Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27792 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
lunedì 9 luglio 2007 - ore 18:13
FINALE DEL DRAMA!!!!
(categoria: " Vita Quotidiana ")
- Ciò, malvagia e infame casalinga – taco criare – no te me gavevi dito che el sarìa calà??? Come mai invesse el ze cressuo de minimo do tallie????
- Me sò sbalià: no’l ze de lana, el ze de coton....el calarà tuto su un colpo al secondo lavajo.... – ze la logica risposta dela lavatrice umana – comunque el te stà ben, el colore ze intonà (co cossa ga da èssare intonà un pijama me dommando mi?) e no ze par gnente grando come te voressi farme credare ti... el ze legermente abondante, ma ciò va ben parché in leto se ga da stare comodi....te sì senpre el solito esagerato!... e vien il leto e stua la luce che doman la sveja sona ale sie, e mi go da alsarme ti invesse te continui dormire fin le oto, che se no ghe fusse mi... -
Interonpo el sproloqio insensato e me casso (vosse del verbo “caciarse”) soto ale coverte... Come me giro de colpo le braghesse e le maneghe core su e me se inrodola tute che no riesso gnanca a móvarme. Cussì me incasso (vosse del verbo “incassarse”), trao do peadoni, me cavo le braghesse e le buto zo dal leto.... Passo do ore a tirame zo le maneghe che continua inrodolarse al’altessa dele spale e finalmente ciapo sono....Ale tre de note me svejo fasso par gratarne na recia che me fa spissa e me cato sensa man: le maneghe se ga stirà in tuta la so longhessa massima consentita dalòe lege sui pijiami (ultima vacada de Panela) (do metri sirca cadauna) e le me intriga dapartuto... Dopo la valanga de porchi stretamente necessaria in sto tipo de situassion vago zo e me meto do leastici torno ai polsi in modo da tegnere ferma la stofa.... Riciapo sòno e ale sinque me svejo de soprassalto e no me sento più le man.... cussì taco sigare a pien buso:
- Fémena aiuto, acoruomo.... ciama imantinente un chirurgo prastico che me taca le man de un cadavaro par via che qualche talebano entrato di sopiato in camara e avendomi confuso co un ladro ga da averme talliato le apendici superiori sto fiol de na bruta troia.... no me trovo più le man, can bestia!!!
- Cossa sighito malnato de un fiolduncan!!!... fame védare: no te vedi che te sì ingusolio par via dei leastici massa streti?... possibile che no se possa dormire????... Ma feto posta o sito proprio mona de natura????...Varda ti che castigo che Dio me ga dà....
La matina drio me also vago in bagno, me vesto, trao in pijama su un canton quando riva la femena.
Ciapa in man el pijama, lo verze parben, lo controla, lo ricontrola, me varda male, po’ lo sgiaventa de bruto nel scoassara....
- Come mai tesoro, - esordisso mi – gai messo via il nobile indumento nela patumiera??? No te gavevi dito che el me stava ben???
- No so bona de capire: el costa ben sinquanta cate, el ze de marca, ma indosso a ti el fa afano... Probabilmente el ze stà fato par zente ben fata, alta e muscolosa... tipo Svassnegher.... Ti invesse te sì fiapo e te abondi solo sula pansa.... eco quindi pitosto de andare in leto co el pajasso del circo Togni, no podendo eliminarte ti par ovie razon elimino el pijama... Oncò te ne conpro uno de novo: stavolta de Valentino.... e guai a ti se te permeti de fare critiche... Ze tuto ciaro?
Ciarissimo.... ansi lanpro....caro letore, na considerassio bisogna che la fassa: sui giornali se cata spesso titoli del genere: “ Ucide la molie parché el cafè fa schifo”, “Stanco del vita amassa la molie” “ Ucide la molie confondendola con la suocera” e via de longo.... No te ghè gnancora trovà un titolo de sto stanpo: “ Sofega la molie co un cussin de pena de oca parché la stessa li inpone un pijama osseno”....
Abi fede, prima o dopo sto titolo te lo catarè. Sul Gasetin de Padova. Più precisamente sula cronaca de Camposampiero....
LEGGI I COMMENTI (2)
-
PERMALINK
domenica 8 luglio 2007 - ore 10:40
CONTUNUASSIONE DEL DRAMA...
(categoria: " Vita Quotidiana ")
Lo svilupo dela storia...
