdeghe dal 740... Sede centrale dei cosideti “casini” sarà Montecitorio dove par via de tanburade (soratuto anali!) i nostri governanti ze feratissimi!
El Santodromo (overo el santo del mese)
A cura del clericale Santino Santinon
In lujo el 15 ricore, secondo mi, un santo locale (de Rustega de Camposampiero). Tale Gineto Spussa che dopo na tenpestada inponente che ghe ga mandà ramengo el lavoro de un ano, se ga fato frate col nome de Fra Carlo... Sarà in un convento tra el verde dei canpi de Busiago Vecio el frate ga sercà par tuta la vita un direto contato col so Capo Divino par poderghe dire cossa ch’el pensava de Lu... No savemo se el ghe ze riussìo!
"Fraton" cioè parcui grosso frate che serve par lissiare la malta su par i muri. Si guanta par el mànego e si russa intel muro
Dal "Dissionario dele monade" de W. Basso Ed. Paoline e Pierine pag. 8907658,8% presso 579 dolari
COMMENTA (0 commenti presenti)
-
PERMALINK
giovedì 29 giugno 2006 - ore 18:32
ONCO’ SO’ IN VENA DE POETARE!!!!
(categoria: " Poesia ")
CONTRO
In càmara tua, in piè,
mi davanti de ti,
te parlo, te spiego:
“Cara, i ze tenpi duri:
bisogna andare contro:
contro ea moda,
contro le tendense,
contro la violensa
contro l’ipocrisia,
contro el rassismo,
contro l’indiferensa!...”
Te me vardi,
te soridi
e te me disi:
“Ze vero caro,
bisogna proprio andare contro...
Cossa disaressito,
intanto par tacare,
de incantonarme CONTRO el comò?”
LEGGI I COMMENTI (7)
-
PERMALINK
martedì 27 giugno 2006 - ore 18:12
DEL COME DESTRATARSE DELE ZANZARE CO MODICA SPESA E GRAN ASTUSSIA
(categoria: " Vita Quotidiana ")
Che le zanzare sipia dele grandissime ronpitogne no ghe ze onbra de dubio... Che sia difìssile coparle ste schifose ze ancora più fora de dubio: i zampieroni (sarìa quele spiralete spussolenti che se inpissia e intòssega tuti: ti, to mojere, to fili, el can el gato... fora che el maleducato inseto) no serve a gnente... come no serve a gnente la armi bateriologiche e chimiche: machinete a ragi ultraviolenti, quele col richiamo del mas-cio pincion, quele che sprigiona gas tossici che al confronto el gas nervino ze parfumo de rose... Le armi mèjo quindi resta quele storiche: le savate, i s-ciafoni e le resie... Anca i pugnassi paraltro da òtimi risultati... Comunque desso "sine qua non" (semo qua nialtri... plurale majestatis) co na idea rivolussionaria che canbiarà el futuro del mondo umano vitima del mondo zanzarifero... Ma inviamoci tosto col metodo.
Robe che serve:
1 Càmara da leto inpestà de zanzare in quantità (chi no le gavesse poe farse prestare quele del vissin de casa)
1 picola tola co quatro ganbe
10 picole carafete de vero
1 tovajeta
2 siringhe da prelievo (in caso de mancansa del’atresso se poe usare dele sanguete)
10 careghete eletriche de misura picolissima
El presente metodo sientifico parmete l’assassinio sistematico de 10 zanzare ala volta.
PROCEDIMENTO
1) Andare in bagno de sotignon, armai co le do siringhe o le sanguete e cavarse un bon litro de sangue dale vene umane...
2) Métare el pressioso liquido drento un bussoloto, scóndare le siringhe. Se gavì doparà le sanguete dopo averghe fato spuare fora el sangue a pugni in testa butele sul vater e tirè l’aqua...
3) Co fare indafarente tornarì in cusina dove sora la tola gavarì parecia la toleta picola co la so bela tovajeta e le so diese carafete in bela vista...
4) Desso fasendo atension che le zanzare che ze in càmara no ve veda co na siringa travasè el sangue umano dal bussoloto ale carafete che inpienarì fin l’orlo...
5) Fato questo torno la toleta davanti a ogni carafeta posissionè le diese careghete leletriche che gavarì colegà su na savata leletrica che a so volta ze colegà co na presa corente a 220V... Desso tuto ze pronto par la straje zanzarifera...
