(questo BLOG è stato visitato 27792 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
Tuesday, May 15, 2007 - ore 19:14
BEC STEI DEL VIAJO A VALENCIA PAR "STRISSIA LA NOTISSIA"
(categoria: " Viaggi ")
Se parte come senpre dal’aeroporto de Venessia dove rivemo mi, Moreno, Luca (atore famosissimo - pensè che un dì a Padova na vecia lo ga riconossuo - interprete, ganso e scansafadighe mondiale), Enrico (altro sagace operatore)... Se inviemo al cechin co un Moreno stralunà e stufo agro... Ze oto dì che no’l dorme, sete dì che no’l magna, par via che el ga girà meso mondo onde produre servissi a maneta. Quindi el ga l’ocio bovolon e el se strassina pietosamente de qua e de là fasendo i famosi "tre passi su na pria" (anda tipica del vecioto che ze drio fare l’equilibrista sul’orlo dela tonba!).. Ogni tanto el se posa su na colona e ciapa sono in piè... Fortunatamente no’l ronchisa e cussì ogni tanto un sgorlon lo riporta nel mondo dei viventi sensa che nissun se ne acorza... Al’ultimo minuti riva Manfre e Stefano, do dei più grossi operatori de Mediaset i quai ga come moto "Chi no magna o ze malà o ga za magnà!"... Questi ze incalcà de telecamare, microfoni, batarie, vide, rondee, cassalevide, pinse, cavi, e pena che i passa co sforso estremo soto ai metal detetor sona in contenporanea meso aeroporto e riva parfin i cani da usma che li nasa co sospeto... po’ i va via disgustà... Va ben montemo in aparechio e notemo che probabilmente la ostes ga da èssare malà parché al so posto ghe ze un spantasson de sentoeventi chili lordi... probabilmente so nona! Comunque el viajo va ben e rivemo fin a Barcelona parché qua se fa "na scala"... almanco cussì i me ga dito... Spetemo na oreta, Manfre e Stefano va scondarse in cesso onde fumare e po’ a ciavarse un paninasso co na bireta da litro... Ciapemo n’altro aparechio a finalmente rivemo a Valensia. Qua bisogna nolegiare na machina e uno ( me sfuge el nome) se inpunta parché el voria tore na biemevu scalepotabile... Na scaretà de insulti lo riporta al’ordine e Moreno decide par un furgon incalcà de careghe e co un bagaliaio grando senpre... Solo che sucede un casin bestia parché l’adeto al carico (Stefano) no ze bon de farghe stare tuto e cussi taca porconare e dire robe brute contro el goerno e i ministri in sorte... Ala fine montemo su tuti, Moreno ciapa sono e pian pianeto rivemo inte ul albergo lussuoso dove vegnimo acolti da un siorato-fachin co na gran facia da stitico che ne mena nee càmare... Un paro de ore par lavarse, desfare le vaise e semo pronti par andare a magnare... E che secondo vialtri, a Valìensia in Spagna, un s-ciapo de selvadeghi come ze el nostro (Moreno escluso parché el ga na finessa da nobile in ogni situassion) cossa poe andare a magnare?... A paeja forse inte un ristorante tipico????... Ma gnanca par idea: patate frite, costesine de mas-cio ai feri e bira, drento un locale messican!!!!
(continua doman)
LEGGI I COMMENTI (5)
PERMALINK
[ SONO OFFLINE ] 