Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27791 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
sabato 14 giugno 2008 - ore 18:40
CONTINUA LA SERIE BIBLICA!
(categoria: " Vita Quotidiana ")
(trato fora dal’ecelso volume MONADE BIBILICHE de Walter Basso)
La difissile progetassione. I vari sforsi e le richieste esose e sinpie di Adamo...
Dito fato, sensa gnanca saludare, el sig. Dio mete in moto el nuvolon e parte par andare a inventare.
Rivà in uficio el toe carta, pena e calamaio e taca riflètare par fare sù sta fotocopiatrice...
La prima idea ze stà quela de fare na spece de petoniera drento la quale butare paltan, menare na manovela, zontarghe na polvareta magica, menare la manovela fin che drento se formava un omo.
Na volta finìa la costrussion se verzeva na sfesa e l’omo saltava fora brontolando par via del paltan sul muso... La sfesa se sarava e la machina gera pronta par n’altro omo.
- Giuda can... - pensa Dio - la roba no me convinse... Intanto l’omo vien fora za grando e grosso e par farlo me voe tanto de ch’el paltan che deventarìa un problema catarlo fora... Dopo dela polvareta magica ghe ne gò solo tre chili e no me ricordo più la formula... Se dòparo sto sistema de fabricassion sò ciavà... Uhhmmm uhmmmm... Pò la petoniera la me pare massa tennica... Bisogna che me inventa calcossa de più senplice e beo da védare... Intanto gò deciso che l’omo lo fasso fabricare picolo; un ometo insoma... Drento (ala màchina intendo!) da qualche parte ghe meto un pissegheto de lievito Bertolini e dopo fato el cresse da solo... grat... grat... (gratadina ale Sfere Divine)
Butà via el progeto petoniera el sign. Dio ga tacà disegnare modeli su modeli e raquanti de questi ze rivà fin ai giorni nostri. Ma de questo parleremo più vanti.
Prima el ga disegnà na scatola co le ganbe parché la podesse spostarse otomaticamente e na sfesa davanti da dove sarìa vegnù fora l’ometo; drento el ga messo tuto un mecanismo biologico fato de polpa de osso mista e casini vari par cui bastava spuare drento da un buseto messo de sora la scatola che grassie ala saliva umana se inescava un mecanismo par cui il quale drento un sacheto de prastica in velocità se formava un sacramento che no jera altro che un omo tipo Adamo in dimension ridote alto sirca sessanta sentimetri… Un naneto insoma!
Tuto sodisfato el sig. Dio fa su un bel pacheto regalo col so bel nastrin ingropà torno e core portàrghelo a Adamo.
Rivà sora el zoo dala nuvola se sente sigare:
- ADAMOOO… ADAMOOOO... Sono il tuo Dio che ti parla!... Indove ti se nasconto?... ADAMOOO!
- Ma qualo zio?... Se sò qua solo come un can!!!... Cossa ghe entra desso me zio???
- DIO... DIO... no zio, macaco che no te sì altro... DIO... varda che popò de regalo te gò portà! -
e cussì disendo el fa un salto dala nuvola, se ingànbara sul tonegon e cade in tera come un saco de mer... meridionali (?)... Se rialsa, se dà na spolveradina e se presenta davanti a Adamo co el pacheto in man.
- Ostia!!!... un regalo... El ze el primo che ciapo, sacramenta!... Cossa zelo?... un eletore de divudì?... un forno a microbonbe? -
No’l fa ora de finire la frase ghe ghe riva un divino papon drio ale rece che par poco ghe fa bàtare el bàbio su un salgaro darente.
- Intanto non gai da dire le parolacce senò te fulmino seduta stante e po’ verzi invece de dire monatte… eletore de divudì... tshhhh!
Adamo tuto spasemà sbrega la carta e...
- Ma... Ma cossa zela sta bojada?... Na caponara par i conici?
