Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27791 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
mercoledì 7 maggio 2008 - ore 19:51
E ECO EL SEGUITO!!!
(categoria: " Vita Quotidiana ")
Senpre dal me libro.
Sansone si tanbura Dalila che lo tosa a zero. Lo scaveglione perde le forse e cussì i Filistei finalmente se lo cavano da torno…
El problema vero de Sansone gera che lu oltre a na forsa micidiale che vegneva dal fato de avere i caveji più longhi de queli del semo de Marzulo, el gaveva anca el cicio famelico e quindi el gera senpre in serca de femene volliose da incoconare.
L’ultima in ordine de tenpo ze stà na serta Dalila (cantante egissiana che ga anca partecipà al Festival de Cana)… Questa però, oltre che afamata di uceli sensa pene, gera anca afamata de schei e cussì quando i principi filistei ghe ga promesso pecunia a tonfon e passagi televisivi su Telegaza se la riusciva a far confessare a Sansone el segreto dela so forsa la se ga subito da fare…
Cussì in leto come che Sansone gaveva finìo la caladina biblica (essendo un personajo biblico) e pantesava de bruto, sta Dalila qua se dava na sguaratadina come fa le galine dopo l’incoconada da parte del galo e po’ la ghe dimandava co la vosseta caressevole mentre co le manine ghe caressava le recione da musso:
- Dime caro Sansone dei miei sansoni, ma tuta sta forsa che te ghè, come se podarìa fare par fartela pèrdare?
E Sansone che no gera proprio nane del tuto rispondeva, de volta in volta, na vacada qualsiasi tipo:
- Gnente cara, bastaria ligarme el corpo umano tuto datorno co dele corde nove de balin e mi deventarìa fiapo cofà un canarin!
Alora Dalida de volta in volta lo ligava, secondo le senpie indicassion, finché el dormiva e po’ sigava:
- Ocio, ocio Sansone ghe ze i Filistei che voe batarte!!!
Sansone se svejava de boto, sbregava le corde e ghe dava na paca de legnae ai Filistei… E questo ze sucesso almanco tre volte.
Segno questo che sia la donacia scostumata che lori gera èbeti forte.
Infin Dalida gera deventà cussì fastidiosa e petente par savere el so segreto che Sansone, come sucede a tuti i marìi se ga catà davanti a un bivio orendo: o coparla co un pugno in mèzo ai oci o dighe la verità e farla finìa.
Come quasi tuti i marìi el ga sielto la seconda solussion e ghe ga spiegà che tuta la so forsa gera nela scavejara e se el gavesse perso i cavejji Dio che anca lu gera fan dei Led Zeppelin, se gavarìa intavanà e lo gavarìa reso fiapo cofà un bigato malà de ostiasborosi.
De note, la infame sbudorata, lo ga tosà a zero co un rasuro leletrico e la matina drio la prima roba che Sansone ga visto ze stà na sluamarà de Filistei, muso duro e bareta fracà, drio farse su le màneghe… Ma la ze stà question de un atimo parché un pugnasso in mèzo ai oci lo ga fato reindomessarse subito. Co el se ga svejà el se catà in preson incalcà de caene e inpegnà a far andar torno la màsena de un mulin…
Miseranda fine de Sansone che si chiapa soto le macerie de un tenpio pagano
Ma in preson a Sansone i caveji ga tacà ricréssarghe e cussì chieto chieto el spetava l’ocasion bona par darghe na supa gajarda a sti quatro fioli de vaca de Filistei oltretuto adoratori de un dio che se ciavama Dagon.
L’ocasion bona se ga presentà quando i ga organisà na gran festa in ciesa par ringrassiare el so dio co lo slogan: “Chi adora el dio Dagon/de sicuro no ze un cojon!” e par far fare un poco de spetacolo, visto chel grupo de cabarè Risi & Mana no jera disponibile parché i so conponenti faceva i mone a Boara Pisani i ga deciso de doparare Sansone che gavarìa dovuo ranpegarse sù par el palo dela cucagna.
