(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
Sunday, October 15, 2006 - ore 09:21
VIAJO TORNO EL CODEGHIN O MUSETO
(categoria: " Ricette ")
Dedicà a Beat Shop che ga da èssare un sbafadore a nastro!!!
Intanto bongiorno a tuti... bruta jornada oncò... a me sento sgionfo... Che sia gnanca la magnada de jeri sera?.... Strano: a gò magnà un piato de risi in bianco e gò bevù do litri de nero: ga da èssarme stà sul stómego el riso!...Boh.....
Ma tornemo in tema, come ga dito l’alievo senpio Marieto Piva dopo aver scrito mèzo tema sul banco. El codeghin, dito anca cuesin, coesin o museto na volta gera el salado dei poareti. Ansi, par èssare più precisi, dei peociosi nulatenenti, visto che poareti più o meno se gera tuti. El vegneva fato sù co tuti i avansi de carne del porseo e el gera grasso ora dai modi. Amigo intimo del colesterolo, el museto vegneva sbranà lesso co grandissime scassolà de puree de patate... Ala fine del luculiano pasto se se ciuciava i déi che gera onfegà in maniera vergognosa parché el codeghin par èssare particolrmente bon el ga na avere na carateristica unica: quela de èssare petente e tachente, e de desfarse in boca.
Termino sta soferta na intensa analisi del codeghin afermando co gran sicuressa che come tanti altri magnari (polenta, osseti, luganega,ecc) anca el museto ze entrà nel novero dei piati da ristorante de lusso e che el vien fato sù co estrema cura e tanto manco grasso de na volta vista la paura boja del costesterolo,, pur nel rispeto dele tradission e del nostro bon magnare veneto...
El modo de dire veneto
Partire salado e tornare museto
Vol dire viajare par gnente, no fare esperiense utili e tornare casa più macachi de quando se ze partìi....
L’ANTIPASTO: CODEGHIN IN SFOJA
Cossa ghe voe par 6 persone
Un codeghin del peso de sirca 800 grami – 300 grami de pasta sfoja – 300 grami de radicio rosso passà nel butiro – 20 grame de formajo fresco (montasio, asiago, lateria) – un ovo.
Tachemo coi lavori
Cusinare el codeghin, cavarghe el bueo, e métarlo a rafredare, destirare la sfoja che ga da avere un spessore de sirca 2-3 milimetri. Destirare un leto de radicio che poco prima gavì fato passà velocemente al butiro, metarghe sora el codeghin, métarghe sora el formajo tajà a fetine e fare sù un ròdolo come se gavessi da fare un strudel. Spenelare i bordi dela sfoja co l’ovo sbatuo, sigilare puito i bordi jutandove co la schina de un cortelin, spenelare co l’ovo tuta la pasta e métare in forno a 180° par sirca 20 minuti... Quando la sfoja ze cota e bela dorata tirare fora dal forno, tajare a fetine e servire subito.
El me consilio
Sto sinpatico antipasto ze adato ala stajon invernale quando nela nostra canpagna se copa el ma-cio e cussì se poe catare i òtimi codeghini nostrani....
LEGGI I COMMENTI (1)
PERMALINK
[ SONO OFFLINE ] 