Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
giovedì 22 giugno 2006 - ore 13:53
PRIMATO VENETO 2006
(categoria: " Vita Quotidiana ")
El primato de otobre 2003
‘Rsilio Tonin, dito “Morte in vacansa”, parché seco incancarìo cofà na renga co l’ùlsara, durante na sofferta seduta in cesso ga prodoto el bisso solitiario più longo de cui se gabia notissia. Bisso che oltretuto gaveva na estrema somejansa co na tajadela stracota. Grassie ala misurassion efetuà il loco dal giometra comunale Nane Piton el bestio risultava de 32 metri dala testa e coa e de altri 32,5 dal coa ala testa. Podemo quindi afermare che el lunghissimo (a ragion veduta!) parto ga messo al mondo un esenplare de ben 64,50 metri lineari. El dì drio la mojere de ‘Rsilio, in preda a un ataco de bontà d’animo, ga invidà a magnare 20 amissi del consorte che se ga ciucià porsion mostruose da tajadele al ragù de musso. La redassion de l’OCO ga disdeto l’invito e ga magnà in ostaria de Bepi Spussa.
.jpg)
Fotosomeja sientiffica del tenia solun overo bisso singol...
LEGGI I COMMENTI (4)
-
PERMALINK
mercoledì 21 giugno 2006 - ore 14:06
LA RUBRICA DEL TENPO LĺBARO... ANDEMO A PESSE
(categoria: " Scienza e Tecnica ")
A cura de ’Rtemio Fontanasso laureato in Tenniche de Pesca (da quela col bigato a quelo co le bonbe al carburo) presso l’Università de Busa de Vigonza (Padova)
Carissimi giovini e ansiani tuti, ogi trataremo la pesca al pessegato, notissimo pesse-anfibio di aqua dolce co legerissima spussa di freschinazzo. Prima di passare a lustrarvi le sofisticatissime tenniche di inganciamento del noto pessone definito dal grande Tilio Maseneta "il salmone dei peociosi" vedarrò di darvi in pasto alcune nozioni sientificche atte a conosserlo in modo più compreto possibile. Difati o preparato una aposita scheda per la bisogna:
Nome popolare: PESSEGATO o BARBON
Nome sientificco: Pissus Felinus Meo Mao
Habitat: sóto aqua o in mèzo al paltan in fossi, canali, lagheti
Caraterristiche tenniche: il sogeto ha in dotazione raquanti peli intel babìo che lo fano somigliare apunto al nobile felino. Inoltre ha lunghi spini che saltano fora dala schina e si inpiantano nei diti di chi lo chiappa in mano.
Dieta: tuto quelo che cata co preferensa par i sorzi.
Nota di colore: il pessegato è molto ricercato soratuto dale popolassioni indigene di Vicenza le quali lo fano in tecia secondo la nota riceta "Pesseconicio in tecia"
Passiamo subito dopo la dotta presentassione a vedere le tenniche di catura del’esenplare. Inanzituto munirsi di canavera co filo forsin, suro, pionbi e in fondo un lamo di fero par poder ingansare la preda. Munirsi anche di un fosso o lagheto indove sia presente un numero consistente di senplari dal chilo in su.
Come esche portarsi dietro un bussoloto co drento na sinquantina de moreje vive. Munirsi anche di aposito sestello contenente un panin co sopressa co l’ajo, un litro de nero (par no morire de fame durante l’estenuante lota co li semplari più grandi che sputacaso si tacano al lamo). N’altro sestello vodo serve par le cature.
Secondo fonti non controlabili parerebe che tale Memo Susta da Loregiola gabia caturato un semplare di 87 tonelate e mèza nel fosso darente casa. Precisemo che normalmente tanti pescadori sono busiari.
Comunque sarebe consiliabile, proprio par avere un aleato in casi come questo, portarse dietro in aposito aquario un pessecan de un paro de quintali che ze el naturale nemico del pessegato.
Par la pescada se fa come par staltri pessi: se pica el sorze sul lamo, se trà questo in aqua e se speta... Col bestio se taca se tira su, se ghe dà na smartelà in testa e apena cadaverizà el se sgnaca in aposito sestelo... Se la lota ze impari se sgiaventa drento el pessecan.
