(questo BLOG è stato visitato 27792 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
Saturday, March 15, 2008 - ore 09:35
I PENSIERI SOLENI DE UNO CHE SA!
(categoria: " Vita Quotidiana ")
A cura del filosofo Teo Magno
Aninalisti
Categoria i cui iscriti aumenta de giorno in giono. Carateristica principale, come dise el nome, ze un amore visserale par tute le bestie del creato (co esclusion dei virus e dei bacili che se vede no ze considerà bestie!)… Par questo se poe dire sensa onbra de dubio che i animalisti ga un core grando sempre e na grandissima sensibilità… Talmente granda che i sarìa boni de copare un omo sorpreso a s-ciafesare na mosca!
Gran verità
Go incontrà Giani Petola, vecioto incartapecorio da sempre celibe.. El me ga dito: “Mi sò un omo che ga senpre avuo gran fortuna co le done... infati a otanta ani no me sò gnancora sposà!!!
Limiti dela siensa stetica
La magior parte dele cosidete atrici pena che le ga fato su quatro palanche le se fa rifare le tete.... Mai nessuna che gabia pensà de rifarse el servelo. D’altra parte la question no ze fàssile: infati el chirurgo par rifare le tete parte da un paro de pelegate...Par el servelo ze pressoché inpossibile parché el dovarìa partire dal nula assoluto!
Referendum
In giugno so andà a votare par el referendum sule modifiche dela Costutitussion… Me so catà in un gran dilema: el me pensiero gera purtropo el stesso del politico che me stà pesantemente sui ovi da ani… Pensa e ripensa go deciso de votare el contrario… In pratica gò votà contro le me idee. Ma so contento: preferisso metarmelo in che posto che tuti savì da solo pitosto che me lo meta el politico che no posso vedare!
Tra coleghi
Da un poco de tenpo i rapinatori ga tacà rapinare anca le farmacie... In zona mia i ghe ne ga za fate fora tre. Ze strana sta roba parché no gavevo mai sentio dire de ladri che va robare dai coleghi!
Par conicio
I frutaroli se ga intavanà coi medici e i voe che anca par lori vegna aplicà la famosissima "par conicio". A far scatare la richiesta ze stà el fato che i medeghi continua paragonare cancari e tumori ala fruta: "grosso come un limon" o "grando come na saresa"... - E basta co sti esenpi che ne danegia!!! - ga sigà Tilio Meonara, presidente del Fenocio Cleb - se no i ghe la mola anca nialtri tacaremo véndare "limoni grossi come un cancaro" o "sarese bele tonde cofà un tumore!"
Foto del filosofo Teo Magno (se so bon!)
COMMENTA (0 commenti presenti)
PERMALINK
[ SONO OFFLINE ] 