Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
sabato 16 settembre 2006 - ore 12:00
NOVA PROGRAMA DE QUIS... ENESIMA CAGADA!
(categoria: " Riflessioni ")
Scusè, chi ga visto el novo programa del stramiliardario de Bonolis e del so amigo Laurenti?... El se ciama Fattore C e mi credevo chel fusse un programa de medesina (vitamica C), vista anca la pubricità ermetica che i ghe ga fato drio prima ( i do mone stavatre boni minuti muti cofà do mafiosi davanti al giudice) e invesse el ze el solito minestron de pachi, busti, schei e dimande ebeti... El tuto sostegnuo dai do co na inportansa bestia che pare che i sia drio regalarte l’intervista esclusiva a Dio... MA ANDE’ CAGARE VIALTRI E I VOSTRI BUSTI DE MERDA... e scolteme: almanco conpletè el titolo del programa na volta par tute cussì almanco savemo che casso semo drio vardare: eco un me sugerimento FATTORE C...AGADA!
.jpg)
Eco a chi va in scarsela bona parte dei schei dei contribuenti italiani... butai via par pagare un sior che presenta bojade del gènare... Zente invesse che fa cultura o anca che lavora co dignità dala matina ala sera vive co fadiga... E dopo i me parla de democrassia... Questa ze plutocrazia altro che bae!!! A SAPRE I GA DA ANDARE STI ONTI!!!
LEGGI I COMMENTI (7)
-
PERMALINK
sabato 16 settembre 2006 - ore 10:33
LA RUBRICA CULTURALE VENETA
(categoria: " Scienza e Tecnica ")
Oncò signore se va sul culturale inponente... Ze inutile sgorlare la testa: bisogna anca studiare e tegnerse documentà... Come ze che diseva un serto filosopo che me pare se ciamesse Gesù: " No di solo pane vive l’omo ma anche di salado e vin!".. Eco inparemo e aplichemo. Bongiorno a tuti!
Auguri incivili e assai maleducati in uso presso le tribù indigene del’Alta Padovana
Che te vegnesse....
... Do maroidi da nèzo chilo l’una!
... El balon o l’orchite!
... El colèra pèzo!
... El famoro! (malatia de pulieri che li fa agitare)
... El mal del càparo o limega!
... El mal rossino dei porsei!
... El morbin!!!
... El scagoto a sprusso!
... El scolo!
... El tinfo, el tanfo, la rogna e el sgranfo!!!
... L’afta episootica!
... La lebra sul cicio!
... La peste borbonica!
... La peste scavejona!
... La tosse cativa (o asinina) e co un colpo te spuassi fora i palmoni a tochi!
... Na paralisi sula lengua!
... Un ataco de mona!
... Un camìo de giara sul figà!
... Un càncaro nero!
... Un cioato su un ocio! (un brusco)
... Un scercarterie! (un infarto al miocardio)
LEGGI I COMMENTI (1)
-
PERMALINK
giovedì 14 settembre 2006 - ore 21:47
NO POSSO CREDARGHE!!!
(categoria: " Riflessioni ")
Stassera gò vardà diese minuti "La pupa e el secchione"... overo "la sema e el secion"... No oso pensare che el programa presente dele femene che sfiora inbecilità stratosferica... autentiche oche che al momento che dio ga distribuio i sarveli gera sicuramente assenti... Ma, Giuda infame sassin, poe èssare che una no riconosse gnanca Hitler, Charlot o Ghandi???? FEMENE RIBELEVE!!!... Sta trasmission disonora tuta la categoria!!! NO STE VARDARE STO PROGRAMA!!!
LEGGI I COMMENTI (11)
-
PERMALINK
giovedì 14 settembre 2006 - ore 08:14
ROBE DA MATI!!!!
