(questo BLOG è stato visitato 27794 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
venerdì 31 marzo 2006 - ore 08:52
FIGURE PORCHE!!!!
(categoria: " Riflessioni ")
Oncò gò pensa de tacare puito co un argomento de intaresse sociale overo esprimendo el me pensiero sul mondo dela magia che paraltro el ze l’unico pensiero giusto. Modestia a parte. Ma tachemo senò no andemo più vanti... parlemo dei maghi e dele maghesse che ormai inpesta i tubi “catolici” de tute le television pèso de na epidemia de afta epissotica. Ma chi zeli sti maghi?... ze presto dito: le ze persone che ga el dono dela vegensa; infati i ze i unici in grado de védare de bota quando che i ga davanti un mona e, inportantissimo, i vede subito anca quanta disponibilità economica ga el sudeto mona. El dono dela vegensa, dise tuti, ghe vien diretamente dal sig. Dio, el quale quindi gavarìa dirito almanco al 50% dei introiti che i clienti dà a sti professionisti del’o-cul-to par le professie e diagnosi. Roba che però i maghi se varda ben de fare visto che el sig. Dio no ze iscrito al’Albo dei Maghi e gnanca ala SIAE. Anca se ghe spetarìa de dirito l’iscrission vista la mole granda senpre de invension che el ga prodoto.... Ma tornemo in tema:
Carateristica de sta importante categoria de lavoratori ze quela de véndare al popolo de alochi le più gran porcarie magiche (?) che se possa imaginare: amuleti de prastica, spirali de banda, tochi de rame par pozarghe sora i piè, bracialeti magnetici par curare i dolori artistici, romantici e sciistici dei pensionati. La magior parte de sti personagi sa tuto sul passato, presente, futuro dei so clienti; serti più specializai riva adiritura a savere anca el participio passato e i mèjo in assoluto anca el trapassato remoto, intel senso che i parla coi trapassati overo morti-defunti come Bepi Tiraca de Bojon che invesse de starsene tranquilo a spasso par el paradiso o inferno (questo no se sa!) se perde via a dare a un mago de Milan i nùmari del loto par el cugin de terso grado Toni Paciora che stà a Campigo. (Infati quando sti operatori del’o-cul-to finisse la ratatuja magica taca dare i
nùmari... del loto). Cussì Toni Paciora un dì ciapa na létara dal mago che aferma solenemente che de note el so cugin defunto, Bepi Tiraca, lo ga svejà par dirghe de ciamare, par piassere, subito Toni Paciora e de véndarghe par tresento carte i nùmari boni par fare na quaderna seca e anca dei sugerimenti agratis par vìvare mejo...Se però Toni Paciora no eseguirà prontamente el versamento ghe rivarà par vie celesti un potente ataco de scagoto fulminante e infetivo.
Se Toni Paciora ze mona e aprensivo fa dire tre messe, paga le tresento carte, se mete un tapo de suro su par el dadrìo (prevenire ze mèjo de curare!), zuga bovinamente i nùmari par tre mesi de seguito, no vinse gnente, po’ tira na quantità spaventevole de porchi e resie misti e inoltre manda in mona anca l’ànema de Bepi Tiraca che za ghe stava fortemente sule bale da vivo....
Se invesse Toni Paciora ze astuto, (come Walter Basso, par esenpio) manda anca lu na létara al mago co su scrito che se questo ghe manda a lu tresento carte el ghe permete che la quaderna se le tegna e se la zuga. Po’ lo informa, gentilmente, che so mama ze na grandissima sbudorata e che, secondo lu, la doveva abortire sul vater quando che la gera in sie mesi e po’ tirare l’aqua.
Serti altri operatori, più seri, se fa par dire, invesse, par véndare i nùmari boni, o dirte el futuro, ramena co grande serietà, un masso de carte, forse parché tuti i morti ze ocupai coi maghi dele altre emitenti. Par distìnguerse ognuno serca de crearse un luc particolre: se fasì zapin de note nele varie emitenti podì vèdare strighe oribili co le tetasse de picolon, trans co do tete da vaca Simerdal e la vosse cavernosa tipo Pevaroti, ghei che te varda co l’ocio languido, fatalone scolaciate, òmeni barbuti dal’espression serissima e zente vestìa da pajasso del circo Togni. E tuti, indistintamente, ocupa metà del tenpo televisivo a disposission insultando la concorensa disendo che st’altri ze tuti inbrojoni, figure porche, delinquenti e sassini, escluso naturalmente lu.... In realtà i ze tuti, e digo tuti, incalcà e fodrà de denunce e avisi de garansia par “circonvenzione di incapace” che tradoto in veneto vorìa dire più senplicente
“tanburada anale selvagia a mona grando senpre”.
El lider indiscusso dela categoria ze el Divino Mago Ponpelma che parla gnanfo, in plurale majestatis, se veste come el Papa durante le messe cantà e ze incalcà de ori come la Madona del Monte Berico... Pensè che questo, a sentir lu, ga intivà dele prevision sconcertanti e inprevedibili: par esenpio do mesi prima dele ultime votassion gaveva dito che gavarìa vinto Berlusconi!!!!
(parlo del Divino Mago Polpelma, no del Papa!)... Pensè vialtri che testa!!!
Saro contàndove un anedoto personale: anca mi un giorno, in un raro momento de mona, gò provà fare na esperiensa co un mago par savere el me futuro... Sò andà al so studio, gò sonà el canpanelo e el mago me ga risposto par citofono:
- Chi è? - .... (- Comissiemo ben,! -) gò pensa mi....cussì gò ciapà e sò andà via: gò perso subito la fiducia: Come???: uno che dovarìa intivare el futuro no’l ze gnanca bon de intivare chi che sona el canpanelo???
Quindi oci ben verti, caro amigo; ricòrdate che la vita ze na tenpesta ma ciaparlo intel bussoloto ze un lanpo!
Omo da mago co facia da mona
LEGGI I COMMENTI (1)
PERMALINK
[ SONO OFFLINE ] 