Messaggio
di sicapunk da commentare:
 La storia che ve conto la pare na barzeeta, ma invesse la xè la verità.
Na matina de disembre ghemo da copare on porseo che ghea me zio.
El ricordo, l'immagine del tutto, la go davanti ai me oci come se a fusse drio capitare in te stò momento, anche se xe passà tanti anni. Iera na matina freda de fine anno, par tera iera iassà, i albari iera tutti bianchi de brosema e sizara, solo so quei visin al porsié la iera nda via, parché fasivino fogo par scaldare l'acqua dea broa sol marmitton, se sentia tutto on xciocare de bronse, on fumo de fasine de rubinaro, moie e piene de spini, amorbava l'aria. In corte iera tutto pronto: la pelaora a culo in sù, i cortei soa muretta del seese, el parolo de rame tirà a lustro coa paietta, du bocai de vin e arquanti goti pozà soa soia del balcon, la corda ciapà dupia so na trave del portego, el massin co le maneghe tira sù, altri omani che iera vegnù a iutarne i bevea par farse coraio. La tension in te chei momenti la iera molto alta, pareva quasi che se stesse par compiere na esecussion capitale, mio Pà quando che ghe iera da fare chel laoro lì el catava sempre dee scuse par no essarghe, nol volea vedare copare le bestie.
Se scomisia, i tira fora sto maxceto dal porsié, el vien colgà soa pelaora, mì i me mette a tegnere una dee do gambe de drio. Passa quasi diese minuti dopo chel ga ciapà la prima scortelà ma sto porseo nol voe morire, el massin riprova col corteo naltre do volte, ma 'l porseo nol voea morire, anzi el se difendea anche bastansa ben col de drio, ciapandosea proprio co mì ca iera visin (me digo chel iera sta ingrassà a fasoi).
Stufo de dover snasare queo che molava stà bestiola, stufo de tegnere sta gamba par gnente, me vien on lampo de genio, tiro fora la batuta che dopo xe passà alla storia, digo "ZIO, ME PARE CHE STO PORSEO NOL VOIA MORIRE, XE MEIO CHE TE O PORTI IN PORSIE' CHE TE GHE DAGHI DA MAGNARE, E DOMAN LO COPEMO RESTO ". Non lo ghesse mai ditto: el massin el butta via el corteo, urlando, tutto incaza "A ME VOY TORE IN GIRO, I CORTEI I XE STA' GUZA' MALE, GHI FATO A POSTA PAR FARME FARE BRUTTA FIGURA". El iera on poco permaloso, ma par on massin, come par on torero el xe on ponto de onore saver dare la stoccada giusta.
El porseeto par contentarlo, par no far fare brutta figura a sto povaro omo, el se ga deciso e 'l xe morto. |
ATTENZIONE:
Per commentare questo BLOG
è necessario essere iscritti
alla community di www.spritz.it
COMMENTI:
NESSUN COMMENTO DISPONIBILE
|
[ SONO OFFLINE ] 