- Seto che popò de sganassade che se fasemo, - ga dito el presidente dela pro loco - intanto metemo su un palo pien de sgresende, po’ lo onfeghemo tuto de grasso de lujo e se copemo dal rìdare a vedare i sforsi disumani chel mona farà par ranpegarse… Lo gò za messo sule locandine: “esibissione di Sansone el squajatolo umano”
- E se no’l volesse ranpegarse? - dimanda el segretario dela pro loco.
- Gò pensà anca a questo: darente al palo piassemo un negroto co na scùria de striche de curame e se no’l voe ranpegarse el negroto ghe vis-cionarà le rece fin che ghe le riduse come do verze… Cussì ridemo ancora de più!
Messa ai voti la proposta ze stà votà e cussì el di drio tuto el popolo gera in ciesa par gustarse el spettacolo.
Riva Sansone incaenà de bruto... (intanto in preson ghe gera ricressui ben i caveji e de conseguensa tornà le forse). El se varda torno e po’ taca criare:
- E mi, secondo voialtri gavarebi da ranpegarme su par chel palo incalcà de sgresende?... Ma no me passa gnanca par l’anticàmara del servelo…
A sentire sto rajonamento el negroto se fa vanti par molarghe na s-curiada ma ghe riva na papàvara da quintale sui denti davanti da Sansone… El negroto se varda torno, se mete na man davanti ala boca come se ghe scanpasse da ridare, infin el cade indrioschina spuando denti dapartuto come se el fusse drio samenare saturco.
El popolasso bestia taca ridare e bàtare le man entusiasta.
Alora intervien el presidente dela pro loco:
- Senti caro, qua el popolo voe divertirse… Alora fasemola curta… o te te ràmpeghi su par el palo e te fè el squajatolo umano o mi…
- O TI COSSA??? - siga Sansone slargando i brassi e spacando a tochi le caene.
- Gnente… gnente… ehmmm… insoma ranpegate su par calcossa senò mi qua che figura ci facio… Dopo caso mai te pago par el disturbo e …
Sansone se varda torno e po’ dise:
- Se fa presto a dire “pago”… Ma quanto par èssare precisi?
- Ehmm… Fasemo mile sesterzi!
- E se invesse vago drito quanti me ne deto?
- Come?.. no gò miga capìo!
- Assa stare: la gera na batuta… Ma cossa vuto capire ti de batute… L’unica che te podaressi capire ze quela fata co na clava sui sentimenti!
- Varda, fasémola curta: ranpegate, fa calcossa e mi tre dago domìe sesterzi e na fémena nuda co na quarta de regitete!
- Uhmmm… Quasi quasi desso podemo anca rajonare: varda socio, podarìa ranpegarme su par una de ste colone… - e guanta na colona che se cata da na vita in mèzo ala ciesa e la cava da in tera par portarla in centro.
Fatalità el mona no’l ga miga cavà la colona portante? In tre secondi la ciesa taca tremare, sgorlare e dopo diesi secondi la crola miseramente fasendo un fracasso bestia… e naturalmente tuti queli che gera drento (oltre tremie filistei) se ciapa i roinassi in testa e defunge miseramente.
Conpreso Sansone che no ga fato gnanca tenpo de dire:
- Orca bestia che mona che sò!!! - chel gera ze drio inviarse a rasso verso el Regno dei Cieli dove vegneva acolto da eroe.
Fine e te end.
COMMENTA (0 commenti presenti)
-
PERMALINK
lunedì 5 maggio 2008 - ore 13:54
SENPRE VANTI COL MONA DE SANSONE!
(categoria: " Vita Quotidiana ")
Sansone va a putane, si inbriagga e poi inchiava le porte dela cità di Gaza
Come se sa el tenpo core pissicologicamente, i ormoni, invesse, core par el corpo umano maschile, la coa tira e anca Sansone vien preda de Satana…
Cussì el parte e el va a Gaza, zona putane.
El scaluma una co un paro de lavaroni tipo musso o Alba Parieti, do tetone da vaca Simerdal tipo Carmen Di Pietro, trata el presso e po’ va farse na caladina in càmara de casa sua…
(Andatosene poi Sansone, a Gaza, vi incontrò una donna di facili costumi ed entrò in casa di lei.)
Solo che nela strada dele putane ghe gera un antenato de Corona che ghe fa un ritrato (no esisteva le machinete sfotografiche n.d.a. ) finché el gera drio tirare sul presso e core véndarghe l’esclusiva ai Filistei.
