Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27793 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
venerdì 8 dicembre 2006 - ore 09:40
EL PRIMATO VENETO DE NOVENBRE 2006
(categoria: " Vita Quotidiana ")
Gino Scataron de Busiago Soto ga vinto el titolo de Omo Supersfigà del’ano in corso (legale)... El Scataron infati in pochi mesi ze riussìo a becarse otantadò peladoni sul bero dal musso Anselmo, dosi inponenti ogni sabo de sera de bastonà drio ale rece dala mojere al ritorno dal’ostaria inbriago cofà na cioca, oltre sento punti in manco par guida in stile bisato grazie ai efluvi vinicoli assorbiti, trenta cadute nel fosso co conseguente giassamento de ciape e bronbi. Inoltre ze riussìo de malarse trèdese volte de snaro, peronospara e pivia, ronparse l’osso sacro e anca quelo ateo, e, dulcis in findus, deventare beco sbarà grassie al’inpegno e costansa dela mojere nel dare via la fritela a pressi modicissimi. Unico momento positivo del’ano Gino lo ga avù quando ze riussio a scanparghe a Omar Finochieti che voleva a tuti i costi farlo suo posteriormente.
Considerassion filosofica a 5 stele
Serti poeti ze come l’Euchessima... anca in picole dosi i te fa ‘ndare de oco!
Frinquello in veneto FINCO SUBIOTO par via che subia... no c’entra un casso co le considerassion de cui sora ma el brog ze mio e mi qua meto che casso che vojo!!!
COMMENTA (0 commenti presenti)
-
PERMALINK
giovedì 7 dicembre 2006 - ore 08:52
El canton dela poesia
(categoria: " Poesia ")
La preghiera del béco parfeto
“Signore fasì che no sia béco...
se lo so fasì che no lo sapia...
se lo so fasi che no ghe bada...
Nota
La pararìa na tiritera mona in realtà contien na so inopugnabile logica. Il fato de scoprirse béco infati scatena reassion che va de solito dal turpiloquio ala resia acuta, dala depression più nera co pianti diroti par i cantoni, ala scortelà o s-ciopetà sul figà ai fedigrafi... Con conseguente arresto del béco e relativa condana. In sorapiù ghe ze anca i sberlefi dei càncari dei amissi del bar... L’anonimo poeta rurale elevando questa sua preghiera a Dio, invesse de porchesare a arco, denota un’animo filosofico, superiore, distacato. Dimostra anca, in ùltima analisi, de èssare un pocheto mona... No tanto, ma un pocheto sì...
Noto béco storico e blasonato
LEGGI I COMMENTI (1)
-
PERMALINK
mercoledì 6 dicembre 2006 - ore 13:13
OMAGIO ALA POLENTA... co el resto!
(categoria: " Ricette ")
Su sta riceta riceta ze presente a gran richiesta del popolo la polenta, vuoi parché la ze bona, vuoi parché la ze tornà de moda, vuoi parché tuti i scritori veneti par sto magnare ga versà fiumi de inchiostro... Nialtri agricoli invesse gavemo versà in tola montagne de renghe, scopetoni, saladi e formajo... Va ben, assemo ‘ndare. L’ abbinamento ze classico: polenta, funghi e casatea... Tuta roba che na volta costava poco: la polenta se faseva in casa col formenton proprio, i funghi cresseva agratis, la casatea costava sicuramente manco del caviale... A proposito de caviale: un me concitadin, Nane Bigolara, na sera ze andà magnare inte un ristorante de sigo (sul senso che co i te porta el conto prima te sighi, po’ te fè un colpo popletico).. Riva el camariero co la facia da stitico e da mona, ansi par èssare più precisi da mona stitico, e ghe consilia, tirando la boca, un antipasto de caviale. Al che Nane se varda torno desperà, po’ dimanda co sospeto cossa òstrega che sarìa sto “caviale”!.... El camariero desgustà ghe spiega ch’el sarìa “uova de storione, sior”... Cussì Nane se tranquilisa e risponde: - Va benon caro: i ovi me piase!... el me ne portà do in fortaja, magari co la siola! – Questi, caro letori, sono i miei concittadini... Ma lasso la parola, ansi la pena, a Antonio che pestugna nervoso spetando de presentarve la so riceta.
