Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
sabato 18 novembre 2006 - ore 08:36
TON CRUISS SE SPOSA COL RITO DE SCIENTOLOGY!
(categoria: " Cinema ")
Chi ze che conosse scientology?... La me so mama de dianetic (gavio presente quei malnati che fa i interviste longo el corso e ve fissarve un apuntamento?... Eco:quei fa parte de sta setta de alochi nata in Merica dala mente astuta del scritore de fantasiensa Ron Hubbard el quale stufo de scrivare ciapando poco, un dì ga afermà: " Ze da bauchi scrivare par ciapare un penny a parola quando fondando na religion se poe ciapare milioni de dolari!" e dal dito al fato el ga fondà Scientology che ze na acossalia de idee tirà fora dal cristianesimo, budismo, scienza, fantasiensa, ufologia, e caca varia potentemente smissià insieme ala bojona o ala dio te sbrisa... Ti te entri in te sta setta te studi e paghi, studii e paghi paghi e paghi e col tenpo te devento OT3 overo uomo nela luce: praticamente te sì Dio: te poi passare traverso i muri, avere el dono dela bilocassion, essare esente dale radiassion atomiche, e incontrare i estraterestri... OT3 peocioso in quanto i schei te li ga ciavai tuti lori... Sta cagada ga ciapà in tute le parti del mondo e nei ani 80 ze rivà anca in Italia: uno dei primi a farse inculatare servelo e schei ze stà un me conossente che grassie a sti fioli de troia ghe ne ga conbinà de tuti i colori e ga roto i cojoni a mezo mondo soratuto ai pori dipendenti... Ma pian pianeto ve svelarò varie robe su sta seta de cui fa parte oltre a Tom Cruisss anca Gion Travolta e un mucio de altri astitissimio personaj del mondo mondo de prastica (celuloide)
Questo ze Ron Hubbard el fondatore de Scientology, Dianetics e Narconon (un corso che guarisse inamtinente - pagando s’intende - i siori drogati!.)
LEGGI I COMMENTI (5)
-
PERMALINK
venerdì 17 novembre 2006 - ore 09:51
DOMANDA:
(categoria: " Riflessioni ")
Ma secondo vialtri, nialtri gavemo la television che se meritemo o ne gai educà pian pianeto par darme ste vacade e magari farmele anca apressare????
El rincojonio
.jpg)
El lecaculo (mona)
.jpg)
El miliardario
El serial chiler dea lengua italiana
.jpg)
Le subret (leterine, veline microfonine ma sopratiuto pecorine!)
LEGGI I COMMENTI (10)
-
PERMALINK
giovedì 16 novembre 2006 - ore 19:23
PROF. SE FA TRONBARE DAI ALUNI... PARCHE’ SE STUPIMO?
(categoria: " Riflessioni ")
Me spiego: d’acordo che la vicenda ze assurda e svergognosa ma mi me domando: PARCHE’ SE STUPIMO? se nela famosa cagada televisiva in onda su Canile 5 I CESARONI,queli che a dita dela pubricità ala domenega de sera vegneva catarte casa tua, i ga contà la storia de un tosatoto che se tronbava la prof de italian e se gaveva inamorà de so soreastra sfiorando quasi l’incesto?... E alora digo mi parché no presentemo anca na fiction indove un paroco molesta i toseti e un pastore se tronba na cavara???... Cussì magari se qualchedun a ste solussion no ghe gaveva pensà ghe dasemo un spunto!... E dopo in television i parla de tivù spassatura?... TIVU’ DE FOGNA i dovarìa ciamarla, altro che bae... E dopo zo ipocrisia, retorica e servissi fin ala nausea sensa che nissin se renda conto che le prof. seme e onte che fa sesso coi tosati, i tosatei che violenta le tosete, i ze fioli dela nostra cultura... MA CHE VAGA IN MONA I CESARONI E ANCA BONA DOMENEGA... Dasime Lessi, Fonsi e Maiche Bongiorno.. el sarà anca mona ma almanco el me fa dormire!!!!
LEGGI I COMMENTI (5)
-
PERMALINK
mercoledì 15 novembre 2006 - ore 17:32
DEFINISSION DE ALTO LIVELO!
(categoria: " Riflessioni ")
Agricoltore: boaro col telefonin
Cronometro: relojo pignolo al massimo
Dermatite: particolare tipo de matita par scrivare sula pele
Dio: el signor del piano de sora
Ecologia 2004: in natura gnente se crea, gnente se conserva, tuto se desfa!
Famiglia: grupo de persone unìe da vincoli de sangue e divise par motivi de intaresse
Febbraio: el mese nel quale le done parla de manco
Gambero: unica bestia che funsiona solo in retromarcia
Imbianchino: omo senpre pronto a dare...na man!
