Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
sabato 15 luglio 2006 - ore 12:43
DEFINISSION INTELIGENTI... L’OCO INFORMA EL POPOLO...
(categoria: " Vita Quotidiana ")
Berlusconi: tanti dise che el ze basso: no ze vero. Come nano el ze sula media!
Bigamia: tentativo de risòlvare un problema creandóghene n’altro
Biscardi: più me spiego, manco me capisso!
Guinzaglio: toco de corda che parmete ai cani de menare in giro de baucon le vecete
Lapidare: rinproverare co le piere
Logica: casa mia ze piena de formighe parché nissun ze sta bon de inventare preservativi picolissimi!
Lupara: calcolatrice del mafioso
Matrimonio: duelo a cornade
Mèdego specialista: uno che ga fortemente ristreto el canpo dele so incapacità!
Ossio: el più economico e riposante dei vissi
Pedone: omo che ga na màchina ma anca un fiolo de disdoto ani!
Peocioso: quelo che denuncia la "miseria stabile", finisse i schei e vansa un poco de mese
Sior: quelo che denuncia la "richessa mobile", finisse el mese e vansa un pochi de schei
Riflession: ze vero che la paura fa novanta, ma me nono ga tacà strénzare le ciape a sessanta!
Ronchesamento: l’ùnica vera musica da càmara
Ronchesare: dormire a alta vosse
Suicida: un depresso che ga pressa
Urologo: mèdego che pensa senpre ai cassi dei altri
20 anni: el vien duro par gnente
80 anni: no’l vien par gnente duro!
.jpg)
COMMENTA (0 commenti presenti)
-
PERMALINK
venerdì 14 luglio 2006 - ore 11:44
EL CANTONE DELA POESIA SOLENE!!!!
(categoria: " Vita Quotidiana ")
IN MACHINA, DE NOTE
de Jacomo Leopardo
Semo qua, soli mi e ti,
sentai in màchina,
col rumore dela piova che bate
sula lamiera e sui verì...
E parlemo de nialtri
dele nostre indiferense
dei nostri dubi
dele nostre paure...
Po’ de colpo mi scanpo via
distante da ti,
come un ladro nela note.
Sento brividi sula schina,
dolore che me strenze le buele...
Cussì me scondo tremante
tra el verde dele foje
bagnae dala piova che cade...
Ma de colpo me sento ben
l’universo amigo se slarga,
La pace ritorna nel core...
Che bruta roba el scagoto, tosi!!!!
Fotosomeja del poeta nel posto più adato a lu!
LEGGI I COMMENTI (3)
-
PERMALINK
mercoledì 12 luglio 2006 - ore 20:07
LA RIFLESSION DEL GIORNO!
(categoria: " Vita Quotidiana ")
“Le done se sposa senpore manco parché le preferisse aver un salado in frigo pitosto de un porseo intiero in leto”
porcazzo overo el porseo più amà dale done!
COMMENTA (0 commenti presenti)
-
PERMALINK
martedì 11 luglio 2006 - ore 12:50
Filosofegiando de qua e de là
(categoria: " Riflessioni ")
A proposito de mone
Tenpo indrìo, in un paeseto qua darente, ze morto un vecioteo, umile, porocan e anonimo. Ma che comunque, nela so umiltà, gera na brava e onesta persona. Sicome el gera un me parente ala longa ( questi ze i parenti che apresso de più) go pensà che fusse giusto che partecipasse al so funerale. Cussì me so presentà in ciesa e go deciso na volta tanto de sfidare l’alergia teribile che go par sto posto. Bon, taca la cerimonia co poca zente, sensa fiori e sensa la deprimente musica de organo che de solito indormessa mèso publico.El prete taca el discorso e el esordisse cussì: - Cari frateli, siamo qua ogi co due tristi avenimenti: prima el tenpo ze bruto, piovisina, e ghe ze nebia. Secondo fasemo el funerale al poro Tilio Capeta che ga lassà sta vale de lagreme...etc...etc... - Putama bestia so stà romaso!!! La prima reassion sarìa stà quela de alsarme in piè e sigare:
- E no, caro Paroco, el se sbalia: i avenimenti tristi ancò i ze tre: primo ze morto Tilio, secondo fora piove e terso in sto paese gavemo scoperto de avere par prete un mona!!!
Invesse no: so ‘ndà fora parché go tacà straunare a tonfon. Un ataco de alergia che no ve digo!!!
N.D.A. fato scrupolosamente vero!!!