(categoria: " Amore & Eros ")
Gavio sentio? na ex suora brasiliana da diversi assunta da un sanguigno preton sicilian, oltre a fare la perpetua, overo ’impiegata del signor Dio, faseva anca lì operatrice sessuale overo ghe la calava al paroco il quale probabilmente no gera stà informà preverntivamente che i preti come i frati gavarìa l’obligo dela castità e quindi no dovarìa né tronbare né tantomanco menarse la coa... Va ben, ieri la perputua vagamente porsea ga catà el preton in leto drio tanburarse na proba sposa del paese... Ze sucesso un casin bestia e la perpetua (senpre vagamente porsea) oltre a trare quatro porcassi ga da fogo el leto fasendo corare ponpieri e carbonieri... Cussì desso tuta l’Italia sa che in sto picolo peselo dela Cicilia i ga un prete putaniero, na perpetua vaca e na sposa putana (una?)... Cossa dire?... Gnente. Me pongo solo do dimande de ordine eclesiastico: se le suore ze le spose de Dio i preti zei i marìi dela Madona?... e quando uno de questi tronba o se fa tronbare se poe dire che ste nostre Divinità ze béche sbarà opure zea na bistema?... Qualchedun me delucida!!!
.jpg)
Par capire mejo e catare la legenda co le oportuno spiegassion dela vigneta bisognarà che lezì L’OCO 2007 (el me almanaco umoristico)a fine novenbre!!!
LEGGI I COMMENTI (6)
-
PERMALINK
mercoledì 13 settembre 2006 - ore 18:12
NOTISSIE DEL’ULTIMA ORA!!!
(categoria: " Riflessioni ")
Da sto mese in tuta Italia entra in vigore la nova racolta dele scoasse. Basta “racolta diferensiata” co umido, seco, arso, riciclabile, véro, prastica, nailon, fero, legno, carta, carton cartonsin, medesine e via de longo che ga trasformà le nostre cusine in mostre de patumiere de tute le sorte o nei casi de casalinghe disordinate in autentici loamari.. Da sto mese parte la racolta dela “scoassa tuta smissià ala bojona”. Un solo sacheto messo davanti la soja de casa ogni matina vegnarà tolto su da un paro de marochini che dopo ver magnà tuto el materiale comestibile, se portarà casa tuto el resto par po’ rivendare el tuto in aposite “Boutique dela scoassa”... Inoltre buoni premio par i magiori produtori de porcarie da spendare nei vari Supermercati. El titolo de sta nova canpagna progresso sarà: “Chi de scoassa ferisse, de scoassa perisse!”
El sensaro de vache, bò e afini Tilio Bosegato vinse el titolo de Supermona del mese in quanto busarà co estrema elegansa dalo spaciatore in erba Toma Caoduro che ze riussiò a vendarghe un canpo de mariagiovana elmi secà al posto de un canpo de forajo. Dopo tre pasti le vache del Bosegato ga tacà dare i nùmari e cantare canson de Giovanoti. Dopo sie pasti le andava de qua e de là de baucon inegiando a Maiche Bongiorno (segno de orenda degenerassion cerebrale)... Dopo oto dì le ga otegnù el diploma de “muche passe” e le ze stà ricoverà d’urgensa in comunità. El Bosegato invesse ze invesse soto streto controlo in quanto ga manifestà la ferea intension de rónparghe la testa come na nosa, par rosegarghe el sarvelo, al Caoduro che si è reso latitante...