6) Andè verso la càmara disendo co vosse stentorea:
- Prego, signore zanzare, acomodatevi in cusina che sono pronto da bere... Sangue fresco di prima qualità... Assagio gratuito oferto dal’AVIS... Prego, co calma... diese ala volta par piassere!!! -
7) Pena le diese sarà svolà fora dala càmara da leto se sararà la porta e se farà comodare le schifose sassine a tola... Naturalmente le zanzare se precipitarà, se sentarà sule careghete leletriche, fregandose le man (?) e se fulminarà al’istante...
8) Co do dei se guantarà i cadàvari che vegnarà sgiaventà nela scoassara....
Ripetere le operassioni dal punto 6 finché la straje sarà conpleta. Bonasera a tuti.
LEGGI I COMMENTI (2)
-
PERMALINK
lunedì 26 giugno 2006 - ore 20:16
INPAREMO LE PAROLASSE dal me libro "Mauale maleducato del’insulto..."
(categoria: " Riflessioni ")
putana - spacciatrice di fritella
Diminutivo putaneta; Accrescitivo putanon; Dispregiativi: putanassa, putanassa da stassion, putanassa marsa, putanassa putrefata, putanassa cancarosa, putanassa da tre brassi un franco
Chela putana de to mare! - insulto classico
’Ndare a putane - frequentare le spacciatrici di frittella; anche fallire
’Ndare a putane col saco da polpe - essere un emerito puttaniere (le polpe sarìa le bietole)
Fiol de putana - figlio di puttana
Quando te sposito che dopo vegnemo a putane casa tua? - insulto da sbocchi di sangue
Proverbio: Dona che mena l’anca se no la ze putana poco ghe manca
La barzeleta
Un siorato va in casin e paga na putana. I va in càmara i se buta de pressa inte’l leto onde congiungersi carnalmente (legi: “tronbarse”). Prima de tacare l’omo dise:
- Cara ti dispiacerebe, fin che io vago giù di brentone, caressarmi e gratugiarmi co le tue manine di veludo le rechie umane?
- Ma schersi, caro... co piacere - risponde la donacia (legi: “putanassa”), e la ghe grata le recione... Cussì i do finisse la stramassada e la fèmana curiosa dimanda:
- Come mai ti piacce farti gratare le rechie? Zela na inocente mania?
- Machè mania dela Madona! La ze na norma de sicuressa: fin che te me grati le rece no te poli tarmarme el tacolin!!!
LEGGI I COMMENTI (5)
-
PERMALINK
domenica 25 giugno 2006 - ore 17:17
BIOGRAFIA DE MARIETO PIVA, BOCIA SCONSIDERATAMENTE MONA!
(categoria: " Vita Quotidiana ")
Marieto Pipa xe nato raquanti ani fa inte na fameja numerosa (ultimo de dodese fradei) in quanto so pare gaveva el cicio sbuso e no conossendo l’uso o inpiego del goldone-preservativo ogni volta che el ‘ndava zo di brentone co la mojere ghe sbrissava via prima del tenpo qualche mejaro de spermatozoi che essendo de natura ramengoni e pomicioni i tronbava l’ovulo feminile lassando cussì la fèmena insinta. Fin dal’infansia Marieto ga manifestà na insana tendensa alo scassamento prolungato e continuato degli altrui maroni, in particolar specie di queli paterni. A tre ani el ga avù la prima esperiensa sessuale co na serta Gelsomina, toseta de tre ani fiola de un vissin de casa. Infati el ze stà pescà dal pare dela fanciulina in bagno co le braghessete e mudandete ai zenoci e col pipiolino in man che el tentava un difficoltoso quanto vergognoso inserimento inte la bernardina inplume de Gelsomina che par l’ocassion se gaveva anca ela smudandà. L’omo, forte dei consilli dela pisscologia moderna, fasendo finta de gnente ga tacà rivestire la putina e Marieto ga serca anca lu de metere a dimora l’insodisfato pistolino. No essendo però bon de sararse la cerniera del patelon ga dimandà al’omo:
- El me scusa sior, saresselo cussì gentile de tirarme su la cerniera, che no so’ bon, porco qua e porco là? - (i porchi, ga dito dopo casa, i ghe gera sbrissà)
Guantandose cussì na slepa drio le rece... A quatro ani vedendo un vecio tabacon (notissimo fassiston) armà de un potentissimo paro de tiracone che te tegneva su le braghesse drio sarare el cancelo del condominio indove che el abitava el ghe ga dito:
- Te ghe paura che vegna drento i comunisti, bruto fassista co le tirache de merda porco qua e porco là!!! - (anca su sto caso i porchi che gera sbrissà...)