- Dammi qua stolto!... – e Dio ghe cava l’satresso rabiosamente dale man - No vedi cosa essa sono??? Una machina frabrica uomeni... Se spua qua e vualà!
Dopo trenta secondi eco vérzarse la sfesa sul davanti e salta fora un nano in dopiopeto blu che taca andare de baucon de qua e de là disendo "Mi consenta", "Cribio" e "Mi riconsenta"...
(E qua se capisse do robe inportantissime: prima che el Signore Dio gaveva na specie de idea fissa sula "sfesa" e la seconda che Berlusconi ga boni motivi par crédare che Dio in persona sia so pare...)
(continua)
.jpg)
Modelo che (lo scoprirì più vanti) el signor Dio ga usà par fare la dona umana... Purtropo serti esenplari ghe ze vegnù male e fa cagare. Vedi l’astronoma Ac, Rita Pavone e la Rosi Bindi...
LEGGI I COMMENTI (2)
-
PERMALINK
mercoledì 11 giugno 2008 - ore 12:41
LA BIBIA SECONDO MI!
(categoria: " Scienza e Tecnica ")
(trato dal me ultimo libro "MONADE BIBLICHE" che se cata in tute le peso librerie del Veneto)
Adamo - 7 giorno della creassione - mona agreste
Primo omo in assoluto, fato de paltan e spuacio, el gera paron spotico de tuto, no’l pagava le tasse, non gaveva el Governo che lo dissanguava, el cantava canson famose*, no’l lavorava e podeva vìvare in eterno... E cossa galo fato sto mona?: el ga ciamà el Sig. Dio, el ga tacà fifotare fin che questo par no farse rónpare le togne in eterno ghe ga fato la dona, co la prima operassion de clonassion; overo, (secondo la Bibia) ghe ga cavà na brasola e ga questa ga ricavà na dona umana. Dopo pochi giorni la malnata ga fato intavanare el Sig. Dio magnando un marso de pomo e questo ga punìo i do èbeti e tute le generassion a vegnere, overo fin a Walter Basso che no ghe entra par gnente e che oltretuto i pomi ghe fa afano in particolar modo queli coti!!!
Nota
Il Basso qui commette un errore madornale: l’Adamo biblico non ha nulla a che spartire con l’Adamo canterino degli anni 60, il quale non andava in giro con la foglia di “figaro” davanti alle vergogne umane e poi non viveva nell’Eden ma bensì in Belgio… Ciò dimostra, se ancora ce ne fosse bisogno che il Basso come storico vale meno "de na scoreza de un mussato".
Grassie al contributo del teologo dela madona Ermenagildo Tiraca dito Striche publichemo na nova interessantissima version dela creassion dela dona umana. Recenti studi sul’inbecilità feminile (cavia: "Loredana Leciso") pararìa dare rason a sta nova teoria.
Adamo si ronpe le pale e chiede al Sig. Dio una machineta par avere dei filli... Dio ci pensa sora e intanto fa il comandamento contro la formicassione...
Dopo aver fato su l’Universo Universale contenente na sluamaratta de bale, balete e baloni, raquanti che fa ciaro, altri no, el Sig. Dio ga frabricà la Tera Terestre e insimia ghe ga messo un zoo pien de bestie, piante par fare onbrìa ale bestie e infin grassie a un secio de paltan ga fato su el guardian del zoo overo el primo omo ch’el ga intitolà Adamo.
Fato questo el se ga frabricà na nuvola da corsa (no’l podeva cronparse na màchina in quanto la Fiat gera drio fare la luce: “FIAT LUX”) e se partìo a rasso par tornare casa sua di sé stesso a riposarse un fiatenin... Dopo un bel soneto durà sirca oto dì el se gà svejà, cavà le sgarbele dai divini oci e ga deciso de tornare sora la Tera par védare se tuto andava ben.
El riva sora el zoo, el mola zo l’àncora, el varda basso e cossa védelo?: Adamo, nudo e nado che ze drio ramenarse in velocità el pistolino.