La retorica
Uno dei momenti inte i quali me acorzo de più che a sto mondo andemo vanti a frasi retoriche ze quando lèzo le pigrafe: “ Dopo lunga e penosa malatia...”... Che na malatia possa èssare curta poe anca èssare ma che no la sia penosa no credo. Mi no go mai sentìo parlare de malatie alegre. “ Si è indormessato nel bacio del Signore”... a parte el fato che più che indormessà uno che se ritrovà publicà su na pigrafe ze proprio defunto e cadavaro, no credo proprio che el Signore se perda via a basare tuta la zente che more. Oltretuto un moribondo de solito ze anca malà (ze dificilissimo morire in bona salute amenochè no se goda del’aiuto de qualche mèdego!) e probabilmente infetivo... E vuto che el sig. Dio co tute le robe inportantissime che el ga da avere par la testa ris-cia de ciaparse na infession par basare uno che gnanca el conosse?
I miracoli de Gesù
Tanti se stupisse che Gesù tra i tanti miracoli el gabia anca fato ressussitare un mucio de zente sconsolatamente defunta. Gnente de più logico: ai so tenpi la medessina gera cussì indrìo che gera diffisilissimo curare queli che se malava.
Cussì no podendo curarli a Gesù ghe tocava resussitarli!!!
Punti de vista
L’altro dì un me amigo ma ga contà sto episodio: - Ti te se se che go na fiola de sedese ani... Bon, tre giorni fa la ma dimanda de portarla dai paruchieri (gavìo mai osservà che i paruchieri i ze senpre in do come Olio e Stalio, Gregio e Jacheti, Gaspare e Zuzuro?) a postarse i caveji. Visto che la ga apuntamento ale quatro mi ale quatro manca sinque la molo davanti la botega dei infami artigiani. Torno casa quando dopo sirca venti minuti sona el telefono: la ze me fiola che me dise de ‘ndarla tore che la ze pronta. La roba me spussa visto che i paruchieri senpre più infami e porchi artigiani, de solito i ze longhi come l’ano dela fame... Comunque vago tore la tosata e la trovo spenotà e co i caveji driti che la me faseva inpression vardarla: la me pareva un papagalo che gaveva pena barufà co un lion... Ma questo ze gnente: ghe dimando la spesa: -40 milafranchi papà - me risponde serafica la tosata.... Torno casa e agredisso la femena (me mojere) visto che la gera stà ela a consiliare ala fiola sti coifeur del casso... e seto la risposta: - Cossa vuto che sia 40 milafranchi? ... Prima i ze del artisti (si, a tosare cani e piegore!)... secondo i ga fato na messa in piega!!!...- Ti caro amigo svisserato cossa disito? - Cossa vuto che te diga caro Bepi, - go risposto mi - secondo mi ghe ze un erore de fondo sula valutassion de to mojere, sta sema de guera: secondo mi più de na messa in piega sul to caso se poe parlare de na messa in culo....
LEGGI I COMMENTI (2)
-
PERMALINK
lunedì 10 luglio 2006 - ore 16:12
NOVA PROGRAMASSION RAI!
(categoria: " Accadde Domani ")
La notissima trasmission de intratenimento de Bruno Brespa (quelo che pare un paneton brusà co l’ueta) “Porta a Porta” ze in fase de ristruturassion. Pare che i autori voja darghe un tajo (speremo mortale!) più agile e farlo deventare un programa de rotura (ancora de più???). Intanto se pensa de canbiare el titolo. Dopo un potente “brein strormin” ecove le nove proposte: “Porta sti peri a sto sorela!” “ Mena la porta fin che la sua” “Brespa sara na porta e verze un porton” (e cossa zelo, un portinaro?)... Come colaboratori vegnerà afianca a Brespa, el noto giornalista (?) Mosca e el stilista Moschino... Ghe sarà anca un conplesso musicale “I scaravasi” overo i Beatles de Campigo. Se dopo le prime do puntate l’audience no sarà oltre el 70% el programa vegnarà sopresso e el condutore co i so colaboratori vegnarà eliminai a colpi de flit al grido”Ponpa la Brespa col flit/ e se no la more col gas!”
Fotosomeja del lechin!
COMMENTA (0 commenti presenti)
-
PERMALINK
sabato 8 luglio 2006 - ore 17:33
MARTI DE SERA SPETACOLO CO I ME TESTI!!!
