(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
martedì 25 aprile 2006 - ore 20:40
LA GUERA DE TROIA vista da mi
(categoria: " Pensieri ")
(parte seconda) overo IL CAVALO DE TROIA
Dopo un pochi de ani che continuava sta storia el nobile servelo de Ulisse che gaveva pena finìo un corso de astussia par corispondensa co la Radio Eletrica de Milàn ga partorìo na idea da sbochi:
- Orsù dunque avocata nost... ehmmm... farò el famoso cavalo de Troia! Passarò par la porta dela storia e in contenporanea glielo sgnacarò in tel organo ai troioni... Sodisfassion e goduria no da poco!!!
Cussì tuti se ga messo a lavorare di scondone par far su un bel cavalone di legno, grando come na casa, co do cordele drento par farghe móvare la balote dei oci e farlo parere vivo. El no pius ultra però gera na portezela sconta di scondone sula pansa. (che sipia mèjo che vaga a caporiga?)
Indi e onde, na note scura lo gano menato co un caretino soto le mura dela sità.
Drento la pansona grassie a na scaleta, se gera sconti venti soldà grossi come bò o cofà G. Ferara e nei busi libari se gaveva incalcà venti soldà sechi cofà renghe da ovi o come el Cardinal Tonini deto “morte in vacansa”. Drento la testa ghe gera el capo che gaveva l’inportante conpito de tirare le cordele par far móvare i oci. Questo, che gera mona, pena che la portezela se ga sarà ga tacà dire:
- Benvegnesti a bordo. Tacatevi le sinture di sicuressa che stiamo par decolare... A destra potette amirare la sità di Troggia e a sinistra... no lo sò parché no vedo un ostia... Tenpo buono, tenperatura ventun gradi..signore e s...
- Mòlaghe mona e pensa a guidare!
Ga sigà Valter el Grosso ess giornalaro oriundo da Loregiola che se gaveva pena svejà.... Su un canton del cavalo ghe gera le cibarie che consisteva in tre eti de semense de suca brustolà e na damigiana de aqua...
Ze cumissià cussì la grande atesa noturna par la batallia dela storia....
EL SCHERSO RIDANCIANO FUNZIONA...
Ala matina drio le sentinele troione no sentindo el solito brontolamento de buele i va vardare fora par i busi e i vede el bestio grando senpre imobile soto che moveva le balote dei oci cofà el fusse dietro vardare tuto spasemà de qua e de là...
Dopo essarse cavà le sgarbele e vardà da novo uno core subito svejare Etore:
- Capo - taca criare el soldà - ci stano quive de soto un cavalone co ochi de fogo, imobile che no ghe digo. El ze grando, capo: el sarà de sicuro meza tonelata: na roba mai vista!
- Ma che organo genitale maschile dicci? Di che cavalo da meza tonelata sei dietro cianciare? Gero giusto dietro insognarme che ghe davo na potentissima suppa ai Greci... prega Giove pluvio, sto àseno, de no averme svejà par gnente...
- Capo più che un cavalo el pararave un lionfante... ma grando... El vegna vedare par Dio (el soldà gera cristian)!
Etore se veste e córe vedare:
- Ostrica porca che qualità de lavoro... Bela bestia, chel boion de Apolo, proprio na bela bestia! Lo vojo!!! Subito!!! Dessora un cavalo del genare si che fasso un figuron. Varda che popò de cossate Giove can! (e daghela a biastemare!!!)
Dito fato el core tore na sbrancà de fen e ghe lo fa védare....Gnente da fare... Alora el prova ciamarlo, farghe tiri, butarghe el fen ma gnente: el cavalo continua a vardare de qua e de là come gnente fusse e el fen ghe fa el stesso efeto de un bòtolo o scanarelo oferto a un musso... cioè bao...
Inrabiatiassimo el pinciagaline de Etore taca sigarghe drio, tirarghe sassi, sigare ordini, porcassi, resie, monade che no bastarìa tuto sto libro par scrìvarli tutti... Dopo aver tira zo dal’ Olimpico tuti i Dei conpreso Mercurio, che el ze el dio protetore dei termometri, Etore se ga scassà i cojoni e essendo ormai sera ga da ordine de tirare drento el cavalasso maledeto disendo:
- Ghe penso mi doman matina a ciaparlo a peladoni in tel bero sto selvàdego de un fiol de vaca, vedemo se el cumissia móvarse....
Tresento guardie (una più mona de st’altra, senò no se giustifica el fato che no i gavesse capìo che el gera fato de legno!) lo ga tirà drento co fadiga e i lo ga postà vissin la vila de Elena la Troiona che gera dietro farse el bagno col late de tre musse e na cagna par via che la gaveva le grespe in tel muso e nele tete frapolate e la celulite in te le cossate... E ela la voleva essare bela cofà Vana Marchi (?) (veciassa orenda e sberegona) par conpiacere el so Etore, pinceur incalito.
Una dele guardie intanto se gratava la zagola sorapensiero:
- El ga da averse indormessà sto bestio col motore inpissà - el pensava - senti come che el tien el minimo!
Invesse i gera i quaranta ladr... scusa, i quaranta soldà che ronchisava ala maledeta. Un paro di ore prima che il gallo sonasse le siè drento el cavalo se ga sentìo: - Trrrrrrrrrrrrrr-rrr-rrrrr - sonare na sveja e na vosse dire: - Ascolta questo suonarolo parchè se vinzi ala loteria Gratati che Vinci no lo sentirai più - cussì uno ga molà un pugnasso ala svejeta e si sono rimessi dormire...
No, sono dietro confóndarmi!
I soldà sono fuoriussiti gaton gatoni, inbestialiti anca dala fame e co quatro spadà gano sderenato le coste ale guardie e ano verzuto le porte dela sità a queli fora che sono entrati drento cofà na tenpestada. Elena gera drio métarse le smalteche sul muso e il pinciagaline dormiva co un ochio verto e uno sarà par paura che la troiona (la conosseva ben!) scanpasse col fiolo dela coga Penelopa. E in men che non se diga i solda greci ga inpirà sule spade e slance tuti, conpreso Etore prima ancora che el fasesse in tenpo a mettere le man in crose e criare:
- Par Giove caro de Dio, móro!
Elena invesse i la ga ciapà viva e no ve digo quante stramaledission che la se ga guantà dai Greci e da quei pochi Troioni che se ga salvà ranpegàndose su par i muri cofà sorzi, parchè disevano che cola bocucia da rosa, le manine velutate e co altre robe che, par decensa umana me toca ignorare, la gaveva rincojonìo Etore e causà la distrussion de Troia. Ulisse intanto gera partìo par na crocera pitosto longheta. Ma questa sono n’altra storia sula quale sono dietro documentarmi.
Fine e te end
LEGGI I COMMENTI (2)
PERMALINK
[ SONO OFFLINE ] 