Isola: un buso inte l’aqua inpienà de tera
Lepre: un conejo da corsa
Levatrice: el contrario del bechin
Legno: materia prima par fare le piante
Latte: spremuta de vaca
Libero pensatore: omo che no ga la mojere
Moglie: suocera al primo stadio
Oculista: ocio par ocio, lente par lente
Pompe funebri: l’unica botega dove no se dise mai al cliente: “Prego el se acomoda in cassa!”
Rete: insieme de busi tegnui insieme da na corda
Turista: un vagabondo coi schei.
Vagabondo: un turista sensa schei
Vedovo: un condanà che ga riaquistà la libertà
.jpg)
Cinghiale
Porseo: overo cinghiale che ga fato la chemioterapia!
LEGGI I COMMENTI (1)
-
PERMALINK
lunedì 13 novembre 2006 - ore 17:42
MALEDETI SIA I PARENTI!!!
(categoria: " Riflessioni ")
Se ghe ze na categoria che me stà pesantemente sui ovi questo ze el parentado (miga tuto par carità!)... Parlo de soratuto del parentato più streto quelo che fa parte del me misaro albaro ginecologico... Porco zio, i me spaca le bale in modo vergognoso... Quanta sagessa ghe ze nela batuta de Dino Durante che ga definio i parenti: " grupo de persone che more senpre massa tardi!!!"... Scuseme el sfogo!!!!
LEGGI I COMMENTI (6)
-
PERMALINK
domenica 12 novembre 2006 - ore 11:04
ZE IN ARIVO L’OCO 2007 EL ME ALMANACO UMORISTICO!
(categoria: " Lavoro ")
Ecove un assagio de quelo che se poe catare, oltre a barzelete, vignete sol me almanaco mato che se catarà in edicola verso fine mese... Se voi savere el resto dela storia bisognarìa avere el libro....
TONI PEANCIA E I PORSEI SUINI
(ogni riferimento a robe, parsone umane, porsei, mojere varie ze puramente casuale)
Prologo ilustrativo
Lo gò za scrito ani che furono ma ribadisso el conceto: el me confinante, che par comodità ciamarò Toni Peancia invesse del vero nome, da ani gaveva, pian pianeto inpiantà un solene alevamento de porsei a do metri dal confin che oltretuto ze da secoli a sirca un metro dal balcon del me studio.
Bisogna che precisa subito che Toni ze sempre stà un amante del ludro suino in gènare. El gera partìo ani prima co un mas-cio estremamente ingordo, antipatico e onto, al quale el ghe gaveva dà l’eclatante nome de Costanso.
El se lo cocolava, se lo caressava e ghe portava, co amore estremo, imense sece de spussolenti e marse porcarie… Costanso ringrassiava a modo suo, tirando la boca come un musso, rodolàndose intel paltan, spussando cofà un loamaro e ingolfandose come un porseo (?).
No de rado sucedeva che mi, durante i difissili parti leterari, butando fora l’ocio dala finestra onde incontrare la musa ispiratrice me catasse davanti, invesse dela musa, el muso, o mejo el sgrugnasso del porco suino che me vardava co un severo sguardo carico de antipatia e de disaprovassion.
Probabilmente l’onto bestio doveva aver leto qualche me libro.
Mi soportavo stoicamente pensando che a novembre Costanso sarìa stà legalmente assassinà e che probabilmente el me vissin, in rispeto ale antiche tradission che regolava i raporti de vicinato, me gavaria portà el cosideto “sòssolo” overo le frataglie de Costanso …
Lu me vardava male ma mi soridevo pensando ala sbafada che me sarìa fato co el so figà… Me despiase, caro letore, ma mi sò fato cussì: l’amore aminalista no ze el me forte!!!...
Ma tachemo parlare al presente che me cato più mejo coi verbi!
