Walter Basso: Fondatore de na particolare casa editrice ( Scantabauchi -
LINK ) in ùndese ani el ga publicà sirca sinquanta tra libri,calendari e agende. Cressuo ala scola de Durante al quale lo ga ligà na profonda amicissia e colaborassion el se definisse "l’alievo predileto de Dino"... Oltre al’umorismo anca lu ga scrito vari libri sula cultura veneta (do dissionari co Dino e varie altre opere). El ga anca scrito i dialoghi de un musical, tre spetacoli teatrali, testi par trasmission televisive e radiofoniche. Colabora co inumerevoli testate, anca nassionali. Lavora in streta colaborassion co tanta zente tra i quali ghe ze anca i s-centra del Bepi e Maria Show. Desso, oltre a èssare inpegnà a star vivo lavorando el manco possibile, lavora de scondon co Striscia la Notizia come informatore che, in vista, come attore-mona. Ze za oltre quaranta i servissi girà co Moreno Morello e messi in onda in sete stajon....Tanti al’estaro: Barcellona, Londra, Bruxelles, Colonia,Ginevra, Valencia... Ultimamente lavora anca co Tony Pagliuca tastierista storico de Le Orme col quakle ga messo in scena un particolare spetacolo de musica e teatro!!!!
Walter con Vanessa del baciamento europeo e Moreno MorelloCiao a tuti i sprissini e soratuto sprissine... Ze un piassere èssare qua a sparare monade a marteleto su un sito indove ze presente i più mejo vissiosi de Padova e dintorni, sobri amanti dei supremi piasseri dela vita tra i quali ghe ze sicauramente l’alcol etilico, el sesso, la pigrissia acuta, e tuto quelo che la Ciesa, bontà sua, condana. Mi spero de catare novi amissi (e amighe), anarchici spirituali fa mi, e de passare qualche ora alegra sensa ronpicojoni in mezo ai cosideti afari... Se ve va, mandeme batute, (che no le sia cagade fora dal bocae!)barzelete, monade in sorte che par mi ze viatico indispensabile visto che par vivare fasso el mona a tenpo pieno... Ciao a tuti! Walter
Ostrega, incredibie... dopo un ano gò catà na paca de zente fora coe oche come mi...Se fusse bon modificare un poco sto brog me piasaria anca ospitare raquanti amissi mone cofà mi!!!
(questo BLOG è stato visitato 27794 volte)
ULTIMI 10 VISITATORI:
ospite, ospite, ospite, ospite, ospite, ospite, ospite, ospite, ospite, ospite
[ ELENCO ULTIMI COMMENTI RICEVUTI ]
lunedì 6 marzo 2006 - ore 12:33
ONCO’ LA VEDO CUSSI’ riflession bastarde
(categoria: " Riflessioni ")
Zugadori de balon
Ormai semo al’assurdo più totale: sti miliardari in mudande, strapagai par far finta de córare, tra na tronbada e st’altra co putanasse o veline, leterine (a proposito: a Milan le se ciama “leterine” ma a Roma le se ciama “Le-terone”), drio a na bala de curame per sirca 90 minuti co l’unico conpito de trarla drento da rede da osei, ormai no ghe la fa più: massa lavoro. Sì e no i resiste un quarto d’ora corendo solo al’onbra. Dopo i cade in tera de rabalton e i va fora in barela o de sotignon... Serti adiritura se spaca durante i alenamenti... Malatie gravi da consulti internassionali, da eccolegrafie, risuonanse magnetiche, ragli X Y Z... I pare fati de puina: basta na peadina e eco un “stirachiamento muscolare”... n’altra peada e se sbrega el “nevischio del zenocio destro”....o “macamento dela rodela del zenocio sinistro” Po’ corendo massa forte ghe vien “el sgranfo al polpaciolo” (mi el granfo me vien tute le note e no i me ga mai dito par el Telegiornale!)...Co le testade ala bala po’ i se scavessa i caveji e via de longo... Par no parlare dei rafredori, stanchesse croniche, pelagra, depression....
