Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27792 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
venerdì 14 dicembre 2007 - ore 07:48
LA SIENSA AL SERVISSIO DEL POPOLO!
(categoria: " Vita Quotidiana ")
Del come inchiavare i carbonieri elegantemente e sensa rimorsi
Secondo na corente de pensiero popolare i carbonieri dovarìa tuti èssare èbeti cofà el paltan, indrìo cofà la coa del musso, mone patochi... Le inumerevoli barzelete che cìrcola dovarìa èssare le prove. Gnente de più sbalià!
El carboniero stradale ze astuto, ma che digo, astutissimo... La volpe al so confronto ze na bestia sema. El cobra e el sarpente a sonalli co i so ocieti birbi pole andare a scóndarse... Bon, eco alora i me consili par sfugire ale multe o sansioni:
Métare na trapola da moreje drento in màchina:
Se i ve ferma e i scopre che gavì na luceta brusà conportase come segue
1) Sbarare i oci, e gratarse la testa
2) Afermare che in màchina gavì na fetente de moreja che de note, sta schifosa, ve ròsega i fili. Assicurare che el misfato ze sucesso la note precedente...
3) Tirare fora la trapola e mostrarla al milite (questo ze l’alibi) Stare però atenti che la trapola no scata traciandoghe i dei al carboniero senò i ze cassi vostri.
Mètare in màchina na fotografia del bocia più bruto che conossì: quelo che le rece verte, co la facia da mona e pena vegnù fora da oto dì de scagoto fulminante infetivo:
Se i ve ferma par ecesso de velocità conportarse come segue:
1) Mostrarse de pressa e estremamente preocupà
2) Dire che se ze drio córare dal mèdego par via del toseto, pora ànema santa, che ze gravissimo
3) Mostrare la fotografia e métarse piànsare a tonfon
Opure se no se ga la foto afermare quanto segue:
1) “Go sentìo dire par television ieri sera che la strada ze pericolosa e che un mucio de zente ghe lassa le tàtare: par questo, minchia sior tenente, (reminissensa canterina-sanremese del’autore) sercavo de sbrigarme par andare a sararme intel saloto”...
2) “Go pena roto i freni: corevo forte par sbrigarme rivare casa, par no fare incidenti”
3) “Go poca bensina. Volevo rivare casa prima de finirla del tuto”...
Notissia giornalistica
Un incendio distrugge la Biblioteca dei Carabinieri di Busiago Vecio. Fortunatamente salvati tutti e due i volumi presenti: l’Elenco Telefonico e le Pagine Gialle.
LEGGI I COMMENTI (1)
-
PERMALINK
martedì 11 dicembre 2007 - ore 13:19
RISSETA DE CASSO!
(categoria: " Vita Quotidiana ")
Come mai la risseta scrita soto ze vegnua del casso??? Fodrà de erori???? CHI SA CHI LO SA????
COMMENTA (0 commenti presenti)
-
PERMALINK
lunedì 10 dicembre 2007 - ore 20:17
LE RICETE DEL’INPS Vignetta cinese
(categoria: " Vita Quotidiana ")
a cura del cogo cinese Cikago Susupa
Overo come magnare puito spendendo el minimo
Conejo al foŀno ala vicentina
Cossa seŀve
1 gato ben passùo de siŀca 5 chili
1 pedofila
1/2 siola (anca maŀsa la poe andaŀe puito)
1/2 caŀota (anca seca la poe andaŀe puito)
1/2 goto de vin bianco al metanolo
1 filo de aqua potabile
1 forno cŀematoŀio
Esecussione
(gŀado de dificoltà: fàssile anca par i più mone!)
