Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27791 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
martedì 5 agosto 2008 - ore 13:23
CHE CALDO ORCO ZIO!!!
(categoria: " Vita Quotidiana ")
Massima del jorno:
"CO STO CALDO NO SUA MIGA SOLO I FURBI!.,.. SUA ANCA I COJONI!!!"
LEGGI I COMMENTI (6)
-
PERMALINK
domenica 3 agosto 2008 - ore 19:10
EL RONPIBALOTE DEL MESE: EL PAROCO
(categoria: " Vita Quotidiana ")
FILOSOFIA
Se ti te parli co Dio,opure co so mama o so fiolo vol dire che te si drio pregare.... ma se ze dio, so mama o so fiolo che parla co ti., beh alora te sì da manicomio de Brusegana!!!
.jpg)
Legenda
1) Ochio severo e tento
2) Manasse par s-ciafesare i toseti che se ramena le brochete!
3) Instrumento de lavoro
4) Fanghe n° 47
5) Caca de cagneto
6) Parole brute
7) Scrita de un comunista anticlericale porco (forse Bertinoti!)
8) Divinità momentaneamente assente
9) Foto someja del Grande Capo
LEGGI I COMMENTI (6)
-
PERMALINK
sabato 2 agosto 2008 - ore 09:50
SAGESSA AGRICOLA MIGA POCO!
(categoria: " Vita Quotidiana ")
Eco qua na umile canta popolana de rara e sublime inteligensa:
PAR NA LEGE FISICA BEN CONOSSUA
A STO MONDO TUTO SE FRUA.
SOEO A BERNARDA, COSA MIRANDA,
PIU’ CHE TE LA USI PIU’ LA VIEN GRANDA!
Eco un furioso dibatito nato inte un cesso del ITIS Marconi a Pd
IN COTAL LOCO DI COMUN ASILO
FECI UNO STRONSO CHE PESAVA UN CHILO!
Dante Alighieri
E IO PER NON SMENTIR LE RIME TUE
NE FECI UNO CHE NE PESAVA DUE!
Petrarca
IN VERITA’ IN VERITA’ VI DICO
CHE PER FAR STRONSI DI COTAL PESO
CI VUOLE UN CULO DAVVERO MOLTO OFFESO!
Dio
E infin na grande realtà
MONA E BARETA
NO ZE MAI MASSA STRETA!!!!
LEGGI I COMMENTI (4)
-
PERMALINK
martedì 29 luglio 2008 - ore 18:15
ECO LE PREVISION PAR AGOSTO
(categoria: " Pensieri ")
AGOSTO
Oròscapo inteletuale a cura del latinista Lucius De Folpis latinista ignorante cofà na tonpinara
Mese pien de sodisfassion: el càncaro del vostro confinante, che ve ga ciavà un metro sul confin, vegnarà catà in possesso de otantamie cane de mariagiovana. Nonostante el tentativo de dimostrare che el ze “modico quantitativo par uso personale”, meténdosene diese in boca, do su par le snarise, do nei busi dele rece e un sentenaro (?) su par el dadrio el vegnarà arestà in base al’articolo che dise: “Non c’è fumo sensa aresto!” (no est fumus sine arostus). La suocera afeta da ostiasborosi cadrà in tera e se spacarà in mie tochi tra grandi e picoli. Cussì i la ingessarà tuta, anca le rece e le balote dei oci. L’unica roba no ingessà sarà la lengua umana ma la fortuna ze dala vostra parte: na brespa ghe la becarà co estrema cativeria. “Dulcis in findus”: par festejare staparì na botilia de sanpagna… el stròpolo finirà inte un ocio ala mojere sderenàndoghe la balota… Ve lo gò dito che ze el vostro mese fortunà!!!
Prevision del tenpo a cura de Toni Lanpo (dito “Lanpi e Toni”) del Centro Studi de Piovene a Rachete: (vignetta stesso nome)
Aria calda co conseguente sòfego can proveniente da Caldogno se scontrarà co na “troppo fredda” (overo “massa freda”) proveniente da Frescada darente Pregansiol…Ga rason el caldo che vien da destra. Tenperature medie sóto ala signora Norma. Sora ala Norma qualche volta ghe sarà so marìo Toni.
FILOSOFIA ALO STATO PURO a cura de Massimin Caciane filosofo duro e sindaco de Massacavalo VE
Le ciacolade che se sente dai paruchieri ze la dimostrassion che serte fémene in testa no ga gnente altro che i caveji!
Na volta se diseva: “Gò fato na corsa par ciapare el treno”… Desso se uno fa na corsa el treno lo lassa indrìo!
LE PAROLE DESMENTEGA’
A cura del todesco-veneto Otto Alzaimer
A me dispiacere molto ma, ostreghetten, cueste o coteste parolen proprio non mi venire inamenten, ja… Scusatten, ma che kacchien sono dietro a fare in cotesto kalendarien?
Interviene in aiuto Piereto Moeca
incrocaìo agg., p.p., s.m. rimbecillito; Otto ze incrocajo patoco! Il signor Otto è rimbecillito globale (e mona).
RIDI RIDI che la mama ga fato i gnochi
Certesse
El paron de casa aprofita dela partenza dela mojere par le ferie par farghene ajo co la nova cameriera.
- Lo seto, cara de Dio, - el ghe sussurra sodisfato ala fine - che ti te sì tanto, ma tanto, mèjo de me mojere, sta càncara maledeta?
- ‘A lo sò sior, - risponde la tosa - lo ga dito anca el fornaio, el latarolo, el postin e chel siorato biondo che stà al piano de sora!!!!!
Un bon motivo par stare alegri
El quìndese se festeja el cosideto Fieragosto... No se laora e se va tuti in giro de baucon, serenamente incolonai in coe mostruose provocae da cosidete “partense inteligenti”.
.jpg)
Piereto Moeca pensionato stramona!
COMMENTA (0 commenti presenti)
-
PERMALINK
domenica 27 luglio 2008 - ore 18:48
CO SE DISE MONA!!!!
(categoria: " Vita Quotidiana ")
Na copieta de sposeti piosto sul inbranà va dal ginecologo par via che dopo un ano de matrimonio no i riesse a avere fioli. Alora el siensiatto fritologico ghe dimanda:
- Miei esimi, nonché mone, passienti, contattemi cossa fate la matina..
- Se alsemo, femo colassion, se dasemo un baseto e mi vago lavorare - dise el sposeto.
- E a mezodì? - insiste el tennico dela fritela
- Magnemo, se demo un baseto po’ andemo a riposarse... - dise el sposeto
- E ala sera, cari de Dio, cossa fasette?
- A vardemo la television e se demo qualche baseto sior médego - risponde timido el sposeto...
- Va ben... go capìo... - ribate el médego - ma dopo?!?
- Dopo andemo in leto, se demo ancora un baseto e po’ dormimo...
- Signora, par Dio - perde la passiensa el monologo (ginecologo de Padova) - la se despoja nuda, la se buta sul letin e slarga le ganbe... - Dito fato el medego se sbotona el patelon trà fora l’atresso e tronba la sposeta. Po’ el varda el sposeto e siga:
- Gavìo capìo , par Dio, come che se fa par avere toseti? - Al che l’omo tuto contento dise:
- Serto sior medego, desso ze tuto ciaro...- e tuti contenti i do paga e ciapa la porta. Passa tre secondi e se sente bàtare. Se verze la porta e el sposeto timido mete drento la testa:
- El me scusa sior, me so’ desmentegà de dimandarghe na roba: vegnelo lu casa nostra a tronbare o go da portare me mojere in anbulatorio???
LEGGI I COMMENTI (1)
-
PERMALINK
venerdì 25 luglio 2008 - ore 17:22
BARZELETA PAR DON SANTE!!!
(categoria: " Vita Quotidiana ")
Scherso… da prete???
El professor Gustavo Lamona ze ginecologo de chiara fama tanto che tra le so inconbense el ga el controlo semestrale dele fritele dele esimie suore del convento de Santa Bernarda Martire & Scassata.
Na bea sera dopo el controlo del suorame el noto professore riva casa co l’espression gioconda e ridanciana.
- Te vedo particolarmente alegro, stasera, - comenta acida la legitima consorte - par caso ze vegnù visitarse Sabrina Ferili o Nina Moric?
- Gnente de tuto ciò, cara, - risponde el luminario fritologico - oncò gò visità le suore e sicome gavevo voja de farme quatro sganassade co poca spesa ghe gò fato a tute, conpresa suor Romilda dita Tetano de setanta do ani, el test de gravidansa… E ghe gò dito a tute che le ze piene cofà ovi!!!... ahhhh… ahhhh… ahhhh…
- M SITO GNANCA MATO? - siga la mojere scandalisà - Te pare schersi da fare a dele inocenti suore che sono vergini, ansi verginissime??? No te te vergogni???
- Mi no che no me vergogno, - risponde el médego – ansi godo cofà un mas-cio… ahhh… ahhhhh… agrghhhhhhh…
- Dio gò sposà un ascaro, un blasfemio… desso ti te ciami subito el convento, te te fè passare la superiora, te spieghi el scherso infame e te dimandi scusa… Ciaro???
- Ma mi….
- MA TI GNENTE!!!... DESSO TE CIAMI SENO’ MI…. Bla…Bla…Bla…
El porocan dopo mesa ora de insulti e bla bla se decide e molo molo e de gobon ciama el convento e se fa passare la superiora:
- Dimando scusa cara sposa de Dio e nora dela Madona, ma gò una confession grave da farle… Ogi in uno dei rari momenti di mona che mi afligono gò dito al branco di sorele visitate che esse le quali sonno tute insinte…. Beh, era solo un scherso ridanciano.. no è gnente vero… quindi mi scuso e chiedo venia…
- Scuse acetà, anca se romai sono massa tardi: le sorele sono tute in ciesa dietro pregare Dio e dimandare scusa per averlo fato béco ma quelo che è più grave è che Don Nane, el confessore se ga inpicà!
LEGGI I COMMENTI (1)
-
PERMALINK
giovedì 24 luglio 2008 - ore 18:53
DESSO ME LA GODO!!!
(categoria: " Vita Quotidiana ")
Sò contento, ostia!!!... gò catà na casa de produssion cinematografica che me sponsorisa totalmente un dvd co un me sogeto!!!!... El ussirà prima de Nadae e el sarà na roba particolarissima... De più par el momento no posso dire...
Desso bisogna che rancura su atori, lochession, costumi, operatori e tuto queo che ghe va drio!!! La sarà na bea nova esperiensa.... POSSO DIRE CHE SO CONTENTO?????
LEGGI I COMMENTI (7)
-
PERMALINK
martedì 22 luglio 2008 - ore 19:36
CDEDICA’ AI BECHI!!! (na trascurabile magioransa!)
(categoria: " Vita Quotidiana ")
L’amante ze pena stà becà dal marìo dela fémena e tuto agità ze drio vestirse. El se mete le mudande, po i calseti, le braghe , la camisa e serca desperatamente de inpirarse le scarpe... Visto che no el ghe la fà co un soriso timido el dimanda al marìo che lo varda inferocito:
- El me scusa sior, no’l gavarìa miga un corno da prestrme par caso?
Inte na camara ghe ze na copia drio stramassarse de bruto. I do pantesa, re rodola par el leto, se sbragagna e pinciona de bruto. Sul più belo se spalanca la porta e drento se precipita el marìo che taca sigare: - Bruti schifosi de porcassi infami... ve go becà finalmente... casa mia fare ste robe... - L’amante se coverze le ciape e tuto tranquilo dise: - El staga calmo sior, cossa ze tuto sto sigare? Volo forse svejare nostri fioli che dorme de là?
I do amanti fedigrafi ( chissà cossa che vorà dire sta parolassa?) ze drio pincionarse de bruto quando sona el telefonin de lu
Lu risponde parlando pianeto po’ dise ala fémena: - Tuto ben cara: ghemo tuta la note par nialtri... La gera me mojere. La me ga dito che la dorme da ti parché no te ste ben e no la vole lassarte sola...
LEGGI I COMMENTI (1)
-
PERMALINK
lunedì 21 luglio 2008 - ore 15:17
ULTIME SU DON SANTE!!!
(categoria: " Vita Quotidiana ")
Ahhh ahhhh ahhhh... che mona sto ex Don Sante!!!! Dopo essere stà spretà e mandà a ramego suo dal sior Matiasso sto magnafranse a tradimento no ze miga andà dal ronpicojoni de Cardinal Milingo, el preton nero testa di moro, a fare el zagheto???... E desso i do putanieri tra na tronbada e st’altra canta messa e fa miracoli (?)... Tipo quelo de far restare incinte spose che col maritale ucelo no riesse proprio scodelare putei!.... MA CHE I VADA A FARSELO METARE STIO DO ONTI!!!
Ma ecove na poesiola che go scrito tenpo fa proprio dedicà al porseon de Don Sante:
El curato de Montegrosso
no ga de serto el cicio flosso,
ma bensì lo ga forte e duro
da sfondare parfin un muro…
Par questo lo meteva a dimora
drento a tana de na gran mora.
Ma fraca oncò e fraca doman
cossa sucede, orco de un can?
chel preton de sto paeseto
se cata pare de un bel toseto!
E se el curato de Montegrosso
no ga de serto el cicio flosso
el sior vescovo Matiasso
ga tacà fare un gran fracasso
sigando ovunque a pien buso:
- Sto prete slandron del cicio no conosse l’uso:
“La castità ze na gran virtù
che i preti se tramanda da pare in fiolo”…
Sante parole de Gesù!”
LEGGI I COMMENTI (3)
-
PERMALINK
giovedì 17 luglio 2008 - ore 09:04
NA NASSION DE ARTISTI
(categoria: " Riflessioni ")
Ogni tanto, quando l’inteligensa me inpiena la testa e ris-cia de fàrmela s-ciopare, vago da me fiola e parlo de arte (intesa come arte artistica e no come strasse picae a sugare!)... in sto modo me desgorgo i neuroni e ritorno nel me stato naturale, overo un fiatenin sul mona. Proprio oncò me fiola, pena che semo entrà in tema artisti de chiara fama, me ga dito che ghe ze na potente diatriba tra i critici del mondo, soratuto stranieri, parché questi prima de definire uno "artista" i ghe pensa sora dì e note par ani e ani. Difati, cussì la me ga dito, qualchedun de sti siori ze ancora incerto se Picasso poe fregiarse del titolo apunto de "artista". E nel dubio atroce sti studiosi se rovina sòno e digestion par via che de note se ramena cofà bisse e de giorno i magna de sofegon e de spessegon... Ma no basta: pare anca che i stessi dubi turba i soni de sti sior anca riguardo el fotografo Warhol che ga fato le famose foto de Marilin Monroe.
Però tuti ze concordi nel’afermare che un mucio de altre persone che tuti conossemo ze sicuramente persone degne de petarse in coste sto titolo onorifico.
E difati, i conclude sensa temansa alcuna, se poe definire artisti zente come: i Bitles, Garcia Lorca Boja, Rei Ciarl, Dalì, Sofi(g)a Loren, Sarlò (overo Ciarli Ceplin) e tanti altri sielti co cura.
Benon mi rifletendo me sò inacorto che sti dubi no esiste assolutamente in Italia dove, grassie ala television e ai so critici (del menbro maschile, n.d.a.), de artisti ghe ne gavemo na scaretà. Ecove un picolissimo elenco fato dàndoghe reta a ste esimie testone (da peri coti n.d.a.).
Poe fregiarse del titolo onorifico de "Artista", tra i altri tuti sti personagi:
Tra i cantoucisori: Mino Reitano, Pupo, Piero Fugassa (un ex cantante co le man in pasta), Mario Tessuto (uno che ga stofa!), Gato Pansiera, Giani Petinati, Giani Dego, Arietta Berti, di gei Francesco, i Cugini de Canpagna ecc. ecc
Tra queli che ze in television e che no sa fare gnente: Valeria Marini, Taricone, Costantino, Platinet (el spantasson), Solange, Malgiolio, la Leciso,. La Gregoraci ecc. ecc.
Tra i giornalisti: Aldo Biscardi dito Polentina (el serial chiler dei congiuntivi), Maurissio Mosca, Luca Ingiuriato ecc. ecc.
Tra i cosideti atori: Alberto Tonba, el Can Recs, ecc., Alvaro Vitali, Rassa de Can, ancora Valeria Marini (da quando la ga studià le lengue la ze bona de stare sita in sinque lengue diverse), ecc. ecc.
Tra i scritori: Francesco Toti, ancora Iva Zanichi co un libro sula polenta e osei (poca polenta e tanti osei, ecc. ecc.
Tra i stilisti: Dolce & Gabana (noto duo de recion-ghei), Cavali, Giugiaro (quelo che firma i pacheti de MS) ecc. ecc.
Concludendo: no lo sò se gò razon ma dal me punto de vista semo la nassion che ga più artisti in assoluto su tuti i canpi.... no voria che queli che atribuisse sto titolon de assoluto rispeto co tanta fassilità no gabia tanto le idee ciare: temo che no i gabia gnancora capìo la difarensa che ghe ze tra un pelandron acuto e un artista... Ze bastansa vero che tuti i artisti ze tendensialmente dei pelandroni e lavativi ma no ze par gnente vero che tuti i pelandroni ze artisti!!!
Rex: Can che recita come un atore
Tonba: atore che recita come un can
LEGGI I COMMENTI (1)
-
PERMALINK
> > > MESSAGGI PRECEDENTI
[ SONO OFFLINE ] 