(categoria: " Poesia ")
Marti de sera, ale 21,00, presso el Parco Santa Rita PD, ghe sarà un spetacolo particolare dal titolo "FILO’ 2006 - tra sorissi e nostalgie"... Sul palco l’atore teatrale Andrea Bordin e el musicista Paolo Zanarella par un viajo indrio nel tenpo co i raconti divertenti mii e le poesie bocacesche ma bele de P.G. Cevese... Un misto tra reading, teatro e cabaret... ingresso agratis... divertimento assicurà!!!.. Speremo che no piova Giuda can!!!... Senò cavo na svagonà de resie!
Andrea Bordin durante un nostro spetacolo
LEGGI I COMMENTI (2)
-
PERMALINK
sabato 8 luglio 2006 - ore 17:26
INPAREMO LE PAROLACE! dal "Manuale maleducato..." de Walter Basso
(categoria: " Riflessioni ")
òstrega! accidenti!; Diminutivo: ostregheta; Dispregiativo: ostregassa; Potenziato: ostregassa porca
È l’imprecazione delle persone per bene. Quando il parrocco strabuca inte’l tapeo dela canonica non può certo trare quatro porcassi (anche se ho il dubbio che qualche reverendo eretico lo faccia!), al massimo può ripiegare su: - Ostregheta, deboto me scavesso l’osso del colo, par Dio, par la Madona!
Nota storica
Na volta un paroco de canpagna pitosto vecio e sbarossà gera drio fare i scalini del’altare col goto de vin bianco in man. A un serto punto el se ga strabucà e el gera drio càdare de rabalton. Alora el ga vardà piamente drento al goto e el ga dito:
- Dio tachete senò te spando!!!
La barzeleta
Drento un tonbin ghe ze Toni e Nane drio saldare un tubo. A un serto punto a Toni ghe sbrissa el canelo e ghe sbrusa na man a Nane che taca sigare:
- Ciò bruto fiol de na troia, sta atento, orca putana! O vuto sbrusarme che Dio te fulmina ti e chel schifoso de canelo dal porcasso bestia... Vaca troia, che male...
- Ma va in mona - risponde Toni - quanto casin, to mare vaca, par na scotadina... Giuda culaton!!!
Fatalità vole che proprio su quelo passasse na pia veceta canuta che al sentir sto dialogo ghe se sdrissa i caveji canuti in testa.
- Vergogna, incivili di sboccati che non siete altro - la sbochesa - ora vago dal Sior Sindaco e li dicco io come parlate in pubbrico, porselli e svergognosi!!!
E difati la va protestare col Sindaco che pena possibile ciama i do par reguardirli:
- Mi sono giunta vosse in recchia che voi porchezzate, biastemate, tirate porchi e parolasse in pubrico! Cossa avete da dire a vostra difesa?
- No è gnente vero sior Sinnico - risponde Nane candido - Toni, poareto de Dio, stava dietro saldare quando li sono sbrissato il canelo infogonato e mi ga broatto un po’ la mano. Alora io o deto:
- Ostregheta Antonio, che diamine fai? Stai atento per Dio, che mi stai scotando una mano, perdinci!!!... Tuto qua...
COMMENTA (0 commenti presenti)
-
PERMALINK
giovedì 6 luglio 2006 - ore 18:31
LA BARZELETA PAR I FORTI DE STOMEGO!!!!
(categoria: " Riflessioni ")
La sputachiera
Casa de riposo in canpagna co dozento vecioti ospiti.
Vissin la sala mensa ghe ze, so on canton, na gran sputachiera senpre piena fin l’orlo... e qua nasse i problemi parché tuti evita, molto atentamente , de svodarla, cussì sta spussolente funsion ghe toca senpre al stesso infarmiero che dopo sie mesi ghe ne ga pieni i cocò. Alora na matina el raduna i veceti e el ghe fa sto bel discorso: - Cari noneti come podì védare mi me dago da fare più che posso, però desso dimando on poca de colaborassion! ve domando on picolo aiuto... vedìo quela sputachiera? Sicome ci sputate drento tuti voi (par dare più forsa al discorso el se ga messo a parlare in ita¬lian) mi pararebbe giusto che a turno la svodaste anca parché i vostri scaparri mi fanno on gran schifasso. quindi, per cui, da domani matina vedete di rangiarvi, ciaro? - nissun ga risposto e tuto ze finio qua. La matina drio la sputachiera la ze meza piena e nessun la svoda, el di dopo la ze squasi piena... I’infarmiero tien duro, e la matina drio MIRACOLO la ze voda, lustra e superneta!!! Contento morto el riunisse tuti i noni par ringrassiare el misterioso omo de bona volontà. - Me conpiacio - el dise - co uno de voialtri, uno che ga dimostra bona volontà, senso civico, e altruismo... ansi vojo che el fassa on passo vanti parche vojo aditarlo cofà esenpio! alora chi se stà? -
- A so stà mi, sior - dise on veceto fasendo on passeto in vanti. - Bravo ti nomino Cavaliere del’Ordine dela Santa Sputachiera e ...