La scarna cronica
Benon, disevo, soporto stoicamente spussa orenda, nuvole de mosche grosse cofà el senpio de Ferara che ogni mesodì e sera se inpegna fora dai modi par vegnere, prima becarme, e po’ scagassarme inte piato, sgrufolamento acuto ale do del dopomesodì quando vago fare el soneto, finché, finalmente riva el gran giorno: ai primi de novembre Costanso vien brutalmente sassinà e mi resto in vigile atesa de un toco de figà e un chilo de brasole del bestio…
Ma el me vissin fa bao e mi resto a stómego vodo… Cussì, quando l’ano dopo un bel dì me vedo osservà no da un lujo ma bensì da do, me vien sù le fumane-caldane e taco a resie…. Osservo atentamente i do schifosi animai e ne deduco che i ga da èssare marìo e mojere… Infati i fa dele barufe orende co sberegamenti acuti e in contemporanea direta i produse na spussa pari a quela de tre loamari de media grandessa e na nuvola de mosche che beca mostruosamente…
Me mojere taca sbecare matina, mesodì e sera e me impone de ciamare urgentemente Toni par darghe na onta de quele soleni… Infati lo convoco casa mia e ghe digo che par st’ano passa ma se l’ano prossimo davanti ala finestra del me studio vedo anca solo un grugno de porseo vegnarà fora la tersa guera mondiale…
L’oribile batalia, spiego tra le righe, podarìa vegnere sospesa nel caso che casa mia rivasse na pèrtega de saladi co l’ajo, un paro de sopresse da chilo, tre cope e un oto chili de brasole co l’osso… Ma Toni fa finta de èssare mona e me fa capire no solo de no èssare bon de lèzare tra le righe ma gnanca de èssare in grado de lèzare le righe. Gnanca se le ze scrite in grando e in stanpatelo… Però, me fa na promessa solene: spostarà la stala del mas-cio a ben venti metri dal confin… Me considero vincitore e speto. L’ano dopo, infati, dal me studio no vedo più un casso, ma la spussa riva sempre più potente, cussì de scondon vago védare dove el ga piassà la stala e me inacorzo che st’ano i porsei no ze più do ma bensì tre: el sassin de Toni se ga modernisà e ga messo sù la fameja alargata: marìo, mojere e amante del marìo… Quando el livelo dela spussa ga raggiunto un livelo tale da massare un cavalo lo riconvoco casa mia ed ecove el costrutivo dialogo:
El dialogo costrutivo (lo gavevo za scrito sora!)
W: - Toni, bruto viliaco, che dio ti sbreghi par metà, hai forsanco intensione di vèrzare un porselificio?... Come si spiega che ogni ano aumenti di una unità il nùmaro dele spussolenti bestiace suine? Vuoi che la nostra ridente e amata via diventi la nuova Porselandia?
T: - Enbè, cossa ghe entra desso el nùmaro?... Te avevo dito che gavaria spostà la stala? Gò eseguio e desso mi, casa mia, fasso quelo che vojo!.. Ciaro?
W: - Ciaro na tega!!!... In primis purtropo la to spussa infame me la snaso anca mi casa mia … In secundis, insieme co la spussa orenda, mi ciucio anca uno smerdaro di mussati, mosche, mosconi e tafani che becano tuta la mia famiglia e in finis, mi sono roto le balotte umane di sentire sgrugnolare a tute le ore; quindi tu da l’ano prossimo no alevi più gnanca uno e digo uno, porsello se no io…
T: - Senò ti cossa???
W: - Senò io ti denuncio ale autorità competenti e a quele inconpetenti, al WWF par maltratamenti a animali, al’uficio igene par spussa inconsulta, ala Digos par atentato a mezo armi chimiche e po’ ti guanto par il colo taurino e ti sguarato cofà un àlbaro di nose…
ecc...ecc...ecc...
LEGGI I COMMENTI (4)
-
PERMALINK
sabato 11 novembre 2006 - ore 18:48
SPECIALITA’ MEDEGA PAR LE SIGNORE DONE!
(categoria: " Vita Quotidiana ")
Pincionil forte
Conposission: il pincionil forte ze on farmaco incalcà de sostanse nobbili proteliche nonché vitaminiche, co conponente base Caz2 O
Indicassion: el Pincionil ze sta definio dai più grandi lanpadari dela siensa* rimedio sicuro contro malinconia e l’isterismo.
Posologia: le Signore lo chiapano in qualunque momento in qualsivollia periodo de l’ano sia prima che dopo i pransi (raramente durante); lo prendono di notte e anca di matino e se lo ciuciano de gusto. Le ragasse di primo pelo fano fatiga a familiarisare col prodoto, cussì dele volte lo chiapano in mano par scorlarlo samenando cussì in girro vitamine e proteline nobbili soto forma di naratoboli testoni. Na volta abituae però no le sarà più bone de stare sensa e le sercarà de ciaparlo in dosi senpre più massice In casi ecessionali si prende anca par boca... Anca i omani pole ciaparlo ma solo se predisposti a particolari inclinasion di 90°. Sti omani ciapando el Pincionil deventa col colorito rosa porseo, vosse fina, ciape s-gionfe, mossete da cula. (vedi R. Zero)
Efeti indesiderati: l’abuso del prodoto provoca nausee, s-gionfore de pansa, ingrossamento de tete. Anca la sparission del Sig. Marchese par circa nove mesi. La casa costrutrice consilia l’uso in apositi sacheti di goma.