Alora un paro de questi core davanti el casin par cucarlo al’ussita e coparlo de bruto.
Però i decide anca lori de andare a putane e tornare a téndarlo la matina drio.
Ma Sansone, che nel fratenpo se gera inbriagà cofà na cioca, a mezanote se alsa, va fora guanta le porte dela sità, le cava dai poisi, (i sarìa i cosideti “cardini” n.d.a.) se le carga in spala e scanpa par i cassi sui dimostrando sì de avere na forsa bruta ma anca de èssare un gran mona parché solo un mona poe fare un ato del gènare.
(Or Sansone dormì sino a mezzanotte, poi alzatosi, afferrò i battenti della porta della città con i due stipiti, li staccò insieme alla sbarra, se li mise sulle spalle e li portò in cima al monte che è in direzione di Ebron)
LEGGI I COMMENTI (4)
-
PERMALINK
sabato 3 maggio 2008 - ore 14:50
VANTI ANCORA COL MONA DE SANSONE!
(categoria: " Vita Quotidiana ")
Senpre dal libro "Monade Bibliche" de W. Basso cioè mi...
Sansone, par scherso, brusa el saturco ai filistei e ghe ne fa allio. I Filistei si intavano e li brusano la mojere e il suocero. Sansone con na ganassa de musso copa un mejaro de òmeni…
Un dì finché i agricoli filistei se pareciava par andare nei canpi a sunare el saturco Sansone, visto chel gaveva perso la mojere par via che so pare ghe la aveva inprestà (?) a un so amigo tegnéndoghe in canbio la sorela più zóvane che oltretuto gaveva anca le tete più grosse ma che a lu no ghe piaseva parché la aveva el fià che spussava, ga pensà de farghe un scherso ridanciano a sto popolo de cui faceva parte anca el sinpio de so suocero.
Alora el ga ciapà tresento siacali, li ga ligai par la coa a do a do po’ sule coe ga messo un candeloto inpissà e ga molà le bestie inferocite in mèzo ai canpi de saturco.
In sto modo el ghe ga sbrusà fora tuto el racolto in piè e anca quelo butà… In più, nela confusion ga ciapà fogo anca vigneti e uliveti.
No ve digo i porchi e le resie che ga cavà i paroni dei canpi.
Come però che i ga savuo che el responsabile del misfato gera Sansone che gaveva conbinà tuto sto casin par farghe dispeto al suocero e ala mojere cossa gai pensà sti schifosi?: i ghe ga molà de porchezare, i se ga fato su le màneghe e ze andà catare i do e co na tanica de benzina e na scatola de fulminanti i li ga inpissà e li ga lassà inpissai finché i se ga carbonisà parben.
Sansone, dispetoso come la càvare, pena che ze stà avertìo dala polissia che i Filistei che gaveva fato rosti mojere e suocero invesse da cavarse i caveji dala testa a sbrancà dala disperassion, se ga fato sù le màneghe anca lu e ga cumissià sguaratare e sgiaventare parària filistei come i fusse birili copàndoghene un smerdaro.
Calmà chel se ga el ga mandà a farselo métare tuti e ze andà abitare inte na caverna in zona Etam.
Passa del tenpo.
Un dì i Filistei che ormai no ghe ne podeva più de sto selvàdego che oltretuto drento la so caverna personale scoltava musica roc a tuto volume i ga deciso de darghene na calca in modo chel se chietasse… Par fare questo i mandà dei òmeni e un serto sior Giuda a torlo par portarghelo…
Questo, dopo averghe contà un fracasso de bale, lo ga ligà cofà un salado da tajo e i lo ga menà a un paese dito Lechi abità dai lechini (come Emilio Fede) (appena arrivato a Lechi gli si fecero incontro i Filistei con grida di gioia) e subito el più mona del s-ciapo ga tacò sigare:
- E alora, selvàdego de un scavejon del’ostia, ghe la molito de fare casin?... E po’ cossa ze sto scoltare a tuto volume chel mona co la vosse da cula de Roberto Panto (Robert Plant) sassin del solfegio e delinquente del spentagrama???