(Mi da na parte anca li capisso: provè vialtri a andare tute le sere a pinciare nei casini de lusso!)
E cussì ogni telegiornale ze incalcà de interviste, notissie, informassion, che pare un boletin de guera più che informassion sportiva.... Mi, se fusse Dio, ogni volta che uno de sti canpioni dela busta paga cade in tera ghe sgiaventarìa na saeta a sbregarlo in do e ogni volta che uno se mala ghe mandarìa in omagio la lebra, la mastite, e la peste scavejona (che no lo sò che casso la sia, ma el nome me piase assè!) e me farìa na ridadina... E ai titolari dela nassionale, ormai fata de superinvalidi, ad ogni partìa persa ghe inviarìa oto dì a testa de scagoto a nastro, conpreso el CT e el médego... Te vedaressi come che i corarìa e che svagonà de gol che i insacarìa!!!... Altro che premi partìa!!!
Mi e la presunta volgarità
Ogni tanto (minimo un paro de volte al dì) me salta in recia qualchedun che aferma co solenità e disgudo che mi sarìa “onto, volgare, blasfemo e mona”.
Desso sul fato de èssare più o meno mona posso anca èssare d’acordo visto che sò uno dei pochi che fa el mona a pagamento mentre in mèzo ai tótani me ritrovo quotidianamente na svagonà de mone agratis, overo de persone che passa tuta na vita a fare i mone ciapando gnente altro che da mone, ma sul fato de sta presunta volgarità no sò par gnente d’acordo e cussì spesserò na slancia in mio medesimo favore:
SIGNORI DELA CORTE, Walter Basso sono na persona amodo, parben e dal linguagio forbitolo noché arguto e chi no ze d’acordo poe andare a farselo métare col voe, quela bruta onta sbudorata di sua sorela, sta giovenca.... Me sò spiegà, orco zio?
LEGGI I COMMENTI (4)
-
PERMALINK
domenica 5 marzo 2006 - ore 13:47
VARDA QUA: Come farse girare le balote (dei oci!)...
(categoria: " Fotografia e arte.. ")
Varda el puntin in mezo al sacramento de disegno... dopo avissina e alontana la suca dal schermo... Ostia!... come che a sia sta facenda???
LEGGI I COMMENTI (5)
-
PERMALINK
sabato 4 marzo 2006 - ore 16:58
ONCO CULTURA RUSPANTE VENETA!!!
(categoria: " Riflessioni ")
Passo agratis dele perle dela sagessa popolare veneta dei nostri veci... i ze i cosideti MODI DE DIRE veci cofà el cuco!... Meditate zente, meditate!
"El ga fato el pelo sul’articioco"
Lett.: "Ha messo il pelo sul carciofo" - se dice de tosato che ze rivà al svilupo (la cosideta "puberta") e che quindi disdegna chiche e balochi ma taca interessarse del gentil sesso, co ochio spermatozoico
"Ze passà i tenpi che i faseva i gnochi col trinarolo"
Lett.: "Sono finiti i tempi che si facevano gli gnocchi con il piccolo aratro" - vol dire che desso semo tuti astuti cofà volpi astute, sveji e inteligenti... infati se vede la fadiga boja che fa i nostri governarti par busararne de bruto...
"Quando che i lo ga batezà jera caro el sale"
Lett. "Quando lo hanno battezzato il sale era molto costoso" - par dire che uno ze baucoto, overo mona. Infati na volta se pensava che el grado de inteligensa fusse proporsionale ala salinità dela testa in ogeto. Gnente de più falso. Infati se fusse vera sta teoria i pessi sarìa inteligentissimi.
"El se fa magnare l’asso col do de brìscola"
Lett.: "Si fa divorare l’asso grazie al due di briscola" - El fa dele assion da s-ciafe sula boca parché el ze un parfeto insemenìo. El modo de dire lo capisse ben queli che frequenta le ostarìe par zugare carte, bevendo cofà pessegati, fumando cofà ciminiere de Porto Marghera e porchesando cofà na coriera de turchi intavanà...