- Ciò ti, pesso di monna che no sei altro, cossa sei dietro a fare? - siga metendo la testona fora dala nuvola el sign. Dio pontando l’indicione acusatore indosso al porocan.
- Òstrega che tremasso!!! - cria l’omo molando el pipiolo e vardando in sù - Intanto bongiorno... E in quanto a cossa sò drio fare gò un problema...
- No te gavevo dito che te dovevi téndare e curare le bestie che no le se magna tra de lore??? E qualo saresselo sto problema?... Sentimo...
- Me sò indormessà sora a un formigolaro... Le formìgole, ste sassine schifose, ga tacà caminarme sul corpo umano e un paro, le più seme, no se ga miga inpirà drento el rubineto del’aqua calda?... Me fa na spissa bestia e sò qua che serco de farle vegnere fora...
- Ma alora te sì tuto mona!!! - s’incassa Dio - te lo sè che no vojo che te zuga co l’inpianto idraulico ch’el ze ancora in prova!!!... Te dago mi le formìgole!!!... verzi le recione e scolta puitto: no bisogna FORMICARE... Ciaro? senò la prossima volta te tajo le man.... Stà fermo che fasso un miracolo e te fasso sparire le formìgole... Un due tre... là... A proposito, caro, par el resto come ti catti?... Ti serve calcossa?...
- Me serve... me serve... Me anoio mortalmente... no sò cossa fare.. No ghe ze gnente par pèrdarse via... No se podarìa avere n’altro omo cofà mi magari par zugare a carte o contarse le barzelete???
(E qua bisogna verzare na paresi: se el sig Dio gavesse da reta a Adamo el gavarìo fato n’altro omo magari de nome Bepi... i do se gavarìa sposà tra de lori e sarìa nata la prima copia ghei del mondo... e desso nel domie e sete queli che strepita che éssare culatoni ze normale i gavarìa anca razon!)
- Ma cossa disito?... Desso me meto frabricare òmeni a nastro... Cossa sono un imprenditore?... No no desso bisogna che inventa robe mèjo... Po’ se fasso n’altro esenplare cofà ti sì boni anca fare barufa e cussì far nassare la prima guera mondiale!!!
- El me scusa sior se me permeto, ma visto che lu me ga fato anca un servelo mi so drio dopararlo e vorìa farghe na dimanda!
- Vegnendo fora da ti gò paura che la sia na dimanda èbete... Ma sicome mi sò democratico sbrochete fora...
- La domanda ze questa: se mi me malo, me ronpo na ganba o me ciapo la peronòspara, chi farà el me lavoro?... E se sbrissio zo da un peraro e me copo?... Chi ze che goernarà i mussi i bò, monzarà le vache e curarà la stala???
E co sta domanda in stile Marzulo el sign. Dio ze restà là paràrìa co la boca da pomi...
- Òstrega, par me stesso (par Dio)... Te sì vagamente mona ma no te ghè tuti i torti... Co uno solo la specie ris-cia de estìnguarse... Come posso fare, ostregheta, porsea canaja - e qua el taca gratarse prima la barbona, dopo la zàgola, po’ ancora la barbona.
(Come se poe notare anca el Sig. Dio dise le sparolasse come Walter Basso!)
- Mi veramente gavarìa pensà.... – salta sù Adamo.
- STAI SITO PESSO DI MUSSO ASININO... Sito Dio ti?... Ocio che desso el me insegna cossa ghe gò da fare!!! No’l ze gnanca bon de sformicarse el rubineto e el voe creare lu... Uhmmm... uhmmm..
- Secondo mi ghe vorìa....
- E alora?!?... Tàsito o goi da torte la parola?... Lassia che rifleta... GHE SO’... GHE SO’! Sicome che mi sò strainpegnà e no posso fare tuto farò na machineta che fa fotocopie de òmeni... Desso vago in uficio progetassion me taco ala tola da disegno e te vedarè cossa che te tiro fora!!!... E guai a me stesso (a Dio) se torno e te cato ancora drio ramenarte el rubineto par formicare!!!... ansi fasso subito un comandamento contro sta assion da mone!