Considerassion filosofica
I nati soto al segno dei pessi aboca come mone ai oroscapi
LEGGI I COMMENTI (2)
-
PERMALINK
lunedì 11 settembre 2006 - ore 12:29
(categoria: " Riflessioni ")
LE NOVE FRONTIERE DELA GENETICA
Rubrica a cura del siensiatto Carleto Gazia nevodo de Carlo Rubbia
Inventà un novo bestio. Come podì védare in foto un novo animale ze stà prodoto nei laboratori sientiffici siti in Brusaporco (alias Castelminio) TV e seguìi dal Gen. Gazia (Gen. no stà par Generale ma par Genetista!)... Tratasi più precisamente del “lievore a recia curta e coa longa”, (nome sientifico “lievoris felinus”) fruto de sapienti incalmi tra tipologie diverse de bestie a quatro ganbe. Ma venian veniamo subito a trategiare le carateristiche di tal fenomeno biologico: l’esenplare in foto si ciama “Fuffi” e a difarensa del suo progenitore el lièvore oltre a picolissime difarense de ordine morfologico (la coa più longa, le rece più curte, le zate più longhe, el pelo più morbido, el muso più tondo) ga anca diversi gusti alimentari: no è erbivaro ma bensì carnivoro, co na particolare predilessione par carne de sorzi, uceli e anca, dispiace dirlo, saladi. Magna inoltre ingordamente teste de pessi, pastassute e bisteche. Forse par questo quando va de oco no produce pétole come l’antenato lièvore o conejo, ma bensì cache. Unica roba che acomuna i de besti ze l’ecessionale velocità prodota in fuga. Co la sola difarensa che el lièvore normale tende a scóndarse inte le buse par tera, mentre el nostro lievoris felinus se rànpega su par i àlbari o pali o adiritura sora i copi dele case. Da qua el soranome de “lievore da copi”... Par finire sta intensa e soferta analisi del novo bestio podemo dire chel ze comestibile par l’omo ansi òtimo se cusinà rosto co le patate o in tecia co siola, saeno e pomodoro. Questo ce lo gà assicurà el colega siensiatto del Gazìa, Gineto Perussola da Vicensa.
.jpg)
La barzeleta in omagio
Un genovese e un venessian decide de andare a firmare un grosso contrato de lavoro in un bel ristorante dopo aver fato un òtimo pranso... I do magna come porsei, beve come lore e co i ga finìo i conclude co tranquilità l’afare... Unico problema ze el pagamento del pranso luculiano visto che no gera stà ciapà acordi prima... Riva el conto el venessian lo guanta in man, lo leze e a quel punto se sente el genovese che co na vosseta fina fina dise:
- Pago tuto mi!!
El di drìo tuti i giornali riporta la notissia:
“VENTRILOQUO VENESSIAN SCANA’ PAR UN REGOLAMENTO DE CONTI!
LEGGI I COMMENTI (2)
-
PERMALINK
sabato 9 settembre 2006 - ore 16:15
NOVA CAGADA IN TELEVISION!!!
(categoria: " Riflessioni ")
Questo proprio mancava: parlo del novo realiti "LA PUPA E IL SECCHIONE" (poco su, poco zo!), overo LA SENPIA E EL SFIGA’...
Na cagada orenda, un programa da sbochi de sangue, un insulto al bonsenso... Secondo mi i doveva farlo condure de Geri Scotex co Geri Cagà... Tanto par stare in tema!!!... E desso taca L’ISOLA DEI FAMOSI... Stè tenti: el ris-cio de ciapare la monalfia galopante acuta vardando la tivù ze altissimo... Stuè tuto e andè a onbre!!!!!
LEGGI I COMMENTI (2)
-
PERMALINK
venerdì 8 settembre 2006 - ore 16:52
GIORNADA DE MERDA!!!
(categoria: " Vita Quotidiana ")
Parlo de ieri.. Desso che gò assorbio el colpo posso sfogarme, Giuda porseo can!!!!!
Me sò alsà ale 6 e sò andà in tipografia pèar lavoro... Ale 8,30 la maxhina, sta schifosa infame, me ga lassà a piè... Forsa de porchi la ze partìa e sò tornà casa indove go russà la portiera dela sudeta onta de machina su un pilastro de cimento armato... Desfà la porta: 500 euroni sirca de spesa!!!... A mezodì me sò spanto sula maja azura (stile rechione!) mesa butilieta de smalto nero par onge sula majeta.. no ve digo cossa ga dito me mojere.... A mezodi riva ne suora a portare la comunion a me mama e la santa dona me cata a peto nudo drio porconare spetando che se suga el smalto nero che me fiola me gaveva messo sui dei par esigense de sena...A un boto parto par andare a registrare na gag coi tosi de Bepi e Maria Show a Padova su Telenordest e a tresento metri la machina se ferma... Sacramenta, ghe ne gò tirà anca par el culo... Forsa de dai ale do, sò in studio, fasso quelo che gò da fare, overo el mona, me cavo el smalto dae onge e ripato... Dopo tre chilometri resto in mezo a na strada... dopo do ore riparto e a mezo chilometro resto in braghe de tea par la quarta volta.... Desso mi me domando: se ze vero el proverbio che dise: NO SI MUOVE FOLLIA CHE IDIO NO VOLLIA! alora mi me sento in dirito de dire PORCO QUA PORCO LA.. PORCO SU e PORCO ZO!!!!!!!!!!!!