De solito el pessegato se spaventa, salta fora dal’aqua e se ranpega su par el primo àlbaro ch’el cata. Alora se guanta l’àlbaro se sgorla forsenatamente finché el bestio anfibio cade in tera spacàndose el bàbio... Se invesse no se taca gnente parché el pessegato astutamente se magna i sorzi sensa però magnare lamo, se ricore ai metodi americani, overo se tira fora dal bagaliaio dela màchina un paro de bonbe al carburo e le se sgiaventa in aqua. Straje assicurà. Volendo se poe doparare anca na picola bonba atomica (in comercio ghe ne catè de tute le dimension)... el problema ze ch’el pesse podarìa risultare radioativo. In sto caso podì regalarghelo ala suocera che la ze cofà na biologica. Eco. Io o finito. Nela prossima rubbrica vi parlerò del pessesega che per ovie razoni è in estinsione, mentre è in forte cressita el pesse tronba... Buongiorno a tutti.
LEGGI I COMMENTI (6)
-
PERMALINK
martedì 20 giugno 2006 - ore 13:50
NO GO MAI CAPIO?
(categoria: " Vita Quotidiana ")
... La zente che aferma solenemente che se i bevè el cafè no i riesse più a dormire. A mi me sucede el contrario: co dormo no sò bon de bere el café....
... La maestra che ghe ga dito a me fiola co la gaveva sie ani che Babo Natale no esiste. “Infati, - ga aferma l’educatrice de inocenti pargoli, - mi no lo gò mai visto!”. Contenporaneamente le ga afermà de èssare cristiana e de crèdare fermamente a Dio. Sula fiducia, penso, visto che anca sto personagio inportante nissun lo ga mai visto!
... Come mai nissun ga pensà de elegere come deputato el toro da monta de Giosuè Samoca che co do bale in un ano ga prodoto venti vedeli al posto dei nostri deputati che nonostante tute le bale che i conta no ga prodoto gnente!
... Queli che ga bisogno dele pastilie par dormire visto che mi gavarìa bisogno de quele par svejarme!
... Come mai tante persone, par paura de morire, no beve, no fuma, magna pocheto, no stà fora fin tardi, fa poco al’amore. Insoma i vive come dei malai par morire sani. Mi invesse, magno bevo, fumo e me la godo. Cussì vivo da san e quasi de sicuro morirò malà!!!
... Parcossa se dise che “l’amore ze cieco” quando le leterine, le veline, le modele e le atrici se inamora senpre dei calciatori, cantanti, atori o veci industriali incalcà de schei e MAI, gnanca par caso, nessuna se inamora dei metalmecanici o dei pensionati in casa de riposo.
La barzeleta del giorno in omagio...
In casa de un ilustre medego se ingorga el tubo del cesso. Alora el luminario dela siensa ciama imantinente un idraulico che riva de corsa co un casseto fodrà de tubi, pinse, tenaje e stopa... El valoroso artigiano se sara in cesso e taca bàtare, segare, frugnare fasendo un casin bestia. Comunque dopo un quarto d’ora el vien for tuto sodisfà:
- Eco caro, el so cesso ze a posto, funsionante e parfumato... Fano esatamente 875 euroschei...
- Giuda cane, ma ze robe da mati!!! 875 euroni par un quarto d’ora de lavoro??? Ma gnanca mi che sò studià e fasso el mèdego de sigo (“grido” in italian) ciapo ste cifrone!!!
- Sò d’acordo co lu, caro ex colega... infati ze quelo che go dito anca mi al me idraulico do ani fa quando fasevo el primario in ospedale a Padova!!!
LEGGI I COMMENTI (4)
-
PERMALINK
lunedì 19 giugno 2006 - ore 14:10
NA SOMEJA DELA PRESENTASSION DE VENARE
(categoria: " Vita Quotidiana ")
A beneficio del pop0olo sprizifero, pubrico sta fotosomeja fata da Jessica che vede mi, Moreno, Fred, Stefanato Davide e Valerio Mazzucato alias i Bepi e Maria Show durante la clamorosa (?) presentassion dela SGANASSADA presso la Libreria Draghi de PD... Na roba granda, incalcà de zente sveja e soratuto de grann e robusto apetito... Grassie a tuti!!!!
COMMENTA (0 commenti presenti)
-
PERMALINK
lunedì 19 giugno 2006 - ore 11:43
SERVELI E MONE!
