Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27792 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
lunedì 11 giugno 2007 - ore 19:18
S-CIAFE SUL MUSO ALTRO CHE "ORGOGLIO PEDOFILO"
(categoria: " Riflessioni ")
Robe da no credare.... andè su sto sito http://petizione.epolis.sm/indexResp.asp e votè contro sta smanegà de deficenti, onti, luamari e fioli de mignota che vorìa fare na festa dedicà al fato de liberalisare la pedofilia... In inferno i ga da andare sti petoloti de musso tisico coi diavoli che ghe mete a dimora un palo pien de sgresende de bojo in modo che i se carbonisa moroidi e dintorni... Ghe dago mi l’orgoglio pedofilo!!!
LEGGI I COMMENTI (6)
-
PERMALINK
lunedì 11 giugno 2007 - ore 13:58
ORCA BOJA SASSINA, FINIE LE FERIE!!!!
(categoria: " Vita Quotidiana ")
E desso???? tornà casa domenega de sera gò catà na gran sorpresa (del casso!): l’operatore de Strissia che risponde (poco parché el ze anca onbroso miga poco!) al nome de Stefano no ga miga sgnacà su youtube un video de un fora onda co Moreno Morello de mi che sò costreto a bere aqua?.. titolo eclatante "Walter vin"... Cussì dopo "Walter doccia" me cato sputanà ala grande!!!!... Te vedarè cossa che conbino mi!!!!... Comunque a Rodi go sentio parlare a destra e a manca del famnoso COLOSSO DE RODI... mi a un serto punto me sò roto i cojoni e gò tacà parlare del’Italia co relativo COLOSSO DE PRODI.. beh, più de uno me ga mndà a farmelo métare!!!!.. Ignoranti, bifolchie e salvadeghi!!!!... Comunque tenpo beo, mare neto e magnare cofà dei porsei da grassa... e in più sò deventà nero cofà un stronso!!!!... Cossa vuto de più dala vita???
Invesse go conossuo na bea copieta: Diego e Lisa... gavemo passà insieme tante piacevoli ore... Li saludo co sinpatia!
El Colosso de Rodi a ganbe larghe (forse par andare ben a pissarghe dosso al popolo!)
El Colosso de Prodi (drio abufarse prima de metarghelo in culo al popolo!)
COMMENTA (0 commenti presenti)
-
PERMALINK
sabato 2 giugno 2007 - ore 14:55
E DESSO MANDO IN MONA EL MONDO INTIERO!
(categoria: " Vita Quotidiana ")
Toh ciapa!!!.. da stasera entro solenemente in ferie... Mi e me mojere ciapemo un rioplano e svolemo a Rodi indove se grataremo le balote (me mojere in senso lato!) destirai su na spiaja... Ciò che me sodisfa de più de tuto ze savere che tre quarti del popolo nel fratenpo laora e sua cofà mussi albanesi!... Da là, inoltre spedirò potentissime cartoline ai invidiosi co scrito "Qua se dorme, se tronba e no se fa un casso.. e ze anca fresco!"... in modo che i sofra quanto un malà ricoverà in ospedale che ciapa na cartolina da un amigo co su scrito: "Mi stago benon!"... Se sentimo tra diese dì....
.jpg)
Rivemooooo!!!
LEGGI I COMMENTI (6)
-
PERMALINK
venerdì 1 giugno 2007 - ore 09:40
QUIESTO LO GO’ SCRITO QUATRO MESI FA.... ZE CANBIA’ CALCOSSA?
(categoria: " Vita Quotidiana ")
Si se ga zontà novi straje.. violense (o presunte) sui boce... e via de longo...
L’ARTICOLETO AL CREN
L’ERBA DE COGNE ZE MEJO DE QUELA DE UNABONBER!