Ciapandose cussì n’altra renga da chilo sula copa. A sinque ani al’aperura dela sagra del paese el ze sparìo da casa tre giorni e quando che el ze tornà el gaveva perso tre chili de peso e se el gaveva scagassà dosso inumerevoli volte. Par snetarlo so mare da dovù usare la cassola e el geto dela cana del’aqua. Indove se gavevelo cassà el maledeto?: darente la giostra dei boce. El paron prima de ‘ndare via ga presentà el conto dei giri al pare de Marieto: 150 cartone da mile, grassie a un buono sconto de 100.000 de cui el gaveva omagià el putin in quanto “cliente più affessionato dele Tre Venessie”. A sinque ani e meso, durante la messa più frequentà dela domenega el se ga presentà in ciesa, onto come na sepa, in conpagnia dela Laica, cagna ebete come el paltan e altretanto onta e spussolente. Al momento dela comunion el se ga presentà davanti al paroco, co la cagna drio, e co sinquanta franchi in man par dire la sacrilega frase che par poco provocava un infarto dopio al poro can de prete:
- Ciò ti, vojo anca mi da magnare... varda che pago, porco qua e porco là! (dopo casa el se ga pentìo e el ga specificà che i porchi ghe gera sbrissà!)
.El prete ze cascà indrìo schina e in ciesa ze sucesso un casin bestia. Apena l’eclesiastico ze ravegnù el ga borbotà:
- Ghe ne go sentie tante eresie e spropositi, ma questa le bate tute... cavemelo da torno senò no rispondo più de mi e cometo un infanticidio...
A sie ani el ga scumissià le elementari e in do ani el ga mandà tre maestre in sanatorio e un paro al CIM de Camposampiero co inponente crisi depressive e manifeste tendense al suicidio. Pubblico da ani, con somo e perverso piacere, le perle scolastiche di tale turpe individuo che ora frequenta, per la seconda volta e co i risultati che tuti podì védare, la terza elementare.
Tema: Parla di Atila
Atila era un re salvadego e spussolente deto Flagelo de Dei in quanto, par cui viscionava i dei o diti ai nemici. In verità le dico siora maestra che Atila era Re dei Uni e n’altro re era Re de St’altri..
Egli era un fetente per via che girava il mondo a cavalo molando teribili spadatte dietro le recchie al nemico e indove passava butava il diserbante.Iinfati lui copava i nemici, rideva e diceva: - Indove passa il mio cavallo quadrupede non cresse più l’erba! - Atila era anche uno sbevassone in quanto aveva sempre in mente i goti o bichieri: ostrogoti, visigoti e mesigoti infati se li ciucciò in quatro e quatroto. Quando non conbateva andava in ostaria e là zugava a carte e porchezava a tonfone. Questo re maleducato e porsellone rivò anca a Padova e a Venessia, però non essendo buono di nuotare si anegò miseramente. Il mio compagno di banco Nineto deve essere parente ala longa di Atila. Infati spussa come un tonbino, ruta, scoreza e porcheza. In più e par dessora alza le cotole alle bambine per vedere le mutande. Esso è un grossissimo mona e io se fossi la siora maestra lo sbocerei subito..
COMMENTA (0 commenti presenti)
-
PERMALINK
sabato 24 giugno 2006 - ore 18:16
DOVE ZE L’ANELO MANCANTE????
(categoria: " Riflessioni ")
Riportiamo, per dovere di cronaca, un brano tratto da una ponderosa ricerca del ricercatore cretino Tonin Renga dito “Scariolà de Ossi” che avete già conosciuto in altre mie pubblicazioni. Quello che segue è un brano che merita essere letto...
L’anelo mancante
Senpre el noto siensiatto di cui il quale mi sfuge il nome, ze deventà mato par catare el famoso “anelo mancante” che secondo lu l’ultima simia ga regalà al primo omo dopo el matrimonio. Se se lo catasse sarìa dimostrà che l’omo dissende dala simia, dopo averla tronbata. Ora miei dileti letori ve spiego parché sto casso de anelo no se cata: parché l’omo primitivo gera distrattissimo e perdeva tuto. Prova ne sia tuta la moneda antica che se cata frugnando in tera: la zente girava de qua e de là co le scarsele sbuse e questo fato, unìo ala gran distrassion, ze ala base de tuti i ritrovamente de schei veci... (questa scoperta va attribuita a Dino Durante) Quindi sercare un anelo perso milioni de ani fa ze come sercare el famoso lago nel calamaio...