La sera stessa la femena trà fora dal como el novo inponente aquisto: “un favoloso pijameto secsi” seconda ela, “un strasso da snetare par tera”, secondo mi. Me lo sbandiera soto i oci co na inportansa bestia e mi, da marìo modelo, sòfego el vituperio che gera drio vegnerme su cofà na brentana e vardo la fémena co ocio interogativo...
- Cossa sito drio spetare???? – la taca rusare la tigre dela magnesia - No te pensi che sia el caso che te te lo provi par védare se el te va ben?
- Dona dai sentimenti otenebrati dal nùmaro esagerato dei cafè coreto sgraspa che ti inchiavi di scondone, tu forse ti stai dietro desmentegarti che io o fato il comesso prima e el diretore spotico in uno e più negossi de strasse ani anorun par cui la quale...
- Cicale... cicale... cicale... – interonpe la selvadega acenando un frivolo passo di dansa sul stile del’ébete de Ester Parigi co un moto de umorismo da sbochi de sangue.
- No ti dò una martelata in testa – comento mi co aria vagamente depressa e espressione coruciata - solo parché o paura dei animalisti che mi tendono, sorvolo a bassa quota il tuo sarcasmo da betola e riprendo: a me mi ci basta na ociada par capire che sto tetano de pijiama ze un cesso, na strassa fata dai marochini par inculatare le casalinghe ingrotolitte, un manufato riciclato, quindi me rifiuto categoricamente de metarmelo intorno.... O deto e confermo...
No fasso ora de sarare la boca dopo tanta afermassion che la femena incassa cumissia sigare cofà na oca e saltare par la càmara cofà na càvara in calda cussì, par evitare de chietarla dandoghe do paponassi fissi drio ale rece, me lo sò inpirarà de rabion e me sò messo davanti ala speciera par vedare l’ efeto che fa, come dise Renso Janaci el mèdego-canterino, quando canta tra na autopissia e st’altra......
Bestia canaja, Giuda can, tana bestia,... el capo intimo gera orendo: le màneghe sbrissava oltre le man de boni diese sentimetri, le spale gera de picolon, el colo a barcheta, come dise i ciosoti, gera na spana più bondante del colo. Par no parlare dele braghesse: el cavaloto me rivava ai zenoci e el fondo russava el pavimento...
- El me pare otimo.... pena na s-ciantina sul norbio....- comenta la femena dandome na ociada de sbrisson - col primo lavajo el cala un fiatin e quindi posso afermare ch’el te stà da dio!!! Cavatelo che doman lo lavo...
- Me dico che sei no solo senpia come la Marini, che di più ze umanamente inpossibile senò si entra direti nel’endicap grave, ma anca orba e orfana di materia grisa!!!! No vedi che ti ganno inbroliata?... Questo sacramento, parché di un esimio sacramento si trata, è una strassa orenda da tre brassi un franco come si usava dire nella vendita dei cosidetti buelli par insacare i saladi... E tu dona cerebramente stitica ed incagnitta, voressti che io giacessi secotè la note cussì aghindato??? Co intorno al mio nobile corpo umano una arta (sarìa “biancheria” in veneto arcaico... vedito caro letore quante robe che sò?... e dopo ghe ze dei ignoranti come el paltan che dise in giro che sò mona!!!) cussì vergognasamente malfata???
- El costa la belessa de sinquanta carte da mie quindi no’l poe che èssare un capo de marca, probabilmente studià dai grandi stilisti Dolce e Gabana....
- Ahhhh... hhhh... ah.... eco la logica feminile: un duo di recion-ghei produce una vacata, la piassano sul marcà, ascolta o zotica il mio esilrante zugo di parole che al confronto Le Bronse Querte fano afano, na roba de marca al marcà, e le senpie globali, le musse asinine cofà ti, corono come cani da lievori co i schei in boca cronpano, pagano sinquanta carte dee mie come gnente fusse e pretendono che el marìo, che su sto caso scarognà sarebi io, se metano intorno el corpo l’oribile manufato... Ma digo, sito ebete.... o zelo un dono de natura sta to ignoransa asinina?
