(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
Monday, January 22, 2007 - ore 18:22
ELUCUBRASSIONI SUL MATRIMONIO...
(categoria: " Riflessioni ")
Breve comedia in un ato
Dialogo tra mare e fiola
Ale: - Mama ti te esageri a parlare mae deoi òmeni: qualche volta i ze anca gentili....
Susì: - Beh a pensarghe ben ze vero: par esenpio to pare ieri me ga stupìo: semo andà al supermercato e lu ze smontà de corsa e me ga verto la portiera dela màchina....
Ale: - (rivolta al pubblico) Quando un omo verze la portiera dela màchina ala mojere i casi e do: o ze nova la màchina o ze nova la mojere....
Susì: - Va ben va ben.... comunque ricordate senpre che el marìo ze chel poco che resta del moroso dopo el matrimonio...
Ale: - Ma alora par noaltre fémene el matrimonio ze come i aresti domiciliari!!!
Susì: - Pesò cara, pèso.... el ze come na trapola par i sorzi: quele che ze dentro farìa de tuto par tornare fora... quee che ze fora fa de tuto par andarghe dentro... Come ti....
Fine e te end
Batute sage
El matrimonio senplifica la vita però conplica la giornata!
El divorsio ze l’ultima gioia del matrimonio
El matrimonio ze la causa prima del divorsio
Sposarse no vol dire solo unirse a na fémena: vol dire anca separarse da tute st’altre!
El matrimonio ze el presso che i omani paga par avere sesso fresco tuti i dì (?). El sesso fresco ze el presso che paga le fémane par el matrimonio
Un omo e na dona sposai poe ancora andare d’acordo Basta che no i sia sposai tra de lori!!!
Anca el matrimonio d’intaresse ze un matrimonio d’amore!!! Si, de amore par schei!!!
La suocera ze come la speranza: ze senpre l’ultima a morire
El matrimonio ze na caena cussì pesante che par portarla bisogna èssare in do... dele volte anca in tre!!!
La barzeleta in tema…
Ciesa de Bojon durante un sposalissio. El paroco ze drìo delucidare i sposi che bisogna tronbarse solo par fare putei, che la mojere ga da seguire senpre el marìo, (anca quando che el va a cacia o a done?), che no bisogna che el marìo ghe daga ala consorte dei potenti pugnassi in testa, quando de colpo se spalanca el porton in fondo e tra el stupore generale vien vanti un sogeto a dir poco strano. Un omo grando e grosso, chiaramente in stato etilico avansato, vestìo col poncho cofà i messicani pelandroni, chitarona in man e co un potentissimo sonbrero in testa che dopo essarse vardà torno co ocio turbio se invia a bisato verso l’altare. A védare sto elemento nela casa del Sig. Dio, che no se degna gnanca de cavarse el capelasso, tuti queli che el ghe passa darente ghe sussura: “ El sonbrero, par Dio!”... - ma gnente: el mona continua inperterito a avansare tranquilo. Intanto l’omo riva al’altare varda el prete che anca lu ghe siga: - El sonbrero, el sonbrero!!! -, sfódara un soriso a trentadò denti, se volta verso la zente, inbrassa la chitarona, fa un inchino e dise: - E ora, amissi svisserati, a grande richiesta eseguirò “ El sonbrero”!!!
LEGGI I COMMENTI (4)
PERMALINK
[ SONO OFFLINE ] 