(dal saggio “ Simie, omani & bagigi” di Tonin Renga Ed. Risi e Bisi - pag 60)
COMMENTA (0 commenti presenti)
-
PERMALINK
sabato 24 giugno 2006 - ore 15:50
DASIME NA MAN!!!
(categoria: " Lavoro ")
Volete partecipare alla rinascita della SGANASSADA l’unica rivista umoristica veneta? ... Mandatemi pensieri, battute, battutaccie, opinioni "fora coe oche"... barzellette... Dopo opportuna cernita le pubblicherò con il vostro nome o pseudonimo... Potete scrivere in veneto, italiano o misto... Do "bone" me ze za rivà.... Aspetto soprattutto le donne (ma non solo!)... Me racomando!!!... vardè che ve speto!!!!!
COMMENTA (0 commenti presenti)
-
PERMALINK
venerdì 23 giugno 2006 - ore 20:39
IN ANTEPRIMA MONDIALE!!!!
(categoria: " Scienza e Tecnica ")
Clamoroso!!! Finalmente Emilio Fede detto "Chi strissia no scapussa" ze riussio a farse fare el trapianto de facia... L’Agensia Ansia me ga mandà in anteprima mondiale el novo muso de Milieto!!! Ecolo qua!!!!
.jpg)
COMMENTA (0 commenti presenti)
-
PERMALINK
venerdì 23 giugno 2006 - ore 08:43
ONCO’ BARZELETA ANIMALISTA!
(categoria: " Scienza e Tecnica ")
Precaussion
Un sior va al zoo a vardare le bestie... El gira de baucon de qua e de là e infin se ferma davanti a la cheba del gorila-macaco... Sto bestio grando un paro de metri varda co estremo intaresse l’omo che a un serto punto, mosso a sinpatia, ghe buta na saresa da un scartosso ch’el ga in man.
El gorila-macaco guanta la saresa, la scaluma atento po’ se la inpira su par el dadrìo, la tira fora e se la magna de gusto. El sior a védare la sena restà de caca e cussì el ghe buta n’altra saresa. El gorila ripete l’operassion infilandose danovo el fruto intel dadrio po’ se la magna... L’omo se varda torno e fa n’altra prova: sgiaventa drento la cheba na naransa... El bestio la guanta, la scaluma, se la inpira in loco, estrae e magna ingordamente.
- Giuda can , - pensa l’omo - mai visto na qualità de lavoro del gènare; desso ghe riprovo!!! - el core fora el cronpa un melon el torna drento, core dal fenomeno e ghe lo tira drento. Presa al volo, tentativo no riussìo de inpiramento e po’ molto secà tiro potente del melon intel muso al sior... Questo ze là parplesso che se grata el babìo quando el vede avansare el guardian cussì el pensa de dimandare spiegassion:
- El me scusa capo, me savarésselo spiegare come mai el gorila-macaco-sinpiansé ogni roba che ghe buto na roba prima se la inpira su par el dadrìo e po’ la magna... co esclusion del melon??? -
- Ze presto dito, sior... na volta un disgrassìa ghe ga butà drento na nose de coco.. El mona la ga magnà de rabion sensa mastegarla e co ze stà ora de farla i ze stà dolori... Da quela volta prima de magnare qualunque roba el toe la misura!!!
.jpg)
Simioto gorilamacaco
LEGGI I COMMENTI (3)
-
PERMALINK
giovedì 22 giugno 2006 - ore 18:09
A PROPOSITO DE VERME SOLITARIO (vulgo BISSO SINGOL)
(categoria: " Riflessioni ")
El ze el bestio più inteligente e lavativo del creato: infati sensa fare un casso el ga risolto un mucio de problemi. No’l se ga sposà e quindi no’l ga nissun che ghe ronpe i maroni, el ga alogio, riscaldamento e magnare agratis!... Ciamaghe mona!!!!
COMMENTA (0 commenti presenti)
-
PERMALINK
> > > MESSAGGI PRECEDENTI
[ SONO OFFLINE ] 