(questo BLOG è stato visitato 15173 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
Tuesday, November 30, 2004 - ore 22:56
Inno sardo
(categoria: " Vita Quotidiana ")
Su patriotu sardu a sos feudatarios
Procurade 'e moderare,
Barones, sa tirannia,
Chi si no, pro vida mia,
Torrades a pe' in terra!
Declarada e' giā sa gherra
Contra de sa prepotenzia,
E cominza sa passienzia
In su popolu a faltare.
Mirade chi est azzendende
Contra de 'ois su fogu,
Mirade chi no e' giogu,
Chi sas cosas andat 'e veras;
Mirade chi sas aeras
Minettana temporada;
Zente consizada male,
Iscultade sa 'oghe mia.
No apretedas s'isprone
A su poveru ronzinu,
Si no in mesu caminu
S'arrempellat appuradu;
Minzi ch'es lanzu e cansadu
E no nde pode' piusu;
Finalmente a fundu in susu
S'imbastu nd'hat a bettare
Su pobolu chi in profundu
Letargu fi' sepoltadu
Finalmente despertadu
S'abbizza ch'est in cadena,
Ch'ista' suffrende sa pena
De s'indolenzia antiga:
Feudu,legge inimiga
A bona filosofia
Che ch'esseret una 'inza
Una tanca, unu cunzadu,
Sas biddas hana donadu
De regalu o a bendissione;
Comente unu cumone
De bestias berveghinas
Sos homines e feminas
Han bendidu cun sa cria.
Pro pagas mizas de liras,
E tale olta pro niente,
Isclavas eternamente
Tantas pobulassiones,
E migliares de persones
Servint a unu tirannu.
Poveru generu humanu
Povera Sarda Zenia!
Deghe o doighi familias
S'han partidu sa Sardigna,
De una manera indigna
Si nde sun fatas pobiddas;
Divididu s'han sa biddas
In sa zega antighidade:
Perō sa presente edade
Lu pensat rimediare.
Nasch' su Sardu soggettu
A milli cumandamentos;
Tributos e pagamentos
Chi faghet a su Segnore
In bestiamen e laore
In dinari e in natura;
E paga' pro sa pastura,
E paga' pro laorare.
Meda innanti de sos feudos
Esistiana sas biddas,
Et issas fini pobiddas
De saltos e bidatones.
Comente a bois, Barones,
Sa cosa anzena es passada?
Cuddu chi bos l'ha' dada
Non bos la podia' dare.
No es cosa presumibile
Chi volontariamente
Happa' sa povera zente
Zedidu a tale deretu;
Su titulu 'ergo, est infettu
De infeudassione,
Ei sas biddas reione
Tenen de l'impugnare.
Sas tassas in su prinzipiu
Esigiazis limitadas,
Dae pustis sun andadas
Ogni die aumentende.
A misura chi creschende
Sezis andados in fastu,
A misura chi in su gastu
Lassezis s'economia.
No bos balet allegare
S'antiga possessione;
Cun minetas de presone,
Cun gastigos e cun penas,
Cun zippos e cun cadenas,
Sos poveros ignorantes,
Derettos esorbitantes
Hazis forzadu a pagare.
A su mancu s'impleerent
In mantenner sa giustissia,
Gastighende sa malissia
De sos malos de su logu;
A su mancu disaogu
Sos bonos poteran tennere,
Poteran andare e bennere
Seguros per i sa via.
Es cussu s'unicu fine
De dogni tassa e derettu,
Chi siguru, e chiquietu
Sutta sa legge si vivat;
De custu fine nos privat
Su barone pro avarissia
In sos gastos de sa giustissia
Faghe' solu economia.
Su primu chi si presentat
Si nominat offissiale,
Fatta' bene o fatta' male
Basta' non chirche' salariu;
Procuradore o Notariu,
O camareri o lacaju,
Sia' murru o sia' baju
E' bonu pro guvernare.
