(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
Monday, May 15, 2006 - ore 19:16
PRIMA DE SPOSARVE LEZI’ QUA!!! (Dal’OCO 2005 de W. Basso)
(categoria: " Vita Quotidiana ")
Matrimoni de canpagna
- Eco qua ghe semo!!! - pensarà el me letore più svejo - ghe mancava solo ch’el Basso se metesse anca lu a parlare dei matrimoni de na volta... lo ga za fato tuti, contando de risoti de fegatini, brentane de onbre e via de longo! - E invesse el letore astuto stavolta resta ciavà parché mi vojo scrìvare sì de matrimoni de canpagna, ma miga de queli de na volta, ma de queli de oncò... che oltretuto fa rìdare più de queli de na volta. El spunto me ze vegnù un dì quando passando velocemente davanti a na ciesa publica (?) gò visto parchejà davanti na machinassa che gavarà avù oltre sento ani tuta scapelotà e lustra co darente un baucoto vestìo secondo l’epoca: overo co bonbeta in testa, abito ingessato coi guanti bianchi... Tuto datorno un s-ciapo de agricoli vestìi da messa cantà vardava co amirassion sto amasso de legno e fero cussì difarente dai vari tratori e spandiloame che giornalmente i dòpara co rara perissia.
- Un matrimonio, Chica, - go fato osservare a me fiola che jera in màchina co mi - l’inbessile vestìo in màscara ze l’autista che speta i sposi!
- Chi sarà mai popà, - me ga dito me fiola - quei èbeti de sposi che gà nolegià un bussoloto del gènare par sposarse?...
Ostregazza porca, me fiola me poneva un squisito profondamente filosofico e vuto che mi no ghe rispondesse?.
- Carissima fillia, - gò tacà co sussiego - vedo co piassere che sei dietro deventare spiritualmente anarchica come io e quindi ze co gioia e giubilo che aprofondirò l’argomento nosse seduta stante. Inanzituto risponderò ala tua domanda direta, indireta, transitiva ed intransitiva: "Chi sarà mai quei èbeti de sposi?"... ze presto dito: i ze sicuramente do fioli del popolasso bestia locale, molto probabilmente abituai a viajare par i canpi col mietitrebia e par le strade co na marsa de sinquessento del 65. La moda atuale però esige che quando do se sposa, soratuto andando in ciesa a rendere responsabile el Signor Dio del’imensa vacada che i ze drio conbinare, vegna dà inponente sfogio de lusso sfrenato e benessere economico.
A costo de restare in màneghe de mudande fin al giorno del divorso che de media vien dopo qualche ano. Alora la prassi par magnarse fora anca i calseti par fare na ipotetica figura berlusconiana in rapida sintesi ze questa.
Primo: visita nele più inportanti boutique che se cata nel rajo de sento chilometri par seliere el luc da sfogiare el gran dì. Normalmente el sposo veste d’istà co braghe curte e canotiera a coste larghe, d’inverno co braghe longhe de fustagno adate ala stala, più majon de lana fato dala mare, capeo in testa e stecadente in boca... ma par el giorno dele nosse el seliarà un baticulate ingessato o nero co camisa bianca de raso co ponte rialsae, fular in seda, stile Oscar Uaild, scarpe in vernise nera da otosento euri.... La sposa, rubiconda massariota bona da sapa, che casa se mete intorno co noncuransa traversoni a fioreti, ganbaleti al zenocio da cavalo, savate o sgalmare, par l’ocasion indossarà un bianchissimo vestito in tule, fodrà incalcà de ricami, co coa a strassico de ventisete metri, velo in tule adornà da coronsina tenpestà de diamanti zirconi, vessosi guanti al gùmio e scarpete con taco a spilo, più buchè no de pissacani, ròsole e fiori de suca ma bensì de orchidee, rose, e altri sacramenti profumai in sorte. El tuto par la modica cifra de diesemie euri.