E co questo pensavo che la triste storia del pijama slanbricià fusse finio, ma la roba invesse na avuo un seguito... La sera drio frugno nei casseti par catare el me solito pijamin e no la cato più... Alora rifrugno par catare el cava e meti (sarìa quelo de riserva) e gnente sparìo anca quelo. In conpenso cato el sacramento novo. Alora par evitare spiacevoli discussion che oltre a ronparme el sono a mii gavarìa turbà anca i estracomunitari che vive petà darente casa mia, porchesando somessamente, me inpiro la jacheta e sgiavento co un peadon le braghesse soto al leto.... Fasso par infiarme soto le coverte quando la femena me dise:
- Ciò, come mai no te te meti le braghessete?
- Parché no le meto mai, me pare logico, e po’ pardessora mi fano spissa....
- E mi invesse vojo che te le meta, parché no me va de avere in leto el mario in mudande co le ale dela canotiera che vien fora dale ganbiere....
Bon, par farla curta me inpiro anca le braghesse me vardo al specio e, orore, me inacorso che invesse de calare el schifoso de indumento ze cressuo: le maneghe desso le cresse de boni vinti sentimetri, le spale me riva ai gumii, el colo ze talmente slanbricià che podaria contegnere el colo de Papalardo el cantante rabioso che col siga fa el colo come el bacino del’aquedoto dela Tergola Le braghesse po’ no ghe ne parlemo: el cavaloto me riva ai garitoli e le ganbiere finisse de strasson sul pavimento che se fasso do passi me strabuco, cado in tera com un saco de bietole e me spaco femori, clavicenbali, osso sacro, osso profano e anca el cocige, che no lo so cossa ch’el sipia ma el ga da èssare de sicuro darente al culo.....
(Continua e finisse doman)
Dal’Oco 2006 de Walter Basso
COMMENTA (0 commenti presenti)
-
PERMALINK
sabato 7 luglio 2007 - ore 12:43
LA STORIA VERA DEL PIJAMA (prima pontata)
(categoria: " Vita Quotidiana ")
El prologo
Nela ridente, salubre e fiorente (tuti agetivi insulsi che no vol dire un casso!) canpagna venete el pijama maschile ze senpre stà considerà un capo inutile, na frivolessa solo par nobili e siorati. Par questo i rudi agricoli ze senpre andai in leto in canotiera e mudande d’inverno e nudi e nade co le balote al vento d’ista...L’indumento in question vegneva conprà dale casalinghe agricole solo in caso de ricovaro ospedaliero, anca parché védare in corsia un sopon in socoli capeo de paja, braghe de frustagno e camisona de flanea no pare bon.... Un sopon invesse in in socoli capeo de paja, ma co un pijama a righe (gavìo mai notà che i pijami dei agricoli ze SENPRE a righe par longo?) fa bel védare.... Naturalmente el boaro come tornava casa guario sgiaventava el capo intimo inte na cassea e là questo guaceva in meso ale balete de naftalina pae ani o secoli.... Quindi podemo afermare che el pijama gera l’unico indumento solo in version “Meti” sensa el famigerato “Cava”, che vorià dire Cava & Meti overo uno itorno e uno de ricanbio.....
Anca Dolce e Gabana ze do che cava e mete, ma questo ze un rajonamento che sfocia nel sessuale ano-malo in quanto i do ze ghei.
Quindi no i centra gnente col pijama. E me sfuge come mai i sipi entrà in sto raconto...
Mah....
Vegnendo a mi, da bon veneto, provo un atavico odio contro sto indumento in particolar modo co la parte soto, overo le braghesse, e quindi evito par quanto possibile de metarmelo, contro l’opinion de me mojere che asserisse che un omo che va in leto in mudande ze agricolo, sopon e maleducato e in particoler modo mi chge sò un scritore go l’OBLIGO MORALE de fare l’omo fineto!!!!.... OBLIGO MORALE DE FARE EL FINETO.... A MI????....
Benon dà sta inportante delucidassione entremo nel vivo dela question....
Inissia del drama noturrno
La storia taca co un colpo de mato de me mojere che colpia dal Morbo del Saldo riva un giorno casa co na borsa incalcà de strassoni... La riva in cusina coi oci fora dala testa come un s-cioso e la taca frugnare dentro come un can da usma e tra le varie porcarie la tira fora un pijama novo fiamante:
- Varda che ocasion che go catà: in pura lana sintetica, colori de moda, tajo atuale.... un pressacio par un capo osarìa dire berlusconiano, da lusso sfrenato... Da doman te vien il leto co questo.... vojo vedarte in ordine anca co te dormi...