Se guanta un gatasso sui sinque chili stando ben atenti che no’l ve sgŀafa e se ghe tiŀa el colo (?)... Volendo se poe ŀancuraŀe anca un gato schissà dale màchine in stŀada davanti casa... Se lo pela e cuŀa (?) e se lo mete su na pedofila co un poca de siola, un ninin de caŀota e un filo de aqua potabile (evitemo l’ojo che costa massa e ze gŀasso fora dai modi)... Se guanta la pedofila e se coŀe in bicicleta al più vissin foŀno cŀematoŀio. Se speta che i infoŀna el moŀto de tuŀno e co faŀe indifaŀente se ghe fica (?) dŀento, in parte ala cassa, la tecia. Dopo diese minuti se distŀae l’opeŀaio adeto e se fa vèŀzare el foŀno co na scusa qualsiasi (paŀ esenpio paŀchè ve paŀeva de sentiŀe biastemaŀe el moŀto!) e se buta soŀa al gato un mèzo goto de vin bianco da pŀesso. Se speta co ansia altŀi diese minuti po’, senpŀe dopo aver distŀato l’opeŀaio, se recùpaŀa le tecia (staŀe atenti a no portaŀse casa in sbalio el moŀto) e se coŀe casa... Se paŀecia la tola e se se gusta la pietansa ciuciando paŀ ben i ossi e lecandose i dei fin sui gunbi... Col tocio vansà se poe condiŀe le tajadele el dì dŀio...
Psss..
Par la par conicio sule lengue la risseta ze scrita in veneto-cinese. Par tradure basta sostituire tute le "ŀ" co la "r"... Quele che pare sparolasse onte invesse le ze netissime e parben.
COMMENTA (0 commenti presenti)
-
PERMALINK
domenica 9 dicembre 2007 - ore 10:32
E DAGHEA COI ESTRACOMUNITARI!
(categoria: " Vita Quotidiana ")
Carità cristiana
Un siorato che passegia par Padova vede messo culobuson in mézo na gonbina un nero che bruca ingordamente l’erba:
- Ma cossa feto, sito mato? - siga el sior scandalizà -magnare l’erba in centro a Padova?... ma la ze na roba vergognosa mai vista!!!
- Gongordo, buana, gongordo… ma io avere fame.. danda fame… fame besdia sassina!!!
- Mi capisso tuto, - ribate el sior comosso - ma no se poe ridurse cussì!... Fasemo na roba: ti doman te vien magnare a casa mia… Te sarè me ospite!
- Grassie, buana… Ma io no podere: avere anghe molie go fame sbregà!!!
- E alora?... Te goi forse dito calcossa mi?... Porta pure anca la mojere… Ospiti tuti e do!!!
- Sììì.. buana… grassie, - dise el nero molo molo - ma io no solo avere molie ma anghe dre banbini ghe griano “bane… bane”…
- Ma insoma, - se intavana el sior - vuto capirla si o no???.. te gò dito che te poi vegnere magnare a casa mia co chi che te voi. Co tuta la to fameja e anca i parenti, se te ghe ne ghé… o i amissi!.. Tanto mi casa, in giardin, go l’erba alta sirca mézo metro!!!!
COMMENTA (0 commenti presenti)
-
PERMALINK
domenica 9 dicembre 2007 - ore 10:29
ECOME QUA!!!
(categoria: " Vita Quotidiana ")
Ostia, che rassa de setimana!!!... Pensavo de no rivare vivo a uncò: tra consegne del’Oco ai clernti, consegne dei calendari a st’altri clienti, del carnendario ai siori becari, spedission postali, me ga tocà laorare cofà un musso albanese... El beo ze che mi odio fosenatamente el laoro e quindi gò soferto cofà na bestia... Come se no bastasse tuto ciò gò fato anca un laoro segretissimo co un poche de amissi che ne ga permesso de tocare el fondo par via de figure de mer.... Na roba inaudita.... Va ben, tornemo in caregiata e par festejjare el me ritorno al’ossio puro ecove na barzeletina trata fora dal’Oco 2008...
COMMENTA (0 commenti presenti)
-
PERMALINK
domenica 2 dicembre 2007 - ore 16:37
MARTI RIVA l’OCO 2008
(categoria: " Vita Quotidiana ")
Marti in tute le edicole de Padova e Provincia ( in tute le librerie del Veneto) se cata l’OCO 2008 la me ultima fadiga... e, orco giuda, che gran fadiga... Però sò contento parché a mi el me piase particolrmente... Drento se cata anca na letara verta a Don Sante, oltre a na marea de altre vacade.... Benon, speremo ben... Intanto me fasso i conplòimenti da solo!!!
.jpg)
LEGGI I COMMENTI (3)
-
PERMALINK
mercoledì 28 novembre 2007 - ore 17:49
ANI FA GO SCRITO STA VACADA!!!!
(categoria: " Vita Quotidiana ")
A gò catà in mezo ae carte vecie.... la me pare un poco na cagada ma la ze pur senpre un me parto leterario quindi la meto qua!!!!