Secondo: nolegio, a pressi de strossinagio, de màchina storica guidà da autista in livrea da mona e selta de bonboniere che ga normalmente la prerogativa de èssare dela vacade imense che vien butà nele scoassare dal tre quarti dei riceventi el dì drio le nosse.
Terso: procedare a invidare almanco sentosinquanta persone che portarà schei e regali par amortisare le spese e che forma el pecorume che se vede nele foto storiche scatà davanti ala ciesa.
Quarto: riva el gran dì. I sposi co i suoceri, parenti e pecorume vario, dopo averse ingolfà el capiente buelo coi bufè in casa a base de prelibatesse speciali, ingruma su le buste e i regali e parte par la ciesa dove avegnarà la cerimonia. Qua in mèzo a un tripudio de fiori che al confronto el l’adobo del festival de Sanremo ze na peociarìa, avien el contrato. Le musiche sonà da un vero maestro de organo col’acompagnamento del Coro più importante dela zona, fa da contorno ale làgreme dei parenti streti. La mare dela sposa pianse par la sposa. El pare del sposo pianse par la spesa. Finìo el rito tuti fora par el tiragio dei quintali de riso e par le foto storiche.
Quinto: i sposi parte col regista e operatori par la "lochession" dove vegnarà girà i esterni del filme e la documentassion fotosgrafica par l’albun ma de questi parlarò più vanti.... De solito se selie la vila e el giardin de qualche nobile morto e putrefato da secoli. Intanto tuto el pecorume vien conpagnà dai genitori dei sposi nel "gnaro d’anore" dela nova copia dove se poe amirare tute le cagade che ghe ze in ogni casa. Qua i amissi del sposo procedarà ai soliti deficenti schersi in modo che i do co riva casa ala fine dela terificante giornada tira na montagna de porchi.
Sesto: apena finìa la visita guidata al gnaro d’amore el pecorume vien conpagnà in ristoranti de sigo, intel senso che pena che i te porta el conto te moli un sigo strossà e po’ te tiri le ache, par el bufè in piè e, pena che riva i sposi, par el pranso unico ala mericana dove vegnarà servie da magnare robe indegne. Pensa a tuti sti zotici afamà, abituai a pasta e fasoli, tripe col formajo, polenta e verze, che se cata in un locale rafinatissimo dove camarieri vestìi da culatoni serve "inrizzolindo la nasoppia" specialità marinare tipo: "crostini al caviale" o "ragosta in sguasseto", risoto agli scampi e sanpagna" "trota salmonelata ale mandorle", co contorni tipo "capeloti di porcino ala grilia" o "fileti di melansana in agrodolse co scallie di grana e follie di rucola" e via de longo.
El tuto in porsion picolissime e posà, vessosamente, sora na foja de salata o de vigna... Foja che vien magnà ingordamente in quanto ze l’unica roba comestibile che i zotici conosse. Altra roba passabile ze el vin che i invitati, fatispece i òmeni, tracana sensa pietà par farse corajo e sigare:
- Ciò camariero, che Dio te sbrega par metà ti e to pare, quando riva i folpi e i bovoleti co l’ajo? -Setimo: durante tuta la cerimonia e el pranso ze senpre ativo el fotografo-regista co do operatori ma no basta: almanco sinquatrè dei invitati se ga portà drio, par fare òtima figura, machinete fotosgrafiche digitali e videocàmare. Così i tenta pantesando e porchesando oribilmente de farse el filme e le foto da soli. Roba che nela miliore dele ipotesi riesse par sbalio al’uno par sento in quanto pur essendo abilissimi co la sapa e vangheto co le robe leletroniche no i capisse na tega... St’altri novantasete invitati fa le foto col telefonin... Finìo de magnare ghe ze l’imancabile orchesta che sona el lissio e tuto el popolasso suà e sgionfo cofà porsei da grassa se scaena in danse erotiche e lassive...