Nota del filosofo W. Basso
Ze a sto punto che el sig. Dio ga comesso el più grave erore dela storia umana... Lu ga fato el primo omo e no lo ga brevetà, vedaremo come più vanti el ga costruìo la prima màchina che sforna òmeni e no’l ga brevetà gnanca questa... Par questo desso anca el più mona dei essari umani fabrica òmeni al posto de Dio sensa nissun criterio! E questo spiega parcossa che in giro ghe sia cussì tanti mone e delinquenti!
(Continua... se me comoda!)
LEGGI I COMMENTI (4)
-
PERMALINK
martedì 10 giugno 2008 - ore 22:56
CHE PROGRAMA DE ALTA LEVATURA!!!
(categoria: " Riflessioni ")
Telenordest stasera: un programa de un livelo stratosferico, guidà da na giornalista ochialuta spissenga e rabiosa... ospiti na pornostar porsela, un mezo prete, n’altro che no sò che casso el sia visto cel programa lo gò vardà de salton, n’alra femenata e sareseta sula fugassa la siora sindaco de Scorsè che ga pena pubricà un libro dove se parla de pincioni de fogo.... Un dibatito la cui levatura ze da sbochi de sangue... Ma, digo mi, sta sindachessa no ga gnente de mejo da fare che andare in giro par le television de baucon par presentare un libro che se vende solo parché la zente ze curiosa de lesare patole come "casso" "mona" e via de longo????.. Pensare che par via de sparolasse onte mi gavarìa dirito no solo de fare el sindaco de deventare Presidente dela Republica!!!.. Corajo vanti senpre.... Chi la fa l’speti chi no la fa chel spensa!!!!
LEGGI I COMMENTI (3)
-
PERMALINK
martedì 10 giugno 2008 - ore 19:28
L?OMO CHE SUSSURAVA AI MUSSI!
(categoria: " Vita Quotidiana ")
Un contadin ga un musso vagamente depresso, che ga poca voja de lavorare e ze senpre co l’ocio basoto, che fa pecà védarlo. Sto omo ghe conta el bàgolo a so amigo Toni che ghe dise:
- Se te voli el musso più alegro ghe penso mi! - e dito fato el ghe dise do paroline su na recia e el musso taca rìdare de gusto. Passa un mese ma Bepi, el paron del musso, va da Toni:
- No ghe ne posso più... Desso el musso ride de continuo e el me fa afano... Ti te ghè conbinà el dano e ti te lo sistemi!!!
- No stà preocuparte - risponde Toni - desso vago in stala e te vedarè che lo calmo subito. Ti però spètame qua... - Difati Toni va in stala stà drento pochi minuti e vien fora col musso che pianze a tonfon.
- Ma... ma... spiegame un poco come che te ghe fato, prima a farlo rìdare e desso a farlo piànzare.
- Fàssile caro, fàssile: par farlo rìdare ghe go dito che gò el cicio più longo dela suo ....
- E par farlo criare? - interonpe Bepi
- Ghe lo go fato vèdare...
COMMENTA (0 commenti presenti)
-
PERMALINK
lunedì 9 giugno 2008 - ore 23:19
CASSO, IN OSPEDAE I TE COPA!!!
(categoria: " Vita Quotidiana ")
Gò sentio le vacade conbinae inte na clinica de Milan: zente operà solo par ciapare schei... Adiritura sinque vecioti ze andà magnare i radici da parte dela coa (legi: "i ze morti") parché operai par gnente. O go senpre dito mi che i medeghi ze aseni e delinquenti... I te proibisse de bere. magnare, tronbare, fumare e lori tronba, magna, beve, e fuma come canoni de stua... Tuto grassie ale nostre malatie... E co i more i va in Paradiso e i entra par la porta dei FORNITORI!!!... In gaera bisogna metarli, altro che bae!!! Orco zio can!!!