El modo de dire nostran
Averle tute come la polenta crua
Essere sempre pieno di rogne e magagne
LA RICETA VALLEVERDE
POLENTA CO FUNGHI E CASATEA
a cura de Antonio
El me consilio:
La casatea ze un tipico formajo che se cata in tuta la provincia de Treviso; el più bon vien prodoto nele pendici del Monte Grapa. Se no lo catè podì sostituirlo co altri formaji tipo el Montasio fresco o anca l’Asiago fresco....
Cossa ghe voe par 6 persone
Na polenta de media consistensa che va tegnua in caldo – 800 grami de funghi misti freschi (possibilmente no coltivai) – 2 spìgoli de ajo – un ciufeto de parsemolo – ½ bicere de ojo extravergine de oliva – 400 grami de casatea – sale e pévare q.b
Tachemo coi lavori
Snetare parben i funghi e tajarli a fetine; inte na cassarola fasì inbiondire l’ajo, el parsemolo, zontarghe i funghi, giustare col sale e col pévare e portare a cotura. Pena pronto ricordarse de cavare l’ajo. Co un méstolo fare come dei gnareti de polenta, postarli su na tecia inburà, schiciarli in mèzo e metighe in ognun na cuciarà de funghi. Coverciare sti gnareti co le fetine de formajo e passarli un pocheto in forno a tenperatura media fin ch’el formajo taca desfarse. Servire caldi.
Eco la copertina del me libro col cogo A. Ravagnan fodrà de ricete venete (esaurio)
COMMENTA (0 commenti presenti)
-
PERMALINK
martedì 5 dicembre 2006 - ore 09:58
(categoria: " Riflessioni ")
INFORMASSION SIENTIFICA
Toseto tuto tega
Na notissia del Gazetin da par serto che un putin de quatro ani in Russia ga in dotassion na tegassa de ventun sentimentri e “un appetito sessuale non comune” (questo lo ga dito la so maestra d’asilo. Lasso a vialtri indovinare come che la fa saverlo!) Desso mi, che a costo de scassarve i bronbi, ve assicuro che par via de logica sò inbatibile (e forte in matematica) go fato quatro conti. Partindo dall’assioma che uno quatro ani ga na onesta tegheta de 3 sentimetri e a quarantani el ga, senpre na onesta tega da 18, go fato su sta proporsion:
3 : 18 = 21 : x
dala cui se ricava che x = 18 x 21
3x = 126 sentimetri
Se el putin stratega rispeta la logica, la matematica e el deto biblico “cressete e moltiplicatevi” soratuto nela prima parte (par la seconda no penso che el gabia problemi) a venti ani el sarà paron spotico de un scopeton mostruoso. Penso che le poche spose che ciaparà in man sto libro pagarìa un ochio dela testa par avere l’indirisso del putin.... Me dispiase ve giuro che no lo go! Al massimo posso darve l’indirisso del musso de Sona che co’ el ze in calda col cicio l’ara i canpi e ga za incoconà otando musse, tre vache, na zebra de passajo e un paro de mussi (in zona mia ghe ze na nebia che no se vede un casso) ....
LEGGI I COMMENTI (6)
-
PERMALINK
domenica 3 dicembre 2006 - ore 18:04
NA BARZELETINA FESTIVA!
(categoria: " Vita Quotidiana ")
Niu Iorc, bar al centesimo piano de un gratacielo... Al banco do inbriaghi spolpi che no se rege in piè. A un serto punto i decide de ‘ndare a ciapare un bìgolo de aria sul terasso; i do se poza sul parapeto e varda zo pensierosi. A un serto punto uno dise a st’altro:
- Ma ti lo seto che sóto qua passa dele corenti de aria stranissime...
- Ma va! - risponde st’altro - e come sarìa a dire "stranissime"?
- Sarìa a dire che se mi me buto de sóto co rivo a sirca diese metri da tera ste corenti de aria me ciapa e me riporta qua sora!!!
- Ocio che mi ghe credo... El vin ga da averte dà ala testa!