Basta' chi preste' sa manu
Pro fagher crescher sa renta,
Basta' chi fatta' cuntenta
Sa buscia de su Segnore;
Chi aggiuet a su fattore
A crobare prontamente,
E s'algunu es renitente
Chi l'iscat esecutare.
A boltas, de podatariu,
Guverna' su capellanu
Sas biddas cun una manu
Cun s'attera sa dispensa.
Feudatariu, pensa
Chi sos vassallos non tenes
Solu pro crescher sos benes,
Solu pro los iscorzare.
Su patrimoniu, sa vida,
Pro difender su villanu
Cun sas armas a manu
Chere' ch'iste' notte e die;
Giā ch'at a esser gasie,
Proite tantu tributu?
Si no si nd'hat haer fruttu
Es locura su pagare.
Si su barone non faghet
S'obbligassione sua,
Vassallu,de parte tua,
A nudda ses obbligadu;
Sos derettos chi ha' crobadu
In tantos annos passados,
Sunu dinaris furados
E ti los deve' torrare.
Sas rentas servini solu
Pro mantenner cicisbeas
Pro carrossas e livreas,
Pro inutiles servissios,
Pro alimentare vissios,
Pro giogare a sa bassetta
E pro poder sa braghetta
Fora de domo isfogare.
Pro poder tenner piattos,
Bindighi e vinti in sa mesa,
Pro chi pota' sa marchesa
Sepre andare in portantina;
S'iscarpa istrinta, mischina,
La faghet andare a toppu,
Sas pedras punghene troppu
E non pode'camminare.
Pro una litera solu
Su vassallu poverinu,
Faghe' dies de caminu
A pe', senz'esser pagadu
Mesiscurzu e ispozadu,
Espostu a ogni inclemenzia;
Eppuru tene' passienzia,
Eppuru deve' cagliare.
Ecco comente s'implea'
De su poveru su suore!
Comente Eternu Segnore,
Suffrides tanta ingiustissia?
Bois,divina Giustissia,
Remediade sas cosas,
Bois da ispinas, rosa
Solu podides bogare.
O poveros de sas biddas,
Trabagliade, trabagliade,
Pro mantenner in zittade
Tantos caddos de istalla,
A bois lassan sa palla,
Issos regoglin su ranu;
E pensan sero e manzanu
Solamente a ingrassare.
Su Segnor Feudatariu
A sas undighi si pesa'
Dae su lettu a sa mesa,
Dae sa mesa a su giogu;
E pustis pro disaogu
Andat a cicisbeare
Giompende a iscurigare
Teatru, ballu,allegria.
Cantu diferentemente
Su vassallu passa' s'ora!
Innantis de s'aurora
Giā es bessidu in campagna;
Bentu e nie in sa muntagna
In su paris, sole ardente.
O poveritu! comente
Lu podet agguantare?
Cun su zappu e cun s'aradu
Pelea' tota sa die,
A ora de mesudie
Si ziba' de solu pane.
Mezzus paschidu e' su cane
De su Barone, in zittade,
S'es' de cudda calidade
Chi in falda solen portare
Timende chi si reforment
Disordines tantu mannos,
Cun manizzos e ingannos
Sas Cortes hana impedidu;
Et isperdere han cherfidu
Sos patrizios pius zelantes,
Nende chi fin petulantes
E contra sa Monarchia.
Ai cuddos, ch'in favore
De sa patria han peroradu,
Chi s'ispada han 'ogadu
Pro sa causa comune,
O a su tuju sa fune
Cherian' ponner, meschinos!
O comente Giacobinos
Los cherian' massacrare.
Perō su Chelu ha' difesu
SAos bonos visibilmente
Atterradu ha' su potente,
Ei s'umile esaltadu.
Deus, chi s'es' declaradu
Pro custa patria nostra,
De ogn'insidia bostra
Isse nos hat a salvare.
Perfidu feudatariu!
Pro interessu privadu
Protetore declaradu
Ses de su Piemontesu.
Cun issu ti fist'intesu
Cun meda fazilidade;
Isse pāpada in zittade
E tue in bidda a porfia.