"Magnare carne viva se poe anca al vénare"
Lett.: "mangiare carne viva è sempre permesso" - El pararìa un modo de dire adato ai baluba canibali invesse el ze na potente metafora: "magnare carne viva" vol dire amoregiare sfrenatamente. Quindi el ze un sagio consilio da tegnere in grandissima considerassion.
"No’l ze un dìndio, ma un capon"
Lett. "Non è un tacchino, è un cappone" - la frase sardelonica miga poco se riferiva a omuncolo fiapo, sensa caratare e forsa fisica... insoma al tipico ometo vitima de na mojere de sentoedise chili col mostacion nero e l’ocio de un sarpente pitone afamà...
"El ga tanta crogna sul colarin che se podarìa consare i capussi"
Lett. "Ha così tanta sporcizia sul colletto che si potrebbero condire i cavoli capucci" - quesato no ocore che ve lo spiega. Solo na domanda: ma chi sarà mai stà quelo che magnava i capussi consai co tal schifessa mondiale?
"Toni ze andà in cuco come i radici"
Lett.: " Antonio è andato in semenza, come il radicchio" - Quando che el radicio va in semensa, mete su un pelo de tre sentimetri, taca inséndare cofà le strope e quind lo magna solo i mone e serti cosideti "buongustai"... Anca Toni ormai vetusto fa afano. E quindi vien logicamente paragonà al radicio.
"El ze grosso cofà el culo de un ministro"
Lett.: "E’ grosso, abbondante come il didietro di un ministro" – No coment senò me incasso!… Giuda stracan!
LEGGI I COMMENTI (4)
-
PERMALINK
venerdì 3 marzo 2006 - ore 17:44
ANCA EL VENETO GA I SO SUPEREOI
(categoria: " Scienza e Tecnica ")
Essendo romai stufi agri che tuti i più mèjo eroi li gabia i mericani tipo Barbastrejo men, l’Omo Invisibile, che ultimamente no se vede più in giro, l’Omo Ragno Peloso, Bateman che pare anca ch’el sipia un fiatenin fenocio, Silvestro Stalone, Arnoldo Svassneghe e via de longo ecove qua i nostri eroi: veri, ruspanti e che no ga paura de nissun!
Superman
Nato da un incalmo selerato tra el cantante Giani M. co la trop model Malia Sbuderata, el ga in dotassion do manasse che pare do bajie. De natura spissengo, fetente, rabioso e rognoso el salta fora quanto manco te te lo speti e taca a sberlotare sule ganasse chi ghe stà sule bale. Overo tuti queli che ga la scarogna marsa (e putrefata) de catarse sula so strada. El so sogno segreto ze rivare a Montecitorio durante na seduta e s-ciafesare violentemente sule zenzive tuti i rapresentanti del popolo bue e bestia. Ci è zonta ("giunta" in italian) in recchia che il popolasso ze dietro racoliere fondi par cronparghe el bilieto de aereo in prima classe de sola andata par Roma.
Suchermen
Dotà de na inponente zagolona, tuta de osso, dela dimension de na suca baruca de Piero Petolon, Suchermen pare sia fiolo ilegitimo (e anca mona!) de Gigio Marsulo e dela nota subret Luridona L...so. Logico quindi ch’el gabia un grado de inteligensa pari a quelo de na catalpa (legi "pratano") o anca de un musso andicapà. L’inperversa inte i saloti inteletuali indove fa dimandi èbeti cofà el paltan e apare inprovisamente nei studi televisi indove tenta de balare provocando moti de stómego nei presenti e atachi inconsulti de scagoto nei teleaspetatori deboli de intestin... El so sogno ze vìnsare un Nobel in calcossa o almanco na "laura in ororis causa"... E visti serti precedenti...