- COME TE PERMETITO BIFOLCO DE INSULTARE EL CANTANTE DEI LED ZEPELIN?... Vuoi tu forsanco morire imantinente? – ga sigà Sansone coi oci fora dala testa cofà un s-cioso-limega.
- Ma moleghela insemenio e tajate i cajii!!! – insiste el malnato de Filisteo.
E alora Sansone, che se aveva pena fato na cana de mariagiovana e aveva le fumane se ga varda torno, ga sfoderà i bicipiti sbregando le corde, ga tolto sù na massea de musso (?) che ghe gera in tera e menàndola torno a mo de èlica ga fato straje e desterminio de Filistei copàndoghene oltre un mejaro e po’ el ga anca scrito na poesia: (con una mascella d’asino / li ho conciati per bene;/ Con una mascella d’asino/ ho percosso mille uomini.)
Finio el masseo a Sansone vien su na sen bestia. Alora el varda alto e taca sbecare verso il di lui suo Dio:
- Ciò capo, ti, grassie ale me sublimi forse, te ghe permesso che libarasse el me popolo de stà smanicata de slandroni fetenti e desso vuto che mora da sen e magari casca in man a sti sensa Dio che oltretuto no ga gnanca el cicio circonciso?
El signor Dio, fatalità, passava a chel ora proprio de là e cussì va fato aparire dal gnente un bar indove i vendeva aqua San Benedetto… Cussì San Sone ze entrà ga bevù come na tenca, pagà e ze tornà ala sua di se caverna…
Nota informativa
Quela dela massea de musso come arma inpropria ze una dele più gran vacade che gabia catà in sto inportante libron… Infati mi sò andà bastansa in giro par el mondo: a Londra, a Sbarcelona, a Valensia, a Campigo, Padova, Roma, Barbona, Parma de Majorca, Rodi e altri luoghi ameni, ma, giuro massee de musso par tera no ghe ne gò mai viste!
W. Basso
COMMENTA (0 commenti presenti)
-
PERMALINK
mercoledì 30 aprile 2008 - ore 13:36
CONTINUA LA TRAGEDIA SANSONIANA!!!
(categoria: " Vita Quotidiana ")
Senpre dal libro "Monade bibliche" de mi overo W. Basso
Sansone viene grando e grosso, si inamora come un pito e conbina un muchio de prodesse tra le cui quela di sbregare un leone par metà!
Sansone cresse incalcà de caveji e de fame sessuale tanto che un giorno vede na ragassa Filistea e decide de convolare secolei in giuste nosse… El tosatoto core casa a dirghelo a so pare el quale par poco fa un scercarterie solo al pensiero de inpararentarse col nemico ma Sansone insiste parché davanti ai oci ga solo le tetone da chilo dela tosa e no capisse più na tega.
Cussì lu, so pare e so mare, parte par andare a cronpare sta tosa ma longo la strada in un momento chel gera da solo el incontra un leon pena scanpà dal circo Togni che ga l’insana idea de magnarghe le brasole.
Sansone no dise ne ai ne bai guanta el lion par le do rece e lo sbrega in do cofà na tenca… Subito drio el ga incontrà la tosa filistea e la ga tronbà de gusto seduta stante (s’intratenne con la donna di cui restò maggiormente invaghito)…
Fato ciò Sansone torna casa ma dopo un toco ghe torna la spissa roteca e quindi torna dala tosa par maridarla…
Come ze, come no ze, longo la strada el cata el cadàvaro del lion chel aveva sbregà par metà mèzo putrefato co drento la pansa un gnaro de brespe fodrà de miele chel se ga magnà de gusto (parlo del miele e no del gnaro de brespe che el sarìa pitosto indigesto).. Po’ el ze andà casa dela tosa e la ga maridà. La festa del sposalissio ga durà sete di …
Il mona di Sansone si perde via a fare indovineli e quiss… La fedele mollie lo tradisse di bruto e lu conpie le prime prodesse (se vede chel conosceva Prodi)
Apena i concitadini invitai ala festa ga visto sto omo scavejon grosso cofà un bò ghe ga catà fora na trentina de slandroni stesso stile par farghe conpagnia… E Sansone, che se aveva penà fato un canon, salta fora co sta scoperta del casso:
- Ve fasso un indovinelo stile Spassaparola: se riussì a intivare la risposta entro i sete dì dela festa in omagio ve regalo un cava e meti de vestiario conposto da trenta tòneghe e trenta camisoti da note… Se putacaso no intivè i trenta cava e meti me li dè voialtri…
- Va ben… - siga uno del malnati - ghe stemo…Vojo la busta due…
- Qua no ghe ze buste, - dise Sansone co sussiego meténdose a posto i caveji come fa de solito el mona de Sgarbi - qua se ga da intivare un indovinelo da me stesso medesimo inventà. El macaco de Maiche Buongiorno no ghe entra… Ecolo qua:
“Dal divorator è ussito il cibo,
e dal forte è ussita la dolcessa!”