- Scusa cara, - digo mi co vosse meliflua (uso sta tennica par disorientare el nemico: la femena sentindo la vosse caressevole sbassa la guardia e mi ala fine del discorso aprofito pr sgiaventarghe na slepa psicologica da quintale drio ale rece... po’ rido de gusto!)... me sbalio o so za paron spotico de un cava e meti de pijami, che paraltro no doparo mai, visto che i me fa afano....Al massimo quando proprio bato le broche me inpiro una dele majete a casacio... Se la logica no mi ingana posso afermare co sicumera che uso el pijama pochissimo e solo al 50%... No te pare, quindi, amore caro amore belo, che l’aquisto de un terso incomodo sipia na vacada degna de na grandissima testa da peri coti comercialmente deficente ahhh...ahhhh....ahhgrhhh....??? ( questa ze la slepa pissicologica!)
- Oltre che maleducato, salgaro e mona ti te ghe da èssare rincojonìo totale.... No te usi el pijama te me ghe dito?: e alora come spieghito la facenda che sto istà, na matina, te sì andà prima da Renato Tessaro el tipografo e po’ in in Banca a coloquio dal sior diretore Marino Bernardi co la majeta del pigiama a quadreti e le savate da dentro????...
Giuda can, la bestia ga na memoria de fero!!! Purtropo el fato gera veritiero: la roba gera sucessa veramente e se la belva no gavesse fato na publicità vergognosa co tute so amighe, le conossenti, i passanti, le clienti incontrae casualmente al supermercato nissin savarìa gnente.... A sto punto bisogna tanponare la fala:
- Ciò paciolosa che no te sì altro no te lo sè ch i artisti e i geni ze distrati???... El fato alora significa solo na roba: che ti indegnamente te ghe sposà un artista e invesse de vantartene e tegnerte in buono vai di girandolone a contare storie banali sintomo di mente inferiore... Vergognanate vilanacia zotica che no sei altro!!!!
(continua)
Dal’Oco 2006 de Walter Basso
LEGGI I COMMENTI (2)
-
PERMALINK
giovedì 5 luglio 2007 - ore 12:47
ALTRO ASSAJO DEL ME NOVO LIBRO "MONADE BIBLICHE"
(categoria: " Riflessioni ")
Capitoleto trato fora dala istoria de Davide & Golia ( el libro sarà fora a breve... sirca 20 di)...
... Raquanti soldati paciolosi riferiscono a Re Saul l’idea de Davide. Il Re prima sganassa poi si convinse e autorisa Davide a tentare l’inpresa. Davide si arma e copa Golia
Cussì Re Saul convoca urgentemente el tosato e lo interoga sule so intension:
- Scusa caro, mi consenta, ma ze vero quelo che gò sentìo dire?... overo che ti te voressi copare Golia??? - e qua ghe ze sbrissà na ridadina.
- Sissignor, - ribate Davide convinto - e el varda ecelensa che ghe ze poco da rìdare…
- Cribio, ma se te sì na mèsa sega??? Quelo, che oltretuto ze un comunista sfegatà e marso, te ciapa e co na spadà te verze in do cofà na tenca da chilo e po’ el te sgiaventa su par el muro cofà na strassa moja de un moeta!
- Calma signor re, el varda che mi na volta co un pugno in mèso ai oci gò sbarossà un lion che voleva magnarme na piègora e na volta go strossà na tigre dela magnesia co ste manine!!!
- Ma fame rìdare… No ghe credo gnanca se vedo… Ti co ste manime al massimo te poi zugare a sinque contro uno ahhh… ahhh… ah…
- Come sarìa a dire?... - ga domandà Davide che gera anca ingenuo.
- Farte pipe… Tante pipe… Caro…
- Poche ciàcole capo - siga Davide - lu me meta par iscrito che el me cava l’Ici, me fa deventare sior, me da le agevolassion par rancurare i me veci e soratuto me da le tet… la man de so fiola e mi doman de sera ghe porto la testona del mona de Golia sora na guantiera de peltro!
- Va ben… Ma se no te me la porti e par puro caso te torni indrìo vivo te circoncido violentemente co la forfe da bruscare cai!!!
- Ma mi sò za circonciso!!!
- No inporta caro.. Mi te ne tajo altri diese centimetri, cribio!!!! E desso fuoriessi dai reali coggioni, che gò da pensare!!! e da pareciarme puito parché stassera vago in onda su “Tenda a tenda” de Bruno Brespa I°… Cori beo, passa in ufficio che i te arma!
