(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
Tuesday, October 17, 2006 - ore 06:43
MÈJO EL ITALIAN O EL VENETO?
(categoria: " Pensieri ")
Ogni tanto (ansi quasi ogni dì) sui giornali vien fora le solite vacade fruto de riflession che ga più del ginecologico che del cerebrale: pensieri da mone, insoma. L’ultima grandissima vacada che gò leto riguarda un sondaglio sul sesso dal quale esso il cui risultarìa che ze più sexy e ecitanti (in parole pòvare “fa più ingalare i mas-ci”) le done che parla in dialeto che quele che parla in fin o in italian. E sodisfassion no da poco le più apetibili pararìa èssare quele che parla in veneto. Toh, ciapa!!! E pensare che darente casa mia na bona parte dele gentili signore se sforsa fora dai modi par parlare in talian parfeto. Una che stà poco distante da casa mia normalmente usa un linguagio forbitissimo co i toseti e le amighe ma quando che la ze casa e i congiunti (in particolar modo la suocera e el marìo) ghe frantuma le tole la trà de quei porchi e resie spaventevoli da andare indrìo schina. Deventando cussì secondo el sondaglio na dona desiderabile squasi quanto la Ferili. Anca la Malia Tetona, robustisima vedova cinquantene che oltre a do tetasse de trèdese chili l’una de picolon ga anca in dotassion un paro de mostacioni da Ghiness dei primati, co la va in giro la tira la bocassa fin a farla deventare un buseto a culo de galina e serca de fare la vosse caressevole parfin co la va in pescheria:
- Bongiorno sior pessivendolo: mi dagga, par piassere pagando, un chilo bondante di renghe infumegatte, da uovi mi racomando, no da late, e un mèzo chilo di folpi... che sipiano da feci... acipichia, ogi gò un robusto apetito....
Vuto mètare quanto più seducente che la sarìa se la esordisse cusì:
- Ciò, capo, che Dio la spolpa: el me daga un chio de renghe da ovi e mèzo chilo de polpi da caca che gò na fame che magnarìa anca un toseto col panolon e tuto, sacramentona!!!
Toni Tega, che passa tuta la matinata in pescarìa par védare se el ze bon de ingansare qualche tenca (legi: “adescare una dona”), a sentire un discorso cussì ghe ze sdrissarìa le antene, i peli nele rece e anca altre robe e saltarìa parària cofà un bussoloto de carburo:
- Vieni meco, dolce Malia dele mie malie, che se ti guanto ti meno in teza, ti sbrego le mudande, e ti dò na trapanada con mio trapano percussore co ponta da venti da murari da farti andare via a gatognao par oto dì... Giuda onto fillio di mussa!
Secondo el sondaglio però la risposta dela Malia podarìa èssare na slepa mortale sui stefani del poro Toni e na rata de insulti terificanti. Come mai???... Parché i òmeni più sexi e cucadores ze queli che parla sì in dialeto ma in toscan.... Queli invesse che parla in veneto ala done ghe fa bao, ansi pitosto de darghela a sti soponi le se fa copare. Conportamento noto in pissicologia sessuale come “Sindrome dela Santa Martire”. Savìo cossa che ve digo?: gò fato un sondaglio tra i me conpaesani... La domanda gera questa: “Cossa pénsito, di grazia, (par dare tono estremante educato) dei sondagli de opinione?” Ecove i dati:
el 38% me ga mandà a farla sule roe ( o sule ortrighe)
el 27% i sondagli se li peta sui maroni
el 12% no sa cossa che i ze
10% no ga risposto parché gera drio fare un sondaglio
8% li odia parché i ze velenosi (i ga da averli confusi co i “sarpenti a sondagli”)
5% (formà da Toni Bugansa, Gineto Scataron, Giovani La Prostata, Marieta Busolin, Tilio Caregheta, ze entustiasti e anzi i voleva che ghe ne vendessi un paro a testa (da peri)... ma no i fa testo in quanto i ze tuti e sinque dei grossissimi mone...)
Ma da tuto questo cosa ne deduco???... Elementare Watson: chi che crede ai sondagli se no ze mona ze cuco!!!
COMMENTA (0 commenti presenti)
PERMALINK
[ SONO OFFLINE ] 