(questo BLOG è stato visitato 27792 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
Friday, June 22, 2007 - ore 10:43
SENA SEGRETISSIMA DEI COLABORATORI DE MORENO MORELLO!!! "Brec stei"
(categoria: " Lavoro ")
Preciso subito par i eventuali "ospiti! ignoranti cofà tonpinare che el termine in inglese purissimo "brec stei" vol dire "dadietro ale quinte!... Eco fato. Alora el signor Morello, da persona de raro savuar fer e che sa parlare in ponta de piron e anca indiferentemente in cicara, na setimana fa ciama tuti i cosideti colaboratori (in realtà semo na smanegà de mone) e ne dise che la sera del 20 semo tuti invidai a magnare e bevare presso un noto agriturismo. Naturalmente el tuto ze agratis visto che pagarà tuto lu (che brava persona orco can!)... Ala fine del caloroso invito ghe ze l’ordine perentorio: "SIETE ATESI ALE 7,30 a CASA MIA DI ME OPURE ALE 8,15 IN LOCO CO TOVALIOLO INTORNO E PIRONE IN MAN"... Mi naturalmente co tuta la fameja feminile al seguito me organisso e ale oto so za in ristorante co le ganbe soto ala tola in fremente atesa... Dopo diese minuti riva l’amigo fidato de Moreno da Verona.... Po’ basta, restemo tristemente d soli coi stomeghi vodi fin ale nove manca un quarto... quando ala spiciolata taca rivare i ilustri ospiti (che Dio li fulmina sechi tuti!)... Bon ale nove, quando ormai la fame ze a liveli che quea del terso mondo se poe tranquilamente ciamare "apetito", se sentemo a tola e Moreno taca contarne come se fa coe galine in ponaro... Conta e riconta manca senpre tre persone e quindi visto che semo educatissimi e rispetosi del "bon ton" no se poe tacare magnare.... "Ma se poe savere chi casso manca, orco qua e orco là?" siga uno che no ghe ne poe più.... E secondo vialtri chi poe mancare?: MANFRE co gentile e piacente consorte e vezzosa figlioletta!!!... El quae Manfre e parentame streto riva co passo folpato e espression corugiata, sigareta in boca, come gnente fusse ale nove un quarto!!!! Incurante dei porchi e insulti che svola in sala el noto operatore spiega stupio che nela tangensiale de Mestre ghe gera, ma varda ti!, na coa mostruosa... (MANFRE.. ze dai tenpi de Giulio Cesare che nea tangensiae de Mestre ghe ze na coa mostruosa!)... Bon, finia la spiegassion el taca na nosa micidiale parché nissun ghe ga tegnù i posti indove voleva lu overo petà darente in coste el so socio de sventura dito Stefano anca lu possessore de piacente signora e vezzosa fioleta. Forsa de farghene, prima chel se meta su un canton a criare, zontemo na toea e Manfre ze dove voeva essare, overo darente Stefano mi, me mojere me fiola, n’altra bea copieta de amissi, Ilenia, la segretaria flessuosa e conturbante del sior Moreno e Enrico, altro amigo de tuti che ga fato varie incursion co Moreno in gir ero par el vasto mondo... Darente el noto inviato, la dolse Laura, piacevole (ala vista e penso, ma no lo posso provare, anca al tato), so popà Romeo, in veste de managher, autista e consulente a tuto canpo, la Gilda otimo esenplare del gentil sesso, altri amissi tra cui la quale na donzela vegnua a magnare a sbafo in quanto Moreno, conplice un ataco de teresina, la ga invidà anca se nel’anata in corso no la gaveva fato servissi (però la ghe n’aveva fato de boni l’ano prima! quindi presensa più che giustificata!) ... Bon se taca far laorare le ganasse (gran qualità sia de servissio e de cibarie), se siga, ride e Moreno e Laura, come fa de solito i sposi, fa el giro dela tolada par stare co tuti... La serata score piacevole e perfin Manfre magna, ride e gode come un mas-cio. Stefano invesse magna a tonfon e gode par dentro fasendo finta de gnente... Ala fine lel lauto (osarìa dire luculiano) convivio, riva i cafè e qua eco l’ultima trovata del Moreno e Laura: el cafè al Viagra overo "cressinman"... sto particolare cafè ghe toca a pochi eleti: Manfre, Stefano e a Marco Pacagnea (presente co legiadra consorte)... Sto cafè funsiona cussì: pena che te sgiaventi drento la tassina el sucaro e te tachi "menare" col sculierin in tre secondi el liquido cresse de volume (da qua el nome Viagra) e spassora soto i oci alibiti del consumatore ignaro che dopo el momento de stupore inissiale taca a porchi! Ciò ze dovuo a na inportante lege chimica che aferma solenemente che se al posto de sucaro intel cafè te ghe sgnachi frissina el cafè taca bojare!!!!... Eco, dopo sto inportante esperimento sientifico Moreno ga tacà un discorso che ga comosso fin ale lagreme i astanti. Aplauso finale,
atesa spasmodica che Moreno paga el mostruoso conto (dio no voja che al’ultimo el se pentissa!)... l’amaro dela casa (anca questo agratis!) e po’ tuti se invia co tipica anda a bisato verso casa... Dio volendo che la polissia no ne ferma e ne fassa supiare intel balonsin!!!... Fine e te end!...
(A parte i schersi, grassie a Moreno, gavemo veramente passà na gran bea serata... sarà parché semo tuti sveji, sinpatici, sarà parché no gavemo pagà, ma na serata cussì ze veramente da tegnere tra i ricordi più bei!... Mi sò za drio pensare a quela del’ano prossimo!!!)
(Foto trata fora dal’ultimo servissio girà st’ano co Moreno: quelo sui efeti sessuali del SEDUX)
LEGGI I COMMENTI (2)
PERMALINK
[ SONO OFFLINE ] 