Omo Onbra
Fiolo de so pare, tale Neno Gripola alcolista doc, e so mare tale Romualda Tetassa ex vedova de Nineto Tajadela dito Scorezeta, morto par un violento screcarterie durante l’adenpimento del proprio dovere coniugale, l’Omo Onbra ga in dotassion un fià che copa un lionfante-pachiderba a venti metri de distansa. Prova ne sia che ogni tanto la so mojere (la Dona Canone) ghe intima de scorezare tanto par canbiare aria. El ga na autonomia de sirca venti chilometri co un litro e el ze el sabotatore nùmaro uno dele riunion dei ex alcolisti. El so sogno ze che vegna fato Presidente del Consilio Roco Butilione, Presidente del Senato Cremente Mastela e Presidente dela Republica Bil Clinton l’ex presidente merican porseon.
Dal’Oco 2006 de Walter Basso
LEGGI I COMMENTI (4)
-
PERMALINK
venerdì 3 marzo 2006 - ore 14:46
ULTIMISSIME!!!
(categoria: " Accadde Domani ")
El Berlusca ga deciso: grandi sorprese par i VIP overo par i Veci In Pension... Alo studio el novo slogan "VE DAREMO MENO ELESSION MA PIU’ ERESSION"... ma in questo se ga mosso anca Prodi che come slogan ga "PRESSION BASSA e PENSION ALTA"... Berlusca ga ribatuo assicurando che darà el Viagra agratis a tuti i vecioti co predilession a queli malà de cuore... cussì i va in mona più velocemente... Prodi invesse ga dito che fornirà preservativi-goldoni co le steche de balena tuto datorno... Cussì i maledeti atressi no se storzarà!!!
COMMENTA (0 commenti presenti)
-
PERMALINK
giovedì 2 marzo 2006 - ore 12:25
BONA QUESTA!!!
(categoria: " Vita Quotidiana ")
Sempre in tema Berlusca intel blog de "alez" gò testè catà sta notissia riportà fedelmente... alez ghe gà sgnacà soto un comento che ve consilio de andare a lèzare e mi dopo el testo ghe meto el mio!!!
ROMA, 23 FEB - Chi ha oltre 70 anni non pagherà più il canone Rai, treni, musei, cinema e stadi. E’ quanto promette Berlusconi. Parlando al convegno della federazione dei Pensionati, il premier ha annunciato una speciale carta d’oro per chi ha compiuto i 70 anni di età, ribadendo poi “l’impegno ad aumentare le pensioni minime a 800 euro in uno o due anni”.
Mi propongo de nominare el Cavaliero dela Poca Lissia subito "PERITO BALISTICO" par via dele bale mostruose ch’el sbara in continuassion!!!
COMMENTA (0 commenti presenti)
-
PERMALINK
giovedì 2 marzo 2006 - ore 10:00
E DAGHELA CO STA "PAR CONICIO"!
(categoria: " Riflessioni ")
In sto periodo in television bisogna stare ben tenti a come che se parla: no se poe dire sparolasse e no se poe dire i nomi dei politici.. A sto punto a mi la logica me dise che i nomi dei politici ze considerà parole onte... Però a pensarghe ben, no ze vero che no se poe dire i nomi dei politici... ze i NOMI E COGNOMI che no se poe dire... Par esenpio se mi digo ROMANO o SILVIO, ghe ze qualcuno che poe dirme calcossa???.. me spenzo ancora più vanti.. se mi abino i nomi propri ale parolasse cossa sucede?... tipo: ROMANO MONA... SILVIO STRONSO... CLEMENTE MACACO... GIANFRANCO BAUCOTO... Gnente .. no sucede gnente... Ragion par cui mi la "par conicio" me la peto sui peri!!!!
LEGGI I COMMENTI (5)
-
PERMALINK
mercoledì 1 marzo 2006 - ore 10:39
1° Marzo... riva la pension!!