-El varda che el se sballia - salta su el vecio - mi no vojo titoli, la go sneta par sballio, no centro gnente... ghe spiego come ze sucesso: mi passavo da rente ala sputachiera e me ocoreva de spuare. Me so messo giusto sora e go trato on scaparo... purtropo me se resta el fio che ’ndava dal gargato ala tecia maledeta. Alora mi go tira su on paro de volte co violensa e... quando che go finio la sputachiera gera perfetamente neta. Eco la ze nda cussi. Ma no voio pi saverghene!!!
LEGGI I COMMENTI (4)
-
PERMALINK
martedì 4 luglio 2006 - ore 15:55
TORTA DEL’AMORE
(categoria: " Vita Quotidiana ")
Cossa ghe voe:
1 leto caldo - 2 corpi umani difarenti (serti porsei dopara anca corpi conpagni)- 500 grami de còcole -500 grami de basi, ciucioni e sofegassi - 1 forno de bojo - 1 banana - 2 peri - 2 ponpelmi.
Come se fa:
Métare co delicatessa i do corpi umani nudi intel leto caldo, zontare pian pianeto le caresse e i basi... In ultima zontare anche i ciucioni e sofegassi, smissiotando el tuto co cura.... Caressare a longo la banana stando ben atenti a no fare massa in pressa e contenporaneamente sbragagnare co cura estrema i ponpelmi fin che no i ciapà un bel colorito rosso roan. Intanto scaldare puito el forno a circa 40°... Pena che la tenperatura sarà giusta inpirare dentro la banana stando però ben atenti a lassare fora i peri.... A sto punto bisogna móvare in su e zo la banana finché questa no se smola... Lassare riposare qualche minuto intel forno tiepido quindi ritirare la banana co delicatessa e lassarla rafredare... Sta riceta poe èssare ripetua do o tre volte al dì. Dipende solo dala scorte de magasin.
.jpg)
Foto dei do ponpelmi!
COMMENTA (0 commenti presenti)
-
PERMALINK
domenica 2 luglio 2006 - ore 17:08
LE RICETE DEL PENSIONATO INPS
(categoria: " Ricette ")
A cura del cogo ruspante Neno Smerdacai
Overo come magnare puito sparagnando schei
Bìgoli al profumo di fruti di mare
Cossa serve
1 chilo de pasta vansà in sorte mista - 2 pignate (una granda una pichenina) - 1 fogo lento - 1 sbrancone di sale grosso - 1 aciuga - 1 s-cioso-limega - 3 teste di sardele - 1/4 di scatoleta di ton - 1 spigoleto di ajo pitone - Aqua (un paro de litrossi)
Esecussione
(grado de dificoltà: estremo)
Verzì la cradensa e, dopo aver s-ciafesà le mojere ingorde, catè fora tuti i modeli de pasta vansà nei ultimi do ani. Metì sul fogo na pignatona co un litrosso de aqua e fasì bójare... Ciapè la pasta e sgnacheghela drento de bruto... Cusinè el tuto a fogo lento (cussì consumè manco) par oto ore. Tirè fora la spalteca otegnua e fasì su na bea bala. Co la bala pastacea ze freda struchea col schiciapatate e otegnarì un bel piaton de bigoloni sucolenti. A parte, overo in un cantone, ciapè na teceta, metìghe un poca de aqua co un bel brancon de sale (par via del profumo de mare) e fasì sfritegare na aciuga, un s-cioso (par via dela somejansa co i sgarusoli marini), tre teste de sardele, un quarto de na scatoleta de ton e un spigoleto de ajo. Cusinè el tuto smissiando co calma... Atenti a no inbriagarve col parfumo... Co el sugheto ze coto su na teciona a parte cusinè i bìgoli e pena pronti condì fasendo saltare su na farsura el tuto, (tenti duranti i salti de no sgiaventare tuto intel pavimento senò fasì un loamaro)... No stè métarghe formajo grana par carità de Dio senò rovinè el gusto delicato del mare... Come vin consilio un bianco economico al metanolo purissimo doc.
LEGGI I COMMENTI (2)
-
PERMALINK
> > > MESSAGGI PRECEDENTI
[ SONO OFFLINE ] 