Ale do o tre de note el sposo stufo morto e depresso paga el conto (minimo ventimila euroni) e co i soliti amissi in coste torna casa par rónparse i maroni coi vari schersi ebeti de cui sora.
Otavo: i sposi sparisse par almanco quìndese dì par el viajo de nosse che de solito ze a Santo Domingo o ai Caraibi (el sposo selie sto posto parché el crede che qua se magna caraboi)... Da qua i do desgrassiai manda via na montagna de cartoline co scrite inteligentissime e spiritose sul tipo: "A Santo Domingo andai, a te pensai e sta cartolina ti mandai!" o "Qua stasemo da Dio, magneno, bevemo e..."
Nono: al ritorno ze pronto el filme e l’albun.... I sposi paga i sirca diesemila euroni e se autoinvida da tuti i amissi e parenti par mostrare co orgolio el resoconto "dela giornata più bela dela sua di loro vita" e i taca el cosideto "tur de scassamento de maroni"... Infati ai parenti streti, e anca a queli larghi, no ghe ne frega gnente assolutamente né del filme né dal’albun ma ghe toca incartàrsela e far buon viso a cativo gioco.
Cussì sera dopo sera nele varie case riva sbolsegando la sinquento co drento i sposeti seguìi da na stassionvegon scortà da do moto co i guidatori co le palete... Sicome che l’albun costa l’ira de Dio giustamente el pesa meza tonelata e par portarlo in giro ghe voe un parmesso e na machina speciale co minimo do operai nerboruti che prima i lo scarica po’ co delicatessa i lo posa sula tola che ris-cia de spacarse par metà dal peso... Po’ i do operai se piassa ai cantoni del’albun e al comando dela sposa i gira le pagine. Sto albun ze conposto da otomiesetesento pagine che contien sedemila-otosento foto circa de cui otomiesiesentonovanta dela sposa, oto del pecorume e do delo sposo... Finìo de vardare le foto tra comenti entusiastici del tipo: "Ostia che bea che te sì qua... no te pari gnanca ti!" se se mete tuti sui divani par ciuciarse el filme che de media costa setemila euri e quindi dura tre ore. Apertura co i titoli, imagini studià in tuti i particolari musiche che a ocio ze stà fate aposta da Enio Moricone e efeti speciali semenà co sapiensa par tuta la durata dela tortura. Ala fine nei presenti resta un dubio. No ze che de scondon el fotografo gabià avuo la consulensa de Spielberg??? Visti i efeti e visto el costo!!!
Ma el top del bongusto vien ragiunto dai più fini che se fa fare na gigantografia de trèdese metri quadrati dela foto indove, trati in tera su un canpo de spagna, i se tien par manina vardandose sule balote dei oci. La foto vegnarà picà in saloto e dopo tre ani, pena definìo el divorsio, finirà nele scoasse insieme col’albun e e el filme. Più precisamente sul setore seco-ingonbrante...
- Popà, - me dise me fiola - se mai mi me sposarò, lo farò in comune, coi gins e magari se te me presti la màchina sarìa anca mèjo... cossa dìsito?...
- Chica, ma sito gnanca mata!!!... cossa sito drio dire???... E vuto che l’unica fiola de un ilustre leterato cofà mi se sposa da peociosa?... in ciesa, co el vestito de Dolce & Gabana, pranso in ristorante de lusso e tra i ospiti vedaremo de invidare anca Berlusca e Fassino par la "par conicio" e Ferara par farghe vèdare el mostro ai putei... ansi Fassino no, parché gò idea che pitosto de pagarghe un pranso a questo ze mèjo cronparghe un capoto de stracan!!!... Naturalmente pagarà el tuto to suocero parché mi sò idealista e contrario a sti sprechi assurdi!!!
PUTEI MONE
.jpg)
- Me sorea bate a màchina!
- La mia invesse indove che capita!!!
LEGGI I COMMENTI (7)
PERMALINK
[ SONO OFFLINE ] 