(categoria: " Vita Quotidiana ")
La foto mostra me nono Tulio, pensionato squilibrato intel senso che ga la pression alta e la pension bassa, drio dire robe brute miste a orendi porchi e biasteme in sorte, dopo aver incassà la carità, overo aver tirà la pension in posta... Dopo do ore de sproloquio el poro can se ga ciucià do bonboloni de ossigeno puro par no morire asfissià tronco!!!... Ne risulta che al Cavaliero Berlusca ga da fis-ciarghe le recione da musso!!!
Pr fortuna che la foto someja no ga l’audio!!!
LEGGI I COMMENTI (6)
-
PERMALINK
martedì 28 febbraio 2006 - ore 12:29
LA PREGHIERA DEL VENETO DOC
(categoria: " Vita Quotidiana ")
Caro Dio jùtame,
dame anca oncò el me pan quotidiano, magari pesà giusto e col scontrin fiscale, fa sbassare i tassi dei intaressi che la banca me ga prestà par farme sù la casa... anca se na saeta in uficio archivio no sarìa male. Fa che i sbassa anca el presso dele sigarete e dela bensina senò qua ciapare un càncaro deventa un lusso.
Càvame da torno almanco l’80% dei nostri ministri, sti lazaroni, che da na vita me dissagua le finanse o almanco fa che i aumenta le ore de riunion cussì fin che i pàpara par gnente almanco i stà distanti dai nostri portafogli. Liberarame anca dai vari maleducati, venditori e maghi che siga e me insulta fin che stago tranquilo a vardare la television. Cata un lavoro in fabrica a tuti queli che ai semafori coi scoati infangà me sludra i veri dela màchina e crea dei canpi de concentramento par tuti i mone e i ronpimaroni che me sassina la giornata.
Fa che possa lavorare tranquilo, magari vérzare na ditarea, sensa che vegna mato par girare par i ufici statali par assùmare un aprendista. Màndaghe un infarto micidiale tuti i comercialisti, fa sparire par senpre INPS, USL, IVA, ILOR, ICI, 730 e 740 e tuti st’alri Istituti che da sempre me spaca i ovi. Abolissi i boli dele màchine e fa in modo che tute, e digo TUTE, le assicurassion vada a ramengo suo dopo averme dà indrìo tuti i schei che i ne gà ciavà. Fa entrare prima in cassa integrassion, po’ in disocupassion a zero euro i dipendenti dele Finanse, Ispetorato del Laoro, Nas.
Provedi anca che tuti i falsi invalidi che ocupa i posti méjo deventa invalidi veri al 100% e e se cata tuti ocupà a snetare cessi incalcà de caca umana e canina sui Mota Gril.
Jutane a tirare la pension qualche ano prima de lassarghe le strasse e fa in modo che la stessa co contribuissa a farme morire de fame. E fa in modo, Signore, co ze la me ora, de farme morire de un colpo, magari de note, distante da prelievi, inpegnative, prenotassion, rissete, tichete, sale de rianimassion, preti portapègola che me core drio par onfegarme co l’ojo, camarete morturie, frigoriferi che mantien “la salma e el sangue fredo” E in ùltima tieme distante i inpresari funebri che come lugubri avoltoi, speta che tira l’ultimo fià par ciavarme quei quatro schei che, dopo na vita de porchi e lavoro, gò messo in parte par i fioli...
Signore, te prego, sò tra le to man... me racomando... grassie. AMEN
LEGGI I COMMENTI (2)
-
PERMALINK
domenica 26 febbraio 2006 - ore 14:13
LARGO AI NOVI POETI!!!
(categoria: " Pensieri ")
Ogni tanto qualchedun me manda dele cosidete poesie e me dimanda na opinion.. Questa rivà da un me letore e amigo ex studente de ingegneria... Purtopo desso sto qua, co tanta testa, ze ingegnere... Dio juta i so clienti!!! Me la passo co la me oculata recension!!!
Invio sta solene lirica in quartine e mèzi litri, pregna de intrinsechi e sifilitici significati rurali e rupestri. Atendo precisa e doverosa recension da parte de Lu, inportante editore e autore veneto. O deto!!!