- Giuda can - dise uno gratandose la zagolona fodrà de peoci - la roba no ze fàssile… Mi quasi quasi conpro do vocali…
- Ti no te conpri un membro virile ereto – siga Sansone - bisogna intivare da soli… Rangiarse!!!
Par tre dì, nonostante i studi aprofonditi, nessun dei trenta alochi ze bon de intivare la risposta anca parché onestamente fare un indovinelo de sto génare, riferendose a un fato privato che nessun conosse, ze na esimia vacada e intivare la risposta ze inpossibile.
El quarto dì el più svejo dei trenta mone che gaveva scomesso core frignare dala mojere de Sansone:
- Senti bea, parché no te serchi de cavarghe i selegati a to marìo, usando le armi in to possesso (cussì disendo al’omo ghe ze sbrissià na ociadina de sbianco alle procaci tetone e ale robuste culatte) in modo che te daga la solussion del quiss?… Se no, cara de Dio, noialtri demo fogo a ti e anca ala casa de to pare… E che forsanco ne gavìo ciamà qua par divertirse o par ciavarne???
(Adesca tuo marito, perché ti dia la spiegazione dell’enigma, se no daremo fuoco a te e alla casa di tuo padre: ci avete chiamati qua per spogliarci?)
Alora sta sema de fémena, tuto al giorno (e anca la note) stava in coste a Sansone parché la voleva avere la solussion e forsa de farghene el setimo dì Sansone, dopo aver fato tre violente caladine, ga panto fora tuto e la fémena ze corsa a dare la solussion ai trenta sderenà che subito ga ciamà Sansone e co fare inocente el portavoce ga dito cussì:
- Ecote la solussion sior Sansone:
“Che cossa cè più dolse del miele
e cossa ghe ze più forte del lione?”
Ostia!!!… Risposta esata!!!... Sansone se varda torno inferocito, vede la mojere diventare rosso paonasso e magna la foja.
Cussì el se intavana cofà na bestia disumana e dopo aìver dito la famosa frase:
“Se non aveste arato con la mia giovenca
non gavareste risolto il mio enigma!”
(Frase pregna de grandi conceti e metafore… La più evidente ze quela che paragona la mojere a na vaca de primo pelo)… Dal dito al fato Sansone se mete saltare de qua e de là, copa trenta òmeni a casacio li spoja nudi e nadi e el ghe consegna i abiti ai scometitori. Po’ ciapa a peadoni intel bero la sposa fedigrafa che siga a tonfone e lu possia torna casa da so pare.
Cussì se fa, orca bestia sassina!!!
LEGGI I COMMENTI (2)
-
PERMALINK
domenica 27 aprile 2008 - ore 12:15
GRA SUCESSO DELA SGANASSADA (el giornae che toe par el culo!)..
(categoria: " Vita Quotidiana ")
Oh là... Desso so contento: nel numaro passà dela Sganassada (la rivista che gò fondà ani fa co Dino Durante!) ghe gera un me articoleto sardelonico sul semafero de Loregiola, popoloso vilagio del’Alta Padovana, che incula el popolo a furor de multe.. beh, come zea come no zea, l’artricoleto ga mosso un bresparo: ghe ne ga parlà prima el Mattino di Padova, po’ Canale Itaia e infin Italia 1... E presumo che desso in paese ghe sia qualchedun che no me ama proprio... Me ne ciavo tanto che sul prossimo numaro senpre dea Sganassada ghe sarà un novo articolo che trata un tema scotante ancora de più (sempre su inculade dedicae al popolo!)... Credo che vegnarà fora un bresparo ancora più grando!!!! .. De più desso no posso ditre par no perdare l’efeto sorpresa a chi de dovere!!!!!