- Come i me arma???... - cria Davide che ze sì mona ma no recion-ghei.
- Ma cossa capissito, toco de monna!!!… I te arma in senso lato!
LEGGI I COMMENTI (3)
-
PERMALINK
lunedì 2 luglio 2007 - ore 12:38
I DIFETI MORALI DEL ESENPLARE VENETO
(categoria: " Lavoro ")
na figura = porca un lazzarone
na smanegà de figure porche = un gruppo di lazzaroni
na bronsa querta = un furbetto
un èbete; un mona; un macaco = un cretino
un basabanchi; un stuamòcoli; un magnapartìcole = un bigotto
un cagainbraghe; un fifon ? un pauroso
un tegnoso; na caìcia = un tirchio
un bonasson = un bonaccione
un teston; un sucon = uno zuccone
un lilon; un palpacioche = un perditempo
un saltron = un cialtrone
un slandron = uno sciatto
un ludro = un uomo sporco
un pitoco; un porocan, un poareto = un povero
un nane; un baucoto; un fanfe = un semplicione
un àscaro; vilan; rispondon; sensa creansa = un villano
un àscaro; un rufaldon; un molton; un rùstego = un rozzo
na soetona = una donna di una certa età che fa la civettuola
na betònega = una donna sempre in giro
na ciacolona; na paparona; na batolona; na paciolosa = una chiacchierona
(dal "Corso de veneto par veneti e foresti" de W. Basso e Silvano Belloni)
LEGGI I COMMENTI (2)
-
PERMALINK
sabato 30 giugno 2007 - ore 12:20
MI LA VEDO CUSSI’....
(categoria: " Vita Quotidiana ")
Sul laoro
Ogni dì se sente strepitare che i estracomunitari vien in Italia a portarne via el lavoro. Eco a mi che qualchedun me porta via el lavoro no me preocupa proprio par gnente... Eventualmente taco preocuparme quando qualchedun me porta via el stipendio o anca solo la bicicletta.
Fisica elementare
Un noto siensiatto fisico ga afermà co sicumera estrema che se se sgiaventa zo dala tore de Pisa do gravi intel vodo questi riva zo insieme... O calcossa del gènare.... Mi vago oltre e afermo che, sensa onbra de dubio, se se sgiaventa zo da na qualsivollia tore, palasso, o monte, do gravi questi co i riva zo i ze morti!!!
Mancansa de bonsenso
Un vecio, ma come sempre sagio, proverbio veneto aferma solennemente che “El matrimonio ze cofà na trapolona par i sorzi: queli che ze dentro farìa de tuto par vegnerghene fora e queli che ze fora fa de tuto par finirghe dentro!”… Ostrega se ze vero! La dimostrassion lanpante ze che da na vita la zente sposà ga lotà cofà dele bestie par avere el divorsio in modo che apena i se ze ben roti le togne otegnere l’agognata libertà e desso cossa ze drio succedere?: le ùniche do categorie tutelae par lege, notè ben, contro i pericoli del matrimonio, formà da preti e dai ghei cossa sighei a tonfon che i voe?... El matrimonio!!!... Mah, vala a capire ti la zente!!!
COMMENTA (0 commenti presenti)
-
PERMALINK
venerdì 29 giugno 2007 - ore 21:15
A RAMENGO EL MONDO!!!!
(categoria: " Vita Quotidiana ")
Giuda porseo stracan, che setimana de merda!!!!... Gò un cugnà al Centro Galuci operà par via dele vene ingorgà cofà tonbini, n’altro me cugnà in pronto socorso cl bocieta co la freve a quaranta, n’altro mè cugnà il leto col mal de testa atroce da na setimana, e n’altro cugnà ancora stugo agro che no ghe ne poe più e strassina i piè cofà un vecio tabacon... Vito el sagio deto che dise NO SE MOVE FOLLIA CHE DIO NO VOLLIA quasi quasi mi ghe gnaco in coste un solene PORCO QUA E PORCO LA’!!!!
LEGGI I COMMENTI (3)
-
PERMALINK
mercoledì 27 giugno 2007 - ore 18:49
VARDA CHE MESTIERO: MI UN POCHI DE ANI FA!