LEGGI I COMMENTI (2)
-
PERMALINK
sabato 7 giugno 2008 - ore 17:16
ECO EL LUMINARIO DELA LENGUA VENETA!
(categoria: " Vita Quotidiana ")
Dago un poco de spassio al’esimio siensiato Tulio Smerdacai, laureà in sparolassologia e porcologia aplicata al cass... presso la Cademia dele Siense Insulse a Busa de Vigonsa che ne despiegarà ogni tanto le parole venete più bele!!!... Mah..
sbregamudande = dicesi di sbragagnone acuto e velocissimo... che va subito al sodo senza perdere tempo prezioso nei cosidetti preliminari (ciucioni, sofegazzi, slinguassamenti, sbrassolamenti, palpugnamenti, ramenamenti acuti) e che conpie la cosideta "pinciadina" a scottadito (scotadeo) o anche a "volo d’uccello". Tra i più famosi "sbregamudande" possiamo citare Benito Mussolini detto "Vessiga de onto" per via della zagolona pelata che notoriamente stramassava le donne in venti-trenta secondi detenendo così il record mondiale di velocità in mona da fermo...
.jpg)
Eco la fotosomeja del siensiato Tulio dito anca Testa da Bajijo"
COMMENTA (0 commenti presenti)
-
PERMALINK
venerdì 6 giugno 2008 - ore 23:17
EL RITORNO DEL SUPERMONA!!!
(categoria: " Vita Quotidiana ")
Casso... su Canale Italia ze in onda el facia da culo del Divino Mago Otelma, quelo vestio cofà un pajasso del circo Togni co la vosse sganfa e incalcà de feramenta sui dei chel pare la Madona de Monte Berico... El baucoto ga brontolà par via che Pipo Baudo no ga acetà la so canson (na grandissima cagada fora dal bocae!) a Sanremo... Otelma... seto cossa che te digo: MA VA CAGARE SULE ORTRIGHE!!!
Eco qua la copertina del cd del mentecato incalmà col musso!
LEGGI I COMMENTI (2)
-
PERMALINK
venerdì 6 giugno 2008 - ore 12:14
RAJONAMENTI DA MONA
(categoria: " Vita Quotidiana ")
Dilema del fumadore de canoni
“No so se go na cana inpissà
o na pissada in cana!”
Confusion su l’ Aids:
"L’inportante ze che i culatoni che ga bisogno de na trasfusion se méta el goldon prima de scanbiarse la siringa..."
El peocioso
Drento na farmacia se presenta un genovese siu trent’ani: - Sior medgo, - el taca dire - mi, belin, go bisogno de un consilio… - El se sbroca pure, caro passiente – risponde co sussiego el farmacista dandose arie da mèdego – siamo quive aposta par erudire, consiliare, curare… quale sarebe el problema? – Ecolo qua el problema, belin, - dise el genovese tirando fora dala scarsela un scartosso… El taca scartare co cura e salta fora un goldone-preservativo tuto fufignà, strapassà… insoma ridoto in stato pietoso. El farmacista convinto de èssare un mèdego, fa un salto pararia e taca criare: - Ma insoma, si può savere cossa ch’el voe co sto vergognoso atresso in man??? – Calma sior mèdego, belin, sto vergognoso atresso come lo ciama lu, ga svolto un servissio ecelente: ze tre ani che ogni do dì lo dòparo, lo riverso come un calseto, lo lavo e lo riuso, ma desso me sorge un dubio atroce e voria un consilio… - Ma ndemo!!! El me diga che go pressa… sò un dotore mi, ostregheta!!! Cossa ghe urta? – El problema ze questo – barbota serio el genovese - dopo tanto tenpo go na vaga paura che el nobile manufato se sipia usurà… ch’el possa rónparse, insoma… e se la spesa no ze ecessiva sa, vorìa procedere al’aquisto de un goldone novo de balin e magari co la garanzia… - Tuto qua el problema, Giuda cane? (i farmacisti biastema in italan parfeto)… Cossa volo ch’el costa un goldon?: na monada: solo 3 mila franchi…. Alora ghe ne dago uno?… - Calma òstrega calma – risponde l’omo porsello – cossa zela tuta sta pressa de véndare?: un àtimo caro: vago fora e me consilio co i me tre soci… dopo deciderò!!!