(categoria: " Pensieri ")
Finalmente frenà la “fuga dei sarvelli dal’Italia”. Come tuti sa (e queli che no sa, essendo ignoranti, che i se informa!) tute le teste più fine, vuoi siensiati atomico-nuclerari, vuoi mèdeghi tajacristiani, vuoi giometri comunali e similia, scanpa dal’Italia dove le tasse li dissangua e core come cani da lièvori al’estaro dove se lavora poco, no se paga tasse, e se tronba più de qua. Par questo el Governo ga inventà el “servelografo” istrumento ato a misurare i giri dei serveli in funsion. Tuti queli che ga el nobile organo in fora giri vegnarò omagiai de superstipendio, azeramento del tasse, fornitura de na “velina” o na “leterina” o na “microfonina” (nei casi dei più onti na “pecorina”) da stramassare giornalmente. El provedimento se ga rivelà inutile nei casi de Fede, Butilione, Mosca e Biscardi, in quanti questi i ze stà sbandonà dai relativi serveli za da ani e ani.
COMMENTA (0 commenti presenti)
-
PERMALINK
lunedì 19 giugno 2006 - ore 09:49
LE ME SCUSE!!!
(categoria: " Pensieri ")
Domando rispetosamente scusa a tuti i sprissini mas-ci e femene che me ga scrito messaj de no aver risposto.. purtropo, probabilmente el fato de èssare mona, zontà al fato che el me conpiuter fa quelo che casso ghe comoda, i sudeti messaji li go catai tuti oncò su na bota sola!!!... orco qua e orco là.... Mi a un poco ghe gò risposto ma a tuti sarà fadiga!... Quindi scrivimne co voi che desso ve rispondarò... orca putana sassina... tana bestia.. giuda can... scusatte mi sono sbrizziato!!!
LEGGI I COMMENTI (5)
-
PERMALINK
domenica 18 giugno 2006 - ore 11:53
ONCO’ POTENTE BARZELETA A SFONDO POLITICO!
(categoria: " Pensieri ")
La coerensa
Un sior ze incantà davanti ala vetrina de Ermo Caccin, me amigo refice a Borborico...
- Ostiamenta, varda che rassa de relojo, - el pensa coi oci fora dala testa cofà un s-cioso curioso - un spetàcolo ùnico... na roba granda... desso vago drento e me lo cronpo anca se gavesse da dissanguarme el tacolin!!!
E difati el entra e el taca criare col Ermo:
- Vojo ch’el relojo là in vetrina.. presto lo toga che me lo provo che lo vojo...
- El varda sior, - risponde me amigo parplesso miga poco - ch’el costa salà: 2500 euroni... tuto oro massicio a 18 carati...
- No me intaressa gnente i problemi de caratari o de euri, lo cronpo subito parché el me piase massa... eco qua.. varda come ch’el me stà da dio... solo che... ostiamenta, no vojo la cinghieta bianca... mi sò leghista... ragion par cui la quale, vojo la cinghieta verde...
- Nessun problema sior... - intervien el sior Caccin - eco qua la cinghieta verde... cossa ghe pare?
- Stupendo ostiamenta, stupendo... varda come ch’el brila... el pare un ferale... lo cronpo, lo cronpo... ma... ostiamenta, no va miga ben el quadrante bianco... no va miga ben!!! Mi sò leghista: vojo el quadrante verde...
- E qua sior sorge un problema... me toca mandarlo in Sguinssera... spetare tre dì... e lu ga da spendare 1000 euroni de più!!!
- E alora Giuda can, dove zelo el problema: toh ciapa... 3500 euroni in man subito e fra tre di torno tórmelo... ostiamenta che belo sto relojo...
E dal dito al fato el va via...
Tre dì dopo puntuale cofà la morte el siorato torna torse el relojo... Se lo mete torno el brasso e se lo amira...
- Ostiamenta, varda che qualità de lavoro... belo... belo... na òpara d’arte... po’ tuto verde par mi che sò leghista ze el massimo... ma.. ma... no ghe semo miga...
- Cossa ghe ze desso?, - dimanda co un filo de vosse el paron de botega overo Ermo che taca rónparse i maroni.
- Ghe ze che mi sò leghista.... quindi PAR PIASSERE BISOGNA CH’EL ME CAVA SUBITO EL MEZOGIORNO!!!