(categoria: " Vita Quotidiana ")
Tra la montagna de ratatuja, foto de morti e de ronpicojoni vari ze saltà fora sta someja indove mi, ecletico chitarista in fase esecutiva, sono dietro fare un cosideto assolo durante un concerto del grupo roc GLI ANACONDA (formà da un baterista: Franco Boromelo muraro, un tastierista cantante: Dino Masson formajaro) del quale gero lider indiscusso (nonché pelandron acuto) nei favolosi primi ani setanta... L’esibissione, premià da aplausi roboanti, che rimarà inperitura nela storia dei grandi chitaristi si era svolgesta ala Festa del Pevarone a Zero Branco... Preciso che il reperterio gera formà da canson dele Orme, New Trolls, Deep Purple, par el pubrico rafinato e da canson de Pupo, Arieta Berti, Gioni Doreli par el pubrico de soponi.Si prega di notare la scultorea belessa di me stesso medesimo!!!
LEGGI I COMMENTI (9)
-
PERMALINK
mercoledì 27 giugno 2007 - ore 18:23
CARO MANFRE!!!! (Comunicassione de servissio!)
(categoria: " Vita Quotidiana ")
Dopo aver lassà l’amigo Manfre (noto operatore de Strissia) col dubio atroce de essare tolto par el sesto AFERMO SOLENEMENTE che in realtà lo stimo tantissimo parché el ze na otima persona e co un gran senso de amicissia... Quindi intono un VIVA MANFRE!!! e prometo solenemente che la prossima tolta par el sesto sarà dedicà al socio STEFANO!!!
Lo sò che de sta roba ai sprissini poco ghe ne ciava ma el brog ze mio e de conseguensa drento ghe sgnaco e scrivo che casso me comoda!!!!.. e a chi no ghe va ben chel vada a farse ciavare.. che po’ me incasso, Giuda porseo can!!!
Poderoso aplauso spontaneo a Manfre!!!!
COMMENTA (0 commenti presenti)
-
PERMALINK
martedì 26 giugno 2007 - ore 08:53
IL CANTONE POETICO: ode ala fritela
(categoria: " Vita Quotidiana ")
Publico co enorme piassere questa stupenda lirica, fruto de na mente ecelsa, scrita da un me letore, Roberto da Ancona, Naturalmente visto l’inportansa bestia del’argomento tratato go incaricà Nane & Toni Fracanapa, miei ilustri critici, de comentare l’inponente opera.
No a Bacco, no al tabacco, ma che Venere vegna tuti i giorni de l’almanaco
Chi che beve massa
prima o dopo
deventa na strassa.
Chi che tropo fuma
prima o dopo
i palmoni se consuma.
Solo che nel ciavare ze costante,
prima, dopo e durante
el va dentro e fora da la mona come un rasso
par el piasser de l’amigo casso.
Notevole e sentita opera che rachiude in se stessa tuto il variegato e intrinseco vagheggiare dell’essere umano in sorte. Già il titolo tipico del movimento post-ungarettiano del porco Giuda abbracia in forma catarifrangente nonché atavica tutta la tensione del maschio in calda che, dopo ponderata riflessione, rinuncia al vino, al fumo, ma col cazzo che rinuncia alle donne per le quali nutre gran ammirazione soprattutto quando l’esemplare feminile è nudo, in posizione orizontale e a ganbe aperte... Notevoli poi, nella lirica, le metafore che usate con parsimonia e leggerezza tingono il testo di oscure ma presenti rimembranze di memoria leopardiana. Inponenti rime (massa-strassa) conferiscono al poema forza, incisività, e altre robe che no semo boni de dire... ma che gavemo sula ponta dela pena... Ehmmmm... Ma le più alte vete dela poesia si trovano nel su e zo del casso ( definito grande amico, quando che no’l fa el macaco!) che, paragonato al mitico razzo che portò gli uomini sulla luna-lunatica, scorre nela pistagna procando grazie all’attrito tenperature tipiche da altoforno... Co questo gabiamo finito e aspetiamo pestugnando i centoe cinquanta euri che il semo del Basso ci ha promesso se no scrivevamo vacate come al solito.....
"Ogeto del desiderio" di Paolo Picasso . Museo "Stala del Mas-cio" a Boara Pisana Rovigo
LEGGI I COMMENTI (6)
-
PERMALINK
> > > MESSAGGI PRECEDENTI
[ SONO OFFLINE ] 