Fi' pro sos Piemontesos
Sa Sardigna una cucagna;
Che in sas Indias s'Ispagna
Issos s'incontrant innoghe;
Nos alzaia' sa oghe
Finzas su camereri;
O plebeu o cavaglieri,
Si deviat umiliare
Issos dae custa terra
Ch'hana 'ogadu miliones.
Benian senza calzones
E si nd'andaian gallonados.
Mai ch'esserent istados
Chi ch'ana postu su fogu!
Malaitu cuddu logu
Chi creia' tale Zenia!
Issos innoghe incontrāna
Vantaggiosos imeneos,
Pro issos fin sos impleos,
Pro issos fin sos onores,
De cheis, toga,e ispada:
E a su sardu resāda
Una fune a s'impiccare.
Sos disculos nos mandana
Pro castigu e curressione,
Cun paga e cun pensione,
Cun impleu e cun patente.
In Moscovia tale zente
Si mandat in Siberia,
Pro chi morza' de miseria,
Perō non pro guvernare.
Intantu in s'isula nostra
Numerosa giuventude
De talentu e de virtude
Oziosa la lassāna;
E si alguna l'impleāna
Chircaian su pius tontu,
Pro chi lis torrat a contu
Cun zente zega a trattare.
Si in impleos subalternos
Algunu sardu avanzāda
In regalu non bastāda
Su mesu de su salariu,
Mandare fi' nezessariu
Caddos de casta a Turinu,
E bonas cassas de binu,
Cannonau e malvasia.
Tirare a su Piemonte
Sa prata nostra e i s'oro
Es de su guvernu insoro
Massima fundamentale.
Su regnu,ande' bene o male,
Non lis importat niente,
Antis creen incumbeniente
Lassarelu prosperare.
S'Isula hat arruinadu
Custa razza de bastardos;
Sos privilegios sardos
Issos nos hana leadu;
Da e sos Archivios furadu
Nos hana sa mezzus pezzas,
E che iscritturas bezzas
L'has hana fatta' bruiare.
De custu flagellu, in parte,
Deus nos ha' liberadu;
Sos sardos ch'ana 'ogadu
Custu dannosu inimigu
E tue li ses amigu,
O sardu barone indignu;
E tue ses in s'impignu
De nde lu fagher torrare!
Pro custu, iscaradamente,
Preigas pro Piemonte.
Falsu! chi portas in fronte
Su marcu de traitore,
Fizas tuas tant'onore
Faghent a su furisteri,
Mancari sia' basseri,
Basta' chi sardu non sia'.
S'accas'andas a Turinu
Inie basare des
A su ministru sos pes,
E ates su...giā m'intendes,
Pro ottenner su chi pretendes
Bendes sa patria tua,
E procuras forsi a cua
Sos sardos iscreditare.
Sa buscia lassas inie,
Et in premiu nde torras
Una rughitta in pettorras,
Una giae in su traseri:
Pro fagher su quarteri
Sa domo has arruinadu,
E titulu has acchistadu
de traitore e ispia.
Su chelu no lassa' sempre
Sa malissia triunfare;
Su mundu de' reformare
Sas cosas ch'andana male;
Su sistema feudale
Non pode' durare meda,
Custu bender pro moneda
Sos pobulos, de' sensare.
S'homine chi s'impostura
Haia' giā degradadu,
Pare' chi a s'antigu gradu
Alzare cherfa' de nou:
Pare' chi su rangu sou
Pretenda' s'humanidade...
Sardos mios, ischidade
E sighide custa ghia.
Custa, pobulos e s'ora
D'estirpare sos abusos!
A terra sos malos usos,
A terra su dispotismu!
Gherra, gherra a s'egoismu!
E gherra a sos opressores,
Custos tirannos minores
Es prezisu umiliare.
Si no, calchi die a mossu
Bo nde segade' su didu,
Como ch'e' su filu ordidu
A bois toccat a tessere;
Minzi chi poi det essere
Tardu s'arrepentimentu;
Cando si tene' su bentu:
Es prezisu bentulare.
COMMENTA (0 commenti presenti)
PERMALINK