.JPG)
Someja de agricolo sopone sensa ideologie politiche...
COMMENTA (0 commenti presenti)
-
PERMALINK
sabato 17 giugno 2006 - ore 12:11
E STASSERA A CAMPODORO!!!
(categoria: " Vita Quotidiana ")
E stassera serata co Fred a Campodoro par presentare e stare insieme a tuti i amissi dei lavori de na volta!!!... I me ga dito che qua i ga un stend dove i fa na taliata de bò che ze la fine del mondo!!! e vuto che mi no ghe ne aprofita!!!... va ben, va ve conto na barzeletina:
Teron sì... mona no!
Napoli centro cità (ma podarebbe èssare in una qualsiasi cità italiana, co esclusione di Palemmo indove le persone parben sono dietro a inpionbare a luparatte i denti ai probi amisi mafiosi a qualsivollia ora)... Toni Bandìo, inprenditore padovan in tenuta da messa cantà, vien fora da un ristorante de lusso e vede un toso teron stravacà in tera soto na onbrìa drio pisocare de gusto.... “ Tuti conpagni sti teroni, pelandroni porchi sassini! “ el pensa e po’ decide de farghe un pistoloto onde educarlo e aviarlo lungo l’onorevole strada del lavoro.
- Ciò ti, toco de mona, come mai te stà là inpiocà a no fare un’ostia???
- Eh, cunpà, sto pigliando nu pocco de sole!!!
- Ah, sì??? E no te vergogni??? A sta ora poltrire cussì... ma no ghe ghe miga un posto de lavoro???
- Nun tengo tanta voglia, signò!!!
- Male, malissimo, ansi pegio...lavorando te podarissi ciaparte un francheto...
- Enbè???..
- Pian pianeto te podaressi verzare n fabricheta come che gò fato mi co gavevo la to età....
- E doppo, cunpà?
- Dopo la fabrica podarìa deventare senpre più granda, come me ze sucesso a mi diese ani fa...
- E doppo cunpà???
- Insoma orca sassina par farla curta, te podarissi fare na montagna de schei, assumare zente che laora par ti....
- Ah sì???
- E te podaressi parmetarte el lusso de no fare na masturbassione (legi “sega”) dala matina ala sera e stare tuta l’istà al sole a ciapare la sbronsatura come un vero sior....
- Enbè comendattò.... e secondo lei, io che cazzo di minchia sto facendo adesso????
No’l centra un casso però a mi el me piase e quindi qua lo meto... el blog ze mio perciò drento ghe sgnaco quelo che me pare, Giuda porseo can!!!
LEGGI I COMMENTI (9)
-
PERMALINK
sabato 17 giugno 2006 - ore 11:16
OSTIA, CHE PIENON!
(categoria: " Vita Quotidiana ")
Sò proprio contento!!!!.. Ieri sera ala Libreria Draghi se ga fato su na paca de zente che no gavarìa mai dito... Tra amissi de nova e vecia data,. letori, mai visti, personagi de Padova e dintorni la presentassion dela SGANASSADA ze sbrissià zo come na onbra de merlò... Otima la presentassion de Moreno e i interventi dei tosi del Bepi e Maria Show... presenti un paro de television che ga tirà zo tuto!!!... bevù tuto el vin e magnà anca le ganbe dela tola!!!!... Ala fine na bea pizza al Postal 2 tra de nialtri ga concluso na giornada da ricordare.... El leto po’ ga acolto un eroico Walter che ga ronchesà sonoramente fin ale diese del dì drio!!!!
LEGGI I COMMENTI (7)
-
PERMALINK
venerdì 16 giugno 2006 - ore 15:20
FRA TRE ORE SE BATESA "LA SGANASSADA"
(categoria: " Vita Quotidiana ")
Ghe semo... saladi pronti, come tuto el resto... me lavo la rufa e me parecio... Ala Libreria Draghi me aspeta na fola imensa par el bateso dela me nova creatura... El santolo Moreno Morello e i Bepi e Maria Show sarà in prima linea par l’inponente cerimonia pubrica... Po’ se magna e se beve!!! Posti solo in piè... Vietato l’ingresso ei mone!
COMMENTA (0 commenti presenti)
-
PERMALINK
> > > MESSAGGI PRECEDENTI
[ SONO OFFLINE ] 