Enrico Pellizzaro
LA BALLATA DEL BOARO
Torno al fogo fermeve a scoltare
vardando le stele coi oci al´insù
sta rustica storia da ricordare
del tenpo e dela zente del tenpo che fù.
Canta del galo, sorge l´aurora,
Toni Boaro da Camponogara
sù dal pajon senpre bonora
in croste rufa e gran scavejara
Gnente saon, sgarbele sui oci,
spussa a vento cofà un cavaron
marenda de bòvoli, folpi e peoci
e un litro de nero, potente grinton.
Sgàlmare braghe grenbiale e capèo
subito `ndarghe drio a la stala
parecia el paston che fa grasso el porseo
mònzare la vaca, che senò la se mala.
Inpissa la cica e el trà na scoresa
eco rimbomba co grande fragore
tuto el sélese e anca la siesa
co´ che va in moto el vecio tratore
Bruscare le vegne, scóndare i schei
ciuciarse anca i dei magnando curame
casa che siga ghe zè sie putei
fodrài de paero, de pisso e de fame.
Ora de sera se torna dai canpi
se monze la vaca e se cura el porseo
oncora da fare i mestieri ze tanti
prima de picare grembiale e capèo
Polenta, fasoi, e coe de radicio,
quelo che sfritega inte la farsura
gnente formajo, polastro o conicio
la vita de Toni xe senpre più dura
Giornale sotobrasso e sguardo sicuro
onde espletar spussolente funsion
se sara deciso inte´l cagauro
rifugio de intima consolassion
Medita e spense cucià su la tola
braghe sbassà e ocio depresso
e nel congedo de l´ultima viola
eco che sburta el virile boresso
Za el pregusta la consolassion
de far co´la femena chea poca de festa
de prima de l´era dela television
senpre che no la gabia el male de testa.
"Voltati cara", con voce suadente
dise Toni co in man el butiro
"Ti bramo ti vollio e sono inpassiente
che za da do ore la coa gò in tiro"
"Ogi mio caro adorato consorte,
son desolata, mi duole la testa.
No è giornata par farmi la corte
e il tuo boresso m´è cosa molesta
Calma o dunque il tuo sangue di bollio
che no è tenpo di fare ganzega.
Saprò io dirti quando ti vollio
ma par stavolta fate na s...."
Eco sui canpi tornare l´aurora
par Toni Boaro da Canponogara
lavarse i piè sarìa anca ora
e sbrocolare la ludra scavejara.
Da novo la stala, l´orto e el tratore,
nel sole dei canpi e sensa coltrine
fadiga, besteme astinensa e suòre
scoverze a Toni raquante fassine.
Ora de sera se torna dai canpi,
el monze la vaca e anca el vedeo
Oncora i mestieri da fare ze tanti
ormai ch´el ze drio monze anca el porseo.
Entra in cusina criando co sgarbo
"Voltate femena che me gira i cojoni
ti te aprofiti del me massa riguardo
o te me la dè o te sbrego i palmoni!
No ze possibile, giuda ch´el can
che tute le sere te sia senpre stufa...
Ogni sera la gò sempre in man
e ormai go intorno pì voja che rufa”.
Siga la femena intavanà
"Senpre in tiro sto oselo padulo"
Risponde Toni ormai spasemà
“Se no te te volti te dòparo el c...!"
PRECISA E DOVEROSA RECENSION DE WALTER BASSO
PRRRRRRRRRRRRRRRR...PRRRPRRRRRRRRRRRRRRRRRRR.................Prrrrrrrrrrrrrrrrrr!!!
Prrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrr... Eco fato!!... Ciaro no?... e n’altra volta evita, can bestia, de inpienare dapartuto de parole onte, che me toca pèrdare tenpo a cavarle e métarghe i puntini, tana bestia canaja!!!
COMMENTA (0 commenti presenti)
-
PERMALINK
> > > MESSAGGI PRECEDENTI
[ SONO OFFLINE ] 