- Ah no te me credi? - risponde el primo intavanà - alora sta atento: desso te fasso védare - e dito fato, sóto i oci sbarai de st’altro el scavalca el parapeto e se buta. Giuda can, col riva quasi zo, pian pian, el riprende quota e ritorna sul terasso.
- Ma no posso crédarghe! - cria st’altro - sfregàndose i oci - no poe èssare vero!!!
- Ma alora te sì, oltre che mona, anca gnostico!!!... E va ben, prova un poco ti!
- Mi?... ma gnanca se te me paghi!!!
- E va ben; te lo rifasso.... Atento!!! - el riscavalca el parapeto e se buta da novo e se ripete la sena de prima: dopo pochi secondi ze danovo sul terasso!
- No lo gavarìa mai pensà!... - comenta el miscredente - e... Se se diverte???
- Ma schersito! merita de provarlo almanco na volta!!!
- Ma semo sicuri???
- Altroché... No te ghè visto? Prova anca ti!!!
- Giura che no me sucede gnente!
- Lo giuro: co te rivi a sirca diese metri el vento te ciapa e te riporta su!!!
- Mah... Quasi quasi... Dai che ghe provo!!!
E pian pianeto scavalca el parapeto, varda l’omo e po’ se buta.... Zo.. Zo... Zo... Se sente na bota teribile e l’omo se spaceca in tera.
L’altro inbriagon varda zo e taca sganassare de gusto. Dal bar se sente la vosse del barista che comenta:
- Serto che quando te te inbriaghi te deventi carogna miga poco, Supermen!!!
(Dall’Oco 2007... pena ussìo)
COMMENTA (0 commenti presenti)
-
PERMALINK
sabato 2 dicembre 2006 - ore 17:23
OMAGIO AI BEATLES A TEVISO!!!
(categoria: " Riflessioni ")
Ostia che serata... Gò subito mandà un messajo a Tiziano del Beat Shop che ze stà tra i più mejo suòl palco!!!... Quindi se voi savere cossa che penso andè lezarvelo sul so blog: Beat Shop!
.jpg)
Ecoli qua i mitici Beat Shop!!!
LEGGI I COMMENTI (1)
-
PERMALINK
sabato 2 dicembre 2006 - ore 09:50
LE PAGINE PAR EL TURISTA:I posti da védare
(categoria: " Scienza e Tecnica ")
La piassa de Rosà
In sto ridente e laborioso paese che se cata darente a Bassano del Grapa ghe ze na piassa che ga dele carateristiche ùniche in Italia: difati credo che nissuna cronaca dala note dei secoli secolorum amen a oncò riporti notissia de na cressita de àlbari in aciaio inox... Sissignori, gò dito proprio aciaio inox; e par èssare più precisi ve specifico anca la rassa de sti strani arbusti: tratassi gnentepopo-demanco che de MORARI.
Andè védare: in coste a na ciesa e de un canpanile fati su nela note dei tenpi e quindi degni de rispeto soratuto artistico cresse (?) dei àlbari co tronco feroso e co rame altretanto ferose; sóto l’onbra ferea tronegia panchine fate in aciaio col sentare fato a pètalo e sensa schienae cussì che i pori pensionai che serca refrigerio durante le nostre afose istà ris-cia de càdare indrìo schina e macarse coste e garìtoli.
Naturalmente darente ai morari ghe ze anca dei rubustissimi cavalieri (legi "bachi da seta") anca lori scrupolosamente fati de aciaio... e come se tuto ciò no bastase poco a lato dela piassa ghe ze anca un fosso co la bela rosta ("diga" in italian)... drento nàvega dei stranissimi pessoni anca lori in aciaio inox... Infin par percorare la piassa, la mente fertile dela progetista del tal òpara ecelsa ga proveduo a costruire na aposita pista par orbi-ciechi in modo che ste persone sfortunae possa caminarse sensa intrajarse e trare porchi a tonfon... El problema vero jera che in pase orbi no ghe ne jera cussì la citadinansa ga dovuo alertarse par catarghene fora qualchedun che passejasse par la la piassa... Ringrassiemo Dio che l’autore de tal gioielo paesagistico no ga fato su anca un sìvolo par chi no camina senò ai aministratori atuali (la piassa ferosa ze òpara del’aministrassion precedente... quela de desso serca de sistemare rifasendo el tuto!) gavarìa dovù scavessarghe la ganbe a qualche tosatoto par farlo circolare in carossela.