Omagio musicale a Berlusca che ze do mesi ch’el scassa i cojoni a Bus parché el voe a tuti i costi jutare i mericani co soldai, aparechi e barche par sbarare in coste ai Talebani. Tuta roba che Buss no voleva e che sti giorni ga dovuo acetare senò Silvieto se meteva criare come i putei... La canson se canta sul’aria de “Vengo anch’io! No tu no!” del signor Renso Janaci....
Mericani: Desso andemo tuti quanti
a legnare i Talebani...
Berlusca: “Vegno anca mi!”
Buss: “No tu no!”
Mericani: e co bonbe, bonbete e canoni,
ghe scassemo ai arabassi i cojoni...
E ghe ne demo fin che semo passui...
E vedemo se cussì i se chieta un fiatin!!!
Berlusca: “Vegno anca mi!”
Buss: “No tu no!
Berlusca: “Mi consenta, vegno anca mi!
Buss: “No tu no!
Berlusca: “Ma parché?”
Buss: “ Parché de no!!!
Tronbonasso: Poropopò, poròpopò... po pò... pò... pò.... ecc...
Mericani: Se podaria po’ anca
intossicarli co l’afta episootica...
Berlusca:“Vegno anca mi!”
Buss: “No tu no!”
Mericani: E cavarghe co na pinsa de fero
tuti i peli dele longhe barbasse!!!
Po’ ciaparli a peà intel bero matina e sera...
E vedemo se cussì i se chieta un fiatin!!!
Berlusca: “Vegno anca mi!”
Buss: “No tu no!
Berlusca: “Mi consenta, vegno anca mi!
Buss: “No tu no!
Berlusca: “Ma parché?”
Buss: “ Parché de no!!!
Tronbonasso: Poropopò, poròpopò... po pò... pò... pò.... ecc...
Italiani: Se podarìa andar tuti quanti
Coi soldai italiani davanti...
Berlusca: “Vegno anca mi!”
Buss: “No tu no!
Italiani: a ciapare a s-ciafe el mato de Bin Laden
E po’ darghene e darghene ancora!!!
E vedemo se cussì el se chieta un fiatin!!!
Berlusca: “Vegno anca mi!”
Buss: “No tu no!
Berlusca: “Mi consenta, vegno anca mi!
Buss: “No tu no!
Berlusca: ““Ma parché?”
Buss: “ Parché de no!!!
Tronbonasso: Poropopò, poròpopò... po pò... pò... pò.... ecc...
Berlusca: “Vegno anca mi!”
Buss: “No tu no!
Berlusca: “Mi consenta, vegno anca mi!
Buss: “No tu no!
Berlusca: ““Ma parché Giuda can?”
Buss: “ Parché de no!!!
COMMENTA (0 commenti presenti)
-
PERMALINK
sabato 24 novembre 2007 - ore 08:49
CONOSSEMO LA LENGUA VENET!
(categoria: " Vita Quotidiana ")
loamaro = quando uno è grasso, peloso, maniaco sessuale in quanto otturerebbe sessualmente anca il buco provocato da una "tonpinara" in giardino, parla male e bestemmia come una comitiva di turchi incazzati il buon veneto della profonda campagna ha nel suo ridotto vocabolario un solo termine atto a definire il soggetto: appunto "loamaro" al limite rafforzato dagli aggettivi "porco", "schifoso" o "bueo ranso".
Eco un esenpio eclatante d loamaro (in senso lato) e anca el resto!
LEGGI I COMMENTI (1)
-
PERMALINK
venerdì 23 novembre 2007 - ore 19:08
I SAVOIA VOE SCHEI???
(categoria: " Vita Quotidiana ")
Mancava solo che i quatro inbessili dei Savoia se metesse a domandare schei!... E parcossa po’?... Pai i cosideti dani morali!!! Sarìa come se i eredi de Paciani dimandasse i dani morali alo Stato Talian parché el so avo ze stà sputanà!... E lora vojo anca mi i dani morali dal sig. Papa par via chel paroco co gero in età puberale me diseva se ne me fasevo le pipe fasevo piansare Gesù!!! E cussì me sò senpre fato le pipe malvolentieri e co un senso de colpa! Orco zio can!!!!... FORA DAE A DA ANDARE STI ONTI... ALTRI CHGE PRINCIPI... JENE I ZE!!!!