CULTURA RELIGIOSA IN OMAGIO
Trata fora dal libro MONADE BIBLICHE de W. Basso
Sansone: mona galatico.
Omo prediletto da Dio, dotà de potentissima scavejara, cativo e dispetoso miga poco che par ani ga roto le togne ai Filistei fasendo, tra na tronbada e st’altra, na straje drio st’altra…
*Morto miseramente in un cantiere edile par el cedimento struturale de na strutura.
* Libera interpretassione del Basso
La nassita miracolosa del signor Sansone
I fioli de Israele no se sa che casso i avesse conbinà tanto che el signor Dio se gaveva ancora na volta intavanà e li aveva riconsegnai ai Filistei che ne ne faseva de tuti i colori e pèzo de Bartoldo. In chel tenpo ghe jera un omo merican dela tribù de Dan Braun che se chiamava Manoeo (Or, vi era un uomo di Sara, della tribù di Dan, di nome Manoe); questo aveva na mojere gnente male ma sterpa essa la quale quindi indi parcui e perciò no podeva avere dei fili… Ma na bea note fin che Manoeo gera in ostaria, drio zugare carte, in càmara da leto dove giaceva la dona ze aparso un angelo maschile che dopo averse cavà le angeliche braghesse ga dito ala dona:
-Scometimo quelo che te voi che se te fè quelo che te digo mi, par filo e par segno, stanote te restarè insinta?
- Par opara delo Spirito Santo, sior? - domanda la sioreta che ze notevolmente curiosa e cretina quasi cofà la Leciso.
- No cara, qua el picione spirito santo no ghe entra… se trata de tut’altro oseo, notevolmente più fecondativo del noto picione spirituale… Comunque, mi sò un inviato de Dio e so qua proprio par tron… rendarti madre visto che quel fiapone de to mario no ghe la fa, quindi slarga, par desso, le rece da mussa e scolta ben le indicassion terapeutiche: durante la gravidansa no te ghè né da bere vin, graspa e luamaro di Sarono, ne da fumare e gnanca magnare porcarìe come la carne Simerdal o i soficini Sfindus… Questo parché te nassarà un fiolo che dovrà liberare Israele dai Filistei… Atenta però: sto tosatoto sarà un nazireo…
- E cossa vol dire?
- Vol dire chel sarà un scavejon e fan acanito dei Led Zeppelin grupo roc de slandroni che ga ancora da vegnere vanti… Guai a Dio tajarghe la scavejara senò el se intavanarà cofà na bestia umana e deventarà un fiapone cofà suo di lui pare… E desso dona de poca fede, sara pure le rece e verzi ben le ganbe, chel sole magna le ore!!!!
Dopo do ore l’angelo ze andà via pantesando come un treno e la fèmena (sema la so parte!) ze corsa contarghe tuto a so marìo Manoeo:
- Ciò, ze vegnù da mi prima un angelo de Dio, vecio cofà el cuco (quanto mai venerando) che me ga tro… ehmmm… me ga dito su na recia che conprarò un tosatoto che salvarà el popolo… E ga anca dito che no bisogna che magna bla bla bla (tuti i òmeni sposai sa cossa significa sto “bla bla”).
Manoeo, che gera sicuramente un poco mona, invesse de darghe na solene bastonà in testa ala fedigrafa, el se ga gratà la cervice che cumissiava a farghe spissa e ga tacà ringrassiare Dio e parfin ga assistìo ai successivi incontri co l’angelo che de volta in volta dava informassion su come conportarse in gravidansa.
Na volta parfin Manoeo voleva invitare l’angelo par ofrirghe na griliata mista ma l’angelo ga rifiutà e cussi a magnare la roba ai feri ze stà invità el signor Dio… E cussì dopo nove mesi ze nato el tosatoto al quale ze stà messo nome Sansone.
(coninua)
LEGGI I COMMENTI (2)
-
PERMALINK
giovedì 24 aprile 2008 - ore 14:52
RITORNO SU "STRISCIA LA NOTIZIA!"