Mister Facia da Mona 2007
LEGGI I COMMENTI (6)
-
PERMALINK
mercoledì 4 giugno 2008 - ore 16:12
LA RUBRICA DEL TENPO LĺBARO... ANDEMO A PESSE
(categoria: " Vita Quotidiana ")
A cura de ’Rtemio Fontanasso laureato in Tenniche de Pesca (da quela col bigato a quelo co le bonbe al carburo) presso l’Università de Busa de Vigonza (Padova)
Carissimi giovini e ansiani tuti, ogi trataremo la pesca al pessegato, notissimo pesse-anfibio di aqua dolce co legerissima spussa di freschinazzo. Prima di passare a lustrarvi le sofisticatissime tenniche di inganciamento del noto pessone definito dal grande Tilio Maseneta "il salmone dei peociosi" vedarrò di darvi in pasto alcune nozioni sientificche atte a conosserlo in modo più compreto possibile. Difati o preparato una aposita scheda per la bisogna:
Nome popolare: PESSEGATO o BARBON
Nome sientificco: Pissus Felinus Meo Mao
Habitat: sóto aqua o in mèzo al paltan in fossi, canali, lagheti
Caraterristiche tenniche: il sogeto ha in dotazione raquanti peli intel babìo che lo fano somigliare apunto al nobile felino. Inoltre ha lunghi spini che saltano fora dala schina e si inpiantano nei diti di chi lo chiappa in mano.
Dieta: tuto quelo che cata co preferensa par i sorzi.
Nota di colore: il pessegato è molto ricercato soratuto dale popolassioni indigene di Vicenza le quali lo fano in tecia secondo la nota riceta "Pesseconicio in tecia"
Passiamo subito dopo la dotta presentassione a vedere le tenniche di catura del’esenplare. Inanzituto munirsi di canavera co filo forsin, suro, pionbi e in fondo un lamo di fero par poder ingansare la preda. Munirsi anche di un fosso o lagheto indove sia presente un numero consistente di senplari dal chilo in su.
Come esche portarsi dietro un bussoloto co drento na sinquantina de moreje vive. Munirsi anche di aposito sestello contenente un panin co sopressa co l’ajo, un litro de nero (par no morire de fame durante l’estenuante lota co li semplari più grandi che sputacaso si tacano al lamo). N’altro sestello vodo serve par le cature.
Secondo fonti non controlabili parerebe che tale Memo Susta da Loregiola gabia caturato un semplare di 87 tonelate e mèza nel fosso darente casa. Precisemo che normalmente tanti pescadori sono busiari.
Comunque sarebe consiliabile, proprio par avere un aleato in casi come questo, portarse dietro in aposito aquario un pessecan de un paro de quintali che ze el naturale nemico del pessegato.
Par la pescada se fa come par staltri pessi: se pica el sorze sul lamo, se trà questo in aqua e se speta... Col bestio se taca se tira su, se ghe dà na smartelà in testa e apena cadaverizà el se sgnaca in aposito sestelo... Se la lota ze impari se sgiaventa drento el pessecan.
De solito el pessegato se spaventa, salta fora dal’aqua e se ranpega su par el primo àlbaro ch’el cata. Alora se guanta l’àlbaro se sgorla forsenatamente finché el bestio anfibio cade in tera spacàndose el bàbio... Se invesse no se taca gnente parché el pessegato astutamente se magna i sorzi sensa però magnare lamo, se ricore ai metodi americani, overo se tira fora dal bagaliaio dela màchina un paro de bonbe al carburo e le se sgiaventa in aqua. Straje assicurà. Volendo se poe doparare anca na picola bonba atomica (in comercio ghe ne catè de tute le dimension)... el problema ze ch’el pesse podarìa risultare radioativo. In sto caso podì regalarghelo ala suocera che la ze cofà na biologica. Eco. Io o finito. Nela prossima rubbrica vi parlerò del pessesega che per ovie razoni è in estinsione, mentre è in forte cressita el pesse tronba... Buongiorno a tutti.