Avertense: sguaratare prima de l’uso fasendo però atension a no spandare, par via che so sto malaugurato caso el deventa inservibile par almanco oto ore.
Confession: el Pincionil ze a disposission in qualsivollia formato. La casa però consilio el formato gigante. Vien fornio senpre co do sfere contenenti la carica de sostanse vitaminiche
Scadensa: quando el contenitore se storza e ingruma durante l’uso se pole butare via tuto e sercarne uno de confession più fresca.
LEGGI I COMMENTI (3)
-
PERMALINK
venerdì 10 novembre 2006 - ore 14:58
FINIA L’ISOLA DEI FAMOSI?
(categoria: " Riflessioni ")
Me sbalio o l’emerida cagada catodica intitolà "L’ISOLA DEI FAMOSI" ze finalmente finia????...Essendo uno che ga dà rapide ociade ala senpiada solo pochi minuti prima de andare in cesso onde velocissare la spussolente funsion, marti me pare de aver capio che la gera l’ultima sera.... Se cussì fusse manco male: basta zente che siga a tonfon, basta opinionisti del casso che spara monade, basta colegamenti co quatro mone che porcheza, cria, ride, se lagna, fifota, magna, ruta, scoreza... Fora dai cojoni anca la senpia de Sventura che sigava più forte de tuti come se la fusse drio presentare dei premi Nobel e no quatro pajassi... Me despise solo chge sicuramente desso i raquanti cosideti "famosi" se li ciuciaremo par un ano a far tapesseria in television. A RAMENGO I REALITI, VIVA BEPI E MARIA SHOW, MORENO MORELLO, I BEAT SHOP, E TUTI I SPRISSINI/E CHE LA PENSA COME MI!
[
LEGGI I COMMENTI (3)
-
PERMALINK
mercoledì 8 novembre 2006 - ore 20:58
I AFARI ZE AFARI!!!
(categoria: " Vita Quotidiana ")
Na bela tosa de venti ani riva casa desperà e confessa a la fameja che el paron dela frabrica indove che la lavora la ga messa insinta... Sto porseo de un onto!... Alora el pare dela tosa intavanà fora dai modi dise:
- Ci penso me a lo slandrone porco, pinciadore di oneste fillie del popolo. Desso vago là i li facio el dadrìo cofà un pitarro da sparasine... (l’omo gera rafinato: normalmente i popolani dicono “el culo cofà na farsura”)
E dito fato el se presenta dal paron che lo acollie a brassi verti e esordisse:
- Lo sò caro, cossa che el ze vegnù dirme. Ma prima che el parla vojo dirghe calcossa mi: se nasse na tosa me inpegno a trovare na casa da sento milioni par la vaca e la vedela, più ci zonto sora do milioni al mese par el mantenimento (oltre al solito stipendio) e na dota de dozento milioni quando che ga gavarà disdoto ani...
- E se nasse un toso? - balbeta l’omo.
- In sto caso fortunà - resta fermo el valore dela casa, i milioni par el mantenimento deventa quatro più un conto corente fato col ga tre mesi de mèso miliardo... Cossa ghe pare? Zela na proposta onesta? Se la ghe piase go za pronto el contratin... a mi me basta che no vegna fora casini.
L’omo dise de sì e taca lézare el contrato. A un serto punto però el taca sgorlare la testa co disapunto.
- Cossa ghe ze che no va? - dimanda spasemà el paron.
- Me dispiase sior ma no ghe semo... qua manca na roba inportante... se no no se fa gnente...
- Ma come? - siga st’altro - cossa volo più de cussì?: el me diga lu cossa che manca, chel can de Iscariotola...
- Bisogna che el zonta na postila: se sputacaso me fiola abortisse bisogna che el me garantissa che la stramassa ancora fin che la stà insinta da novo... Va ben?
LEGGI I COMMENTI (4)
-
PERMALINK
lunedì 6 novembre 2006 - ore 08:53
SO’ IN EDICOLA!!!!
(categoria: " Lavoro ")
Da doman, marti, in tute le più mejo edicole de Padova e Provincia ghe sarà el me novo libro IN ALTO IL MORALE! e el novo Calendario del’OCO INBRAIAGON 2007.... va cussì a conpletarse un lavoro durà me in conpagnia de Fred de Bepi e Maria Show.... Un lavorasso, ad onor del vero... Ma ghe ze za le prime sodisfassion: el libro ga tacà bone vendite e anca el calendario ze za invià ben... Ma speta che ve mostro le me nove creature:
.jpg)
.jpg)
LEGGI I COMMENTI (4)
-
PERMALINK
> > > MESSAGGI PRECEDENTI
[ SONO OFFLINE ] 