LEGGI I COMMENTI (3)
-
PERMALINK
martedì 20 novembre 2007 - ore 18:40
RIDEMO VA!
(categoria: " Vita Quotidiana ")
Astussia
Un genovese va da na batona e contrata el presso:
- Senti cara, quanto vuto par fare l’amore co mi?
- 250 euri, carissimo sioreto!!!
- Senti bea, fasemo un afare: te dago 400 euri ma lo fasemo par tuta la note.. Però te averto de do me picole manie; prima: me piase farlo al scuro totale. Secondo: tra l’una e l’altra mi vago sul pianerotolo a fumarme na cica!
La donacia, vedendo che l’omo ga sirca sessant’ani e quindi co bone probabilità resistensa minima, decide de starghe convinta de fare un afaron.
I do va in càmara, i stua la luce e l’omo taca andare zo de spassolon andando a fumare na cica tra l’una e l’altra... Una, do, tre, quatro, sinque e ancora. A un serto punto la lavoratrice sessuale se stufa e inpissa la luce... e, orore, la se cata in brasso un giovinoto sconossiuto!
- Ma, e lu chi saresselo???... E chi te ga mandà qua? - la siga.
- Piacere signora, - dise el toso - mi sò Bepi e me ga mandà un siorato che qua fora vende bilieti!!!
Far Uest
Un s-ciapo de turiti veneti ze in gita de piassere in Far Uest e i ze drio girare tuti contenti tra le montagne parlando tra de lori de cau boi, indiani, assalti a diligense e altre vacade del gènare. A un serto punto destirà par tera in mèzo na strada polvarosa che ze un indian, co la so bela pena de pito, co na recia incolà sula pólvare e el brasso destro slongà come par sagiare el teren. L’indian, che ga anca na notevole facia da mona, scolta co estrema atenssion calcossa che nissun vede. El s-ciapo de turisti se avisina timorosi e se sente l’indian che batendo pian la man par tera sussura:
- Na diligenza, augh, na diligensa! -
Uno dei turista, Nane Fortaja par l’esatessa, sgorla la testa tuto amirà.
- Na diligensa... Tirà da quatro cavali al galopo, augh, - disse ancora l’indian co la recia incolà al teren.
Tuti tase e scolta co atension.
- Che recia tosi - comenta uno, - parfin...
- Shhhh, par dio! - fa n’altro - sito che senò el se sconcentra e no’l sente più gnente!!!
- Na diligenza, quatro cavali, augh, do mori e do bianchi… Ansi no, uno ze a macie!
- Ostregheta, - dise Toni - ma questo ze un mago; ma come!?!
- SHHHH, ve gò dito!!! - siga ancora quelo de prima - i indiani ga dele doti che nialtri gnanca imaginemo! Scoltémolo e inparemo dala so cultura!
Intanto l’indian, senpre imobile, recia incolà al teren, brasso disteso, man che bate ritmicamente in tera, ze ancora più concentrà:
- Na diligensa ripeto, augh, quatro cavali; do mori, augh, uno bianco e uno stramacià e a casseta do omeni... -
- Giuda can, - salta fora ancora Nane che ze un agnostico porco... - no posso crédare ai me oci!!!
- Augh, i do omeni a casseta ze uno magro e uno grasso! - spiega ancora l’indian...
Sù quela salta fora la Nena Burata che ze curiosa e petegola:
- El me scusa sior indian ma el me diga: quanto distante zela sta diligensa e quando ze che la passa de qua?
- Augh, la sarà distante do chilometri, augh, in quanto a passare de qua, augh, sarà fadiga par adesso: la me ze passà sora la man sirca oto minuti fa!!! Augh!!
Professionalità
Un bandon biondo che no finisse più ze drio farse visitare dal’ortopedico.
- Ghe fa male, signorina, se mi ghe toco qua?
- No dotore... Par gnente!
- Uhmmm uhmmm e se struco qua, ghe fa male?
- No no... Proprio par gnente!
- Ah beh, vedemo e se strenzo cussì???... Ghe fa dolori?
- No dotore... Forse parché mi sò vegnua a visitarme un piè e no le tete!!!
COMMENTA (0 commenti presenti)
-
PERMALINK
> > > MESSAGGI PRECEDENTI
[ SONO OFFLINE ] 