Da un paro de ani, però, sti strani èssari anomali ga deciso de fare come tuti i onesti morari, overo de produre funghi.
E secondo vialtri che funghi podeveli mai sgiaventare fora?: forse sbrise?... forse funghi porcelini?... eh no, par Dio: CIODINI i ga tacà fare... CIODINI...
Ed eco che nei periodi giusti la piassa se anima de laboriosi paesani che co sestelo e fiama ossidrica racolie ste prelibatesse par po’ portali casa...
- E li magnei?- poe dimandare el letore sproveduto. Nossignor no li magna ma li dòpara come ciodi da murari par tegnere su la casa...
COMMENTA (0 commenti presenti)
-
PERMALINK
giovedì 30 novembre 2006 - ore 08:21
DAL GASETIN DEL FUTURO
(categoria: " Accadde Domani ")
Finalmente frenà la “fuga dei sarvelli dal’Italia”. Come tuti sa (e queli che no sa, essendo ignoranti, che i se informa!) tute le teste più fine, vuoi siensiati atomico-nuclerari, vuoi mèdeghi tajacristiani, vuoi giometri comunali e similia, scanpa dal’Italia dove le tasse li dissangua e core come cani da lièvori al’estaro dove se lavora poco, no se paga tasse, e se tronba più de qua. Par questo el Governo ga inventà el “servelografo” istrumento ato a misurare i giri dei serveli in funsion. Tuti queli che ga el nobile organo in fora giri vegnarò omagiai de superstipendio, azeramento del tasse, fornitura de na “velina” o na “leterina” o na “microfonina” (nei casi dei più onti na “pecorina”) da stramassare giornalmente. El provedimento se ga rivelà inutile nei casi de Fede, Butilione, Mosca e Biscardi, in quanti questi i ze stà sbandonà dai relativi serveli za da ani e ani.
Aldo Biscardi dito El Polentina (consulta Pinochio) el serial chiler dei congiuntivi che na volta ga afermà: "Più me spiego, manco me capisso!"
COMMENTA (0 commenti presenti)
-
PERMALINK
martedì 28 novembre 2006 - ore 18:58
SOBA DE SERA A CARMIGNANO DEL BRENTA!
(categoria: " Accadde Domani ")
Se ghe ze qualchedun che ze in zona, no sa che casso fare, se anoia mortalmente, no ga nissun par pomiciare forsenatamente... poe vegnere in Sala Consiliare de Carmignan de Brenta ae 21,00... Qua ghe sarò mi, e i tre quarti del grupo BEPI E MARIA SHOW che durante la presentassion del libro IN ALTO EL MORALE" de mi e Fred, intrategnarà el publico co varie gag dei so spetacoli... Divertimento assicurà e soratuto AGRATIS.... Vedì vialtri!!!!
COMMENTA (0 commenti presenti)
-
PERMALINK
lunedì 27 novembre 2006 - ore 20:36
E AI NOSTRI MALORI CHI GHE PENSA????
(categoria: " Vita Quotidiana ")
Ieri, come savarà anca la mussa del strassaro (modo de dire veneto che significa che lo sa tuti!), el Cavaliero Berlusca ze andà in afano....Ze nato un putiferio che gnanca se morisse Dio in persona podarìa èssare più grando... In pratica el ga avuo un senplice calo de pression (ale gome davanti o a quele dadrìo?.. mah!!!)... fin oncò ghe ne ga parlà tuti... parfin Libero ga fato na edission speciale... Ma porco giuda, come mai nissun se ga intaressà a mi che tuta ieri gò avuo el scagoto galopante acuto e contagioso??? Nissun telegiornale lo ga dito, nessuna edission straordinaria del Gasetin ... E de me nono che ze andà in afano al sportelo dele poste par un "Calo dela pension"?... Vergogna vergognosa!!!!
.jpg)
LEGGI I COMMENTI (7)
-
PERMALINK
> > > MESSAGGI PRECEDENTI
[ SONO OFFLINE ] 