(categoria: " Vita Quotidiana ")
Toh ciapa!!!!... Ieri sera gò gira, insieme co quatro slandroni e na mussa (me mojere) el 21 servissio par STRISCIA LA NOTIZIA".. Un ruolo nuovo sempre comunque nel’anbito del’inbecilità de un mona veneto.... Grassie al mitico Moreno che ga cussì tante idee che ghe fuma la testa!... QUANDO VA IN ONDA?.. Mah... una de ste sere!!!!
LEGGI I COMMENTI (3)
-
PERMALINK
martedì 22 aprile 2008 - ore 18:21
NO CAPISSO!!!!
(categoria: " Vita Quotidiana ")
L’altro di in television i ga dito che un siorato in treno ga fissà intele balote deo ici (e forsanco in altri punti) na procace siora che gera sentà di fronte a lu... E varda che te vardo el siorato la ga tegnua de ocio, sito, muto quindi sensa proferire verbo (e gnanca sogeto) mentre la sioreta se ga agità... Probabilmente da putina gera come chel bocia che tirava la bocassa frignando: "Mama el gato me varda!!!"... In poche ma sentite parole la siora se ga ofeso e ga denuncià l’omo guardone (?)... E cussì dopo raquanti ani el sior se ga cucà dala solerte giustissia italica 10 dì de preson, 40 euri de multa e un paro de s-ciafe sula copa!!!!... Intanto Mastela ze a pie libaro..... Mahhh... No capisso... Galera parchè te fissi na femena???? e alora come mai Ponsio Pilota che ga fato fissare Cristo in crose no se ga guantà gnente?????
LEGGI I COMMENTI (2)
-
PERMALINK
venerdì 18 aprile 2008 - ore 08:13
OROSCAPO DEL MESE in mostruoso ritardo
(categoria: " Vita Quotidiana ")
Oròscapo del mese de Aprile cura del Maestro de Vita (dura) Giosuè Papussa dito Don Sacramiento
Mese terificanti par i mone (che inpesta tuti i segni indistintamente).. Infati el primo del mese ze la cosideta “giornada del baucoto”. Le persone astute (come Walter Basso) manda de lilon o de baucon sti mone co scuse qualsivollia. I più stolti viaja par el mondo co dele renghe de carta picà sula schina. El popolo ride e si sconpissia. Quindi consilio atension. Ah, desmentegavo... El dotore ve dirà che vostra suocera ze in fin de vita. No stè crédarghe: el médego ze un otimista!
CONSILIO DE "BON TON"PAR ALSARE EL TONO (singolare de Toni)
Almanco na volta al’ano ze giusto invidare i suoceri a pranso. I generi educati evita de inpienare la casa de trapole par provocare cadute e roture de femori e clavicole. Anca l’avelenmento co topicidi, cianuro e arsenico ze sconsilià. El massimo concesso par ralegrare la giornata ze l’uso de massice dosi de Gutalax nel brodo de dado...
.jpg)
Esenpio de bestio mancante assolutamente de bon ton!!!!
LEGGI I COMMENTI (1)
-
PERMALINK
mercoledì 16 aprile 2008 - ore 07:42
EVIVA EVIVA!!!
(categoria: " Vita Quotidiana ")
Citassion coltissima de no ricordo chi:
"ZE CANBIA’ I CASSI MA I CULI RESTA SENPRE I NOSTRI!"
Altra:
" SERTI POLITICI ZE OMENI COLTI... SIì "COLTI" CO LE MAN INTEL SACO!!!!"
De Dino Durante
"DEMOCRASSIA: UN POCHI DE LADRONI VOTA’ DA NA SNANEGA’ DE MONE!"
DITATURA: FORMA DE GOVERNO DOVE TUTO QUELO CHE NO ZE PROIBIO ZE OBLIGTATORIO!"
LEGGI I COMMENTI (2)
-
PERMALINK
martedì 15 aprile 2008 - ore 09:56
ITALIANI!!! PRONTI PAR L’USO!!!
(categoria: " Vita Quotidiana ")
LEGGI I COMMENTI (3)
-
PERMALINK
> > > MESSAGGI PRECEDENTI
[ SONO OFFLINE ] 