LEGGI I COMMENTI (2)
-
PERMALINK
martedì 3 giugno 2008 - ore 17:37
DEL COME DESTRATARSE DELE ZANZARE CO MODICA SPESA E GRAN ASTUSSIA
(categoria: " Vita Quotidiana ")
Che le zanzare sipia dele grandissime ronpitogne no ghe ze onbra de dubio... Che sia difìssile coparle ste schifose ze ancora più fora de dubio: i zampieroni (sarìa quele spiralete spussolenti che se inpissia e intòssega tuti: ti, to mojere, to fili, el can el gato... fora che el maleducato inseto) no serve a gnente... come no serve a gnente la armi bateriologiche e chimiche: machinete a ragi ultraviolenti, quele col richiamo del mas-cio pincion, quele che sprigiona gas tossici che al confronto el gas nervino ze parfumo de rose... Le armi mèjo quindi resta quele storiche: le savate, i s-ciafoni e le resie... Anca i pugnassi paraltro da òtimi risultati... Comunque desso "sine qua non" (semo qua nialtri... plurale majestatis) co na idea rivolussionaria che canbiarà el futuro del mondo umano vitima del mondo zanzarifero... Ma inviamoci tosto col metodo.
Robe che serve:
1 Càmara da leto inpestà de zanzare in quantità (chi no le gavesse poe farse prestare quele del vissin de casa)
1 picola tola co quatro ganbe
10 picole carafete de vero
1 tovajeta
2 siringhe da prelievo (in caso de mancansa del’atresso se poe usare dele sanguete)
10 careghete eletriche de misura picolissima
El presente metodo sientifico parmete l’assassinio sistematico de 10 zanzare ala volta.
PROCEDIMENTO
1) Andare in bagno de sotignon, armai co le do siringhe o le sanguete e cavarse un bon litro de sangue dale vene umane...
2) Métare el pressioso liquido drento un bussoloto, scóndare le siringhe. Se gavì doparà le sanguete dopo averghe fato spuare fora el sangue a pugni in testa butele sul vater e tirè l’aqua...
3) Co fare indafarente tornarì in cusina dove sora la tola gavarì parecia la toleta picola co la so bela tovajeta e le so diese carafete in bela vista...
4) Desso fasendo atension che le zanzare che ze in càmara no ve veda co na siringa travasè el sangue umano dal bussoloto ale carafete che inpienarì fin l’orlo...
5) Fato questo torno la toleta davanti a ogni carafeta posissionè le diese careghete leletriche che gavarì colegà su na savata leletrica che a so volta ze colegà co na presa corente a 220V... Desso tuto ze pronto par la straje zanzarifera...
6) Andè verso la càmara disendo co vosse stentorea:
- Prego, signore zanzare, acomodatevi in cusina che sono pronto da bere... Sangue fresco di prima qualità... Assagio gratuito oferto dal’AVIS... Prego, co calma... diese ala volta par piassere!!! -
7) Pena le diese sarà svolà fora dala càmara da leto se sararà la porta e se farà comodare le schifose sassine a tola... Naturalmente le zanzare se precipitarà, se sentarà sule careghete leletriche, fregandose le man (?) e se fulminarà al’istante...
8) Co do dei se guantarà i cadàvari che vegnarà sgiaventà nela scoassara....
Ripetere le operassioni dal punto 6 finché la straje sarà conpleta. Bonasera a tuti.
LEGGI I COMMENTI (4)
-
PERMALINK
> > > MESSAGGI PRECEDENTI
[ SONO OFFLINE ] 