Soridemo va!!!!
.jpg)
- Me sorea bate a màchina!
- La mia invesse dove che capita!!!!
LEGGI I COMMENTI (2)
-
PERMALINK
venerdì 8 settembre 2006 - ore 10:27
ANDEMO SUL’ECLESIASTICO-RELIGIOSO
(categoria: " Poesia ")
Overo cossa sucedarìa se el signor Signor Dio (un minimo de rispeto, par Dio, par uno che ga inventà un mucio de robe e no ciapa gnanca i diriti d’autore), vardasse l’Italia e el Vaticano dal’alto.
VARDANDO IN ZO
- Sò sincero: gò fato un grosso afare,
quando sta parabola me sò fato istalare...
grassie al consilio del sior Berlusconi
gò i vantagi dei veri paroni,
cussì desso drento la television
ne vardo la tera in mondovision...
Me sento qua sul caregoto da dio
e controlo el furbo e l’insemenio...
Basta su un boton dare na deà
e vedo imantinente paesi e sità.
Oncò me gusto in direta la Lonbardia
dove ghe ze zente tanto onesta e pia....
BZZZZZZZZZZZZZZZZZZ...
Ma ostregheta... cossa zelo sto mestiero?,
speta che me informo e ciamo San Piero:
- Spiegame amigo caro e svisserato
come mai a Milan el popolo pare mato?
Tuti che core, suando e pantesando
nissun che dorma magari ronchesando...
Cossa zela sta pressa, sta furia scaenà,
che rende tuti quanti cussì spasema??? -
- Ze presto dito sior paron,
la ze colpa sua sta bruta situassion:
magari desso no’l se poe ricordare
ma li ga condanà Lu a laorare e suare... -
No’l se ricorda?:
"Tu uomo lavorarai col suore dela fronte!"
Sacramèscola Piero te ghè rason,
ma la mia la gera na afermassion
fata più che altro par schersare
e no sicuramente par farli s-ciopare!!!....
Canbiemo canale va che me vien afano
e fame vèdare cossa i fa in Vaticano...
BZZZZZZZZZZZZZZZZZZZZZ
Ma... ma... qua i me ministri, sti pelandroni
no i conbina na tega e i se grata i maroni...
Vardali là che i passeja e i va torno
sensa móvare foja par tuto el giorno...
Ma digo mi no i ga miga gnente da fare
oltre che passejare e la lengua menare?
- El problema ze questo, caro sior paron,
questi no ga fato del laoro na ossession,
parché i ga capio in modo parfeto
che le so minacia gera solo un scherzeto! -
COMMENTA (0 commenti presenti)
-
PERMALINK
lunedì 4 settembre 2006 - ore 22:10
E BASTA, PAR DIO!!!
(categoria: " Riflessioni ")
No bastava "el grande fradeo" "l’isola dei famosi del casso", "La fatoria" e via de longo co na selva de mone che fa finta de laorare e barufare cofà cani, davanti al popolo de alochi televisivi... Desso eco la nova vacada de Maria De Filipi... MA COSSA GOI FATO DE MAE MI PARCHE’ MI RONPI’ I MARONI IN STO MODO?????
Moleghela, chel can de Giuda, e fasì qualche programa mejo, orca bestia viliaca sassina... Andè a ramengo vialtri e i vostri realiti siò che no ghe ne posso più!!!!
Eco el studio indove la De Filipi ga partorio el novo programa!!!!
LEGGI I COMMENTI (5)
-
PERMALINK
> > > MESSAGGI PRECEDENTI
[ SONO OFFLINE ] 