Tanto par canbiare parlemo de television, programi e odiens. Come tuti poe védare desso va de moda, oltre ale grandissime vacade che ze i realiti siò, ze le trasmission triler, overo quele che trata fati de cronaca particolarmente misteriosi e cruenti . El canpion assoluto de sti programi-becarìa ze stà, fin poco tenpo fa el famigerato Bruno Brespa che ga roto le togne a tuta l’Italia prima col caso de Novi Ligure e po’ col caso Cogne, rivando parfin a zugare coi so ilustri ospiti con un modelin de caseta tipo quela dele barbi… Purtopo par lu da un poco de tenpo se ga messo a farghe concorensa anca Chico Mentina quelo de Matrix… Cussì desso tra i do la ze guera verta par catare fora sempre novi casi… In Italia, purtropo, zente mona che va fora de testa ghe ne ze a nastro e cussì ogni tanto na nova assurda straje fornisse materiale ai noti giornalisti. El problema ze che i anca i serial chiler pensa al’odiens e de conseguenza i fa le straje a singhiosso overo i se organisa in modo che tra l’una e l’altra (straje) passa el tenpo giusto, in modo da aver ognun la so pubricità… El macaco de Unabonber ga fato scola! La coretessa, anca nei riguardi del pubrico afessionà, invesse vorìa che sucedesse do straje in contemporanea in modo che ognun dei do giornalisti podarìa cucarse la sua e tuti sarìa contenti… Eco parcossa che pena Brespa se ga inpossessà del’alucinante straje de Erba, Mentina, no savendo indove batare la testa, ghe ga tocà ripiegare sul delito de Via Poma, sucesso sirca venti ani fa… Ma Brespa che ze più furbo ze za drio organissarse e, nel caso che finìo l’efeto Erba no suceda gnente de novo, ze drio studiare a fondo l’omicidio de Giulio Cesare. Pare che co l’aiuto del’avocato Taormina el gabia scoperto che no ze stà Bruto a coparlo ma sia stà un vissin de casa infastidìo dal fato che Cesare ripassava casa a alta vose i discorsi da farse al Senato e lu aveva un noioso mal de testa….. Se parla quindi de fare el test de dieneà sia a Cesare che ai setantò vissini de casa. Se ze anca ala ricerca del’arma del delito che podarìa èssare el stesso tajacarte usà nel caso del’omicidio de Caino e Abele e sucessivamente nel caso de Via Poma… E Mentina?... Vossi de coridoio dise che, par alsare l’odiens del so programma, ga meza idea de assoldare un chiler par far fora Brespa, Taormina, Crepet, e el resto de ospiti che ogni sera inpesta el programa Porta a Porta… Se la roba no va in porto, pare chel sia drio studiare atentamente la più gran straje mai avegnua al mondo: el Diluvio Universale… In studio vegnarà montà un mapamondo de venti metri de rajo conpletamente alagà, tra i ospiti ghe sarà un parente ala longa de Noè e Silvio Berlusconi che rapresentarà l’inputato overo el,Sig. Dio… A sto punto mi no sò più cossa dire… Spero solo che quanto prima nele teste de chi de dovere magari anca un solo neurone vegna colpio dal virus del bonsenso in modo che in television ne vegna sparagnà indegni programi indove la morte, la soferensa, el dolore se veste da intratenimento par sodisfare curiosità morbose de chi, stravacà col telecomando in man, gode vardando chi furega inpietoso tra sangue e cortei, come fa i avoltoi co la carne morta. In nome de na informassion che, credime a mi, de informassion no ga più gnente.
COMMENTA (0 commenti presenti)
-
PERMALINK
giovedì 31 maggio 2007 - ore 14:13
SUCESSONE DEL SERVISSIO SUL "SEDUX" el parfuno par tronbare!
(categoria: " Lavoro ")
Gran sucesso de pubrico e critica (?) par via del servissio andà in onda ieri sera su Striscia la Notizia indove grassie al solito, mitico, signor Moreno dito el forbito (e dotà de na testa che no ga uguali!) gavemo efetuà un sperimento sientifico de alto livelo sui efeti del SEDUX parfuno (del casso!) che dovarìa atirare le done feminili verso el mas-cio intriso del sora cità parfumo cofà le cacone atira le mosche.... Moreno, sforsandose le meningi che par poco ghe s-ciopa la nobile zagola) ga inventà un microfilme indove el sotocristo prima se sotopone a na assion estrema de lavagio, ingrassagio, tajo de bafi, barba, mostaci e onge dei arti sia superiori (le manasse) che inferiori ( i fetoni), doce e lavajo dentiera, rinuncia al fumo e al’onbra de vin, po’ armà de potente masso de rose (tute indicassion fornie dal produtore del afrodisiaco parfumo), e vestio da messa cantà sul stile del senpio de Gion Stavolta, co do giosse de Sedux sul bavaro dela jacheta, vien menà inte la nota discoteca ODISSEA indove prova ingansare più femene possibili co l’unico scopo de stramassarle violentemente... In te la discoteca jera presente el pregiato esenplare Elisabeta Canalis, cussì dopo aver ciapa na ventena de rifiuti sdegnai da tute le done contatae me so rivolto onde risolvare la serata e concupire la nota subret che me ga ignorà de bruto!... Finale indegno quindi co la dimostrassion lanpante che el SEDUX più che un parfumo erotico ze na cagada estrema fata fora dal bocae....
RINGRASSIAMENTI E PRCISASSION!!!
Come senpre bisogna che fassa i oportuni ringrassiamenti: Moreno par darme ste stupende oportunità de divertirme.. Laura par la pressiosa colaborassion e consulensa e naturalmente i do operatori Stefano e Manfre che viaja senpre in copia cofà Grejo e Jacheti, Olio e Stanlio, Ficara e Picone...Dolce e Gabana no li cito parché recion ghei mentre i do ecelsi operatori ze estremi estimatori dela fritela feminile in genere (oltre che de saladi, brasole, pastassute e onbre!).. Pecà che i ghe ne conbina de tuti i colori parché no sucede na volta che no i perde qualche toco de qua e de là par el mondo...
RINBROTI E PICOLI INSULTI
I do fioi de bona dona de Stefano e Manfre che cola viliaca colaborassion de Moreno, durante la docia me ga fato un gaveton de aqua giassà fasendome dire robe brute contro la morale cristiana e metendo adiritura su youtube el video ala vosse "Walter e la doccia" rovinando cussì par senpre l’imagine fatcosamente costruia de umorista fine e rafinato...
MINACE
Visto che i tre malnati ga deciso de esporme ala gogna mediatica, prometo solenemente de dare in pasto a tuti i sprissini vita, miracoli e aìtività del noto inviato Moreno Morello... par i operatori gò in mente na roba che li farà andare a fare i operatori a Teleronpo... Podarìa ripensarghe solo in caso de cospicua tangente (disemo 10.000 € cadauno).
PAR INFORMASSION
Sul sito de Striscia la notizia nela om peig de oncò ghe semo in fotografia mi e Moreno .. ala facia de chi ghe stago sui ovi!!!
Visto che nissun me aplaude me aplaudo da solo!)
LEGGI I COMMENTI (5)
-
PERMALINK
mercoledì 30 maggio 2007 - ore 19:35
STASERA IN ONDA CO MORENO MORELLO SU STRISSIA!!!
(categoria: " Vita Quotidiana ")
Sercissio pruriginoso stasera su Striscia la Notizia!!!!... Grassie a Moreno e la so trup!!!!
LEGGI I COMMENTI (3)
-
PERMALINK
mercoledì 30 maggio 2007 - ore 08:46
VIGILESSA COL VELO????
(categoria: " Vita Quotidiana ")
Gò leto che da qualche parte i ga assunto na vigilessa urbana (?) che voe metarse el velo sula zagolona come in uso tra i musulmani... A so preocupà: no voria che sta vigilessa invesse de petare multe col brocheto e pena par punire incauti automobilisti la usasse el metodo tradissionae musulman par rinprovarare chi che sbalia... overo la lapidassion!!!!
LEGGI I COMMENTI (7)
-
PERMALINK
domenica 27 maggio 2007 - ore 16:20
DESMENTEGAVO!
(categoria: " Lavoro ")
In diritura de arivo la mission segreta nel mondo del sesso... Svilupi inatesi... manca solo el colpo de grassia finale a chi digo mi po’ la roba vegnarà resa nota in mondovision!!!! par adesso silensio de tronba!!!!
LEGGI I COMMENTI (1)
-
PERMALINK
domenica 27 maggio 2007 - ore 16:17
SECONDA LESSION DE BON TON come vivare in società!
(categoria: " Vita Quotidiana ")
Co se va magnare agratis in casa de amissi no se riva co le man sgorlando (overo sensa gnente). E porta fiori par la parona de casa (in simitero ghe ne ze senpre de freschi) e na botilia de spumante par el paron de casa ( in comercio ghe ze otimi sanpagna al metanolo purissino al costo de £ 0,75.
In teatro co la mojere se evita de mètarse ronchezare cofà un musso asmatico. Se evita anca i sbadili da etolitro. Métarse i ociai da sole neri, posissonarse sula poltrona in modo da no càdare in tera durante el soneto come un saco de verze e dormire in assoluto silensio....
Quando in pisseria el camariero ve porta el conto da screcarterie no se guanta el camariero par el colo e se strenze fin ch’el deventa paonasso ma se manda zo la saliva un paro de volte e se dise co sussiego: - Caro, el farà ben el sconto a un colega? – ala domanda: - Parché sior, zelo anca lu un camariero??? – Se risponde: - No no, par carità... so anca mi un ladro, proprio come vialtri!
Quando se vien invitai a un tè da dei nobili come la stagionata Contessa Maria Franca nata Spenzi, par presentarse se se incucia (italian “inchina”) se ciapa la man dela nobile e se dise co vosse inpostata: - Come stà la nostra legiadra Contessa, luce dei miei ochi e nutrimento del mio inteleto? – po’ se basa la man co savuar fer e no come se se volesse morsegarla. Evitare frasi cameratesche sul genare: -Ehilà vecia scorezona nonché bruta scariolà de ossi... semo ancora vivi?
L’amigo poetastro maledeto ve invita ala presentassion del so primo volume de orende liriche? Se va, se se senta più distante possibile, se serca de sopravivare fin al rinfresco finale. Se se ingolfa cofà un tonbin, se beve cofà un pessegato, se conprà el vergognoso libro e se core casa. Se core in cesso e se sgiaventa el libro sul water pò se tira l’aqua...
COMMENTA (0 commenti presenti)
-
PERMALINK
venerdì 25 maggio 2007 - ore 18:20
NOVA MISSION SEGRETA NEL SORDIDO MONDO DEL SESSO!!!
(categoria: " Vita Quotidiana ")
Mission segretissima par la delicatessa estrema del tema... Solita echip, solito capo, novo luc... De più no posso dire!!!
COMMENTA (0 commenti presenti)
-
PERMALINK
> > > MESSAGGI PRECEDENTI